ସତ୍ୟଶିଖା ( ଭୁବନେଶ୍ୱର )୦୯/୧୦ /୨୦୨୧: ଅଭାବ ଅନଟନରୁ ବର୍ତ୍ତିବାକୁ ୩ ମାସର ଶିଶୁ ପୁଅକୁ ବିକି ଦେଲା । ନୂଆପଲ୍ଲୀ ସାଲିଆ ସାହିରେ ଜୈନିକ ମା’ ଶିଶୁପୁତ୍ରକୁ ମାତ୍ର ୬୫୦୦ ଟଙ୍କାରେ ଅନ୍ୟ ଜଣେ ଦମ୍ପତିଙ୍କ କୋଳକୁ ଟେକି ଦେଇଛନ୍ତି । ଭୁବନେଶ୍ୱର ଚାଇଲ୍ଡ ଲାଇନ୍ କର୍ତ୍ତୃପକ୍ଷଙ୍କ ହସ୍ତକ୍ଷେପ ପରେ ଶିଶୁପୁତ୍ରକୁ ଉଦ୍ଧାର କରାଯାଇଛି । ଶିଶୁପୁତ୍ରଟିକୁ ଚାଇଲ୍ଡ ଲାଇନ୍ କର୍ତ୍ତୃପକ୍ଷ ରଖିଛନ୍ତି ।
ଉଭୟଙ୍କ ଘର ସାଲିଆ ସାହି ଗଣପତି ନଗର ବସ୍ତିରେ । ଶିଶୁପୁତ୍ରର ମା’ ବିଧବା । ତାଙ୍କର ଗୋଟିଏ କୁନି ଝିଅ ଅଛି । ସେ ଯେଉଁ ଦମ୍ପତିଙ୍କୁ ଶିଶୁପୁତ୍ରକୁ ବିକିଥିଲା, ସେମାନଙ୍କର ମଧ୍ୟ ୨ଟି ସନ୍ତାନ ରହିଛି । କିଣିଥିବା ଦମ୍ପତି ଶିଶୁପୁତ୍ରକୁ ଅନ୍ୟ କାହାରିକୁ ବିକିବାକୁ ଯୋଜନା ରଖିଥିଲେ ବୋଲି ସନ୍ଦେହ କରାଯାଉଛି । ପୁଅର ମା’ ଟଙ୍କା ଲୋଭରେ ପୁଅକୁ ବିକିଥିବା ଜଣା ପଡ଼ିଛି ।
ପୁଲିସ ଜାଣିବାକୁ ପାଇଛି, ଏହି ଦମ୍ପତି ପୁଅକୁ କିଣିବାକୁ ପ୍ରଲୋଭନ ଦେଖାଇଥିଲେ । ଏମିିତି କଲେ, ତା’ର ଦାରିଦ୍ର୍ୟ ଦୂରେଇ ଦେବେ । ଏମିତିକି ମା’କୁ ନିଜ ଖର୍ଚ୍ଚରେ ଦିଲ୍ଲୀ ପଠାଇବେ । ସେଠାରେ ଜଣେ ବ୍ୟବସାୟୀକୁ ସେ ବିବାହ କରି ଖୁସିରେ ନୂଆ ସଂସାର ଗଢ଼ିପାରିବେ ବୋଲି ଲୋଭ ଦେଖାଇଥିଲେ । ଯେଉଁଥିରେ ମା’ ଢ଼ଳି ଯାଇ ପୁଅକୁ ବିକି ଦେଇଥିବା ପୁଲିସ ସନ୍ଦେହ କରୁଛି । ବଡ଼ କଥା ହେଲା, ଶିଶୁପୁତ୍ରକୁ ବିକିବା ପାଇଁ ଏକ ଚୁକ୍ତିନାମା ମଧ୍ୟ କରାଯାଇଥିଲା ।
