ପିଆଜ ଦର ସେଞ୍ଚୁରି ଛୁଇଁଲା

ସତ୍ୟଶିଖା (ଗଜପତି) ୨୯/୧୦/୨୦୨୦ : ସେଞ୍ଚୁରୀ ଛୁଇଁବାକୁ ବସିଲାଣି ପିଆଜ ଦର। ଗଜପତି ଜିଲ୍ଲାରେ ବର୍ତ୍ତମାନ ପିଆଜ ଦର ୮୦ ରୁ ୯୦ ଟଙ୍କା ବିକ୍ରି ହେଉଛି । କେବଳ ଗଜପତି ନୁହେଁ, ସାରା ରାଜ୍ୟରେ ପିଆଜ ଦର ହୁ ହୁ ହୋଇ ବୃଦ୍ଧି ପାଉଛି । ଯାହାର ପ୍ରଭାବ ସିଧା ସଳଖ ଗରିବ ଓ ମଧ୍ୟବିତ୍ତ ଲୋକଙ୍କ ଉପରେ ପଡୁଛି । ପିଆଜ ଦର ନିୟନ୍ତ୍ରଣ ନ ହେଲେ ଦିନ ମଜୁଆରି ଏବଂ ଖଟିକିଆ ଲୋକ ଏଭଳି ଭାବେ ହନ୍ତସନ୍ତ ହେବେ । ଦିନକୁ ଦିନ ପିଆଜ ଦର ଆକାଶ ଛୁଆଁ ହେଲାଣି । ପିଆଜ ଦର ଯେଉଁଭଳି ଭାବେ ବୃଦ୍ଧି ପାଉଛି, ସ୍ବଳ୍ପ ରୋଜଗାର କରୁଥିବା ଜଣେ ମଣିଷ ଅଧା କିଲୋ ପିଆଜ କିଣି ଖାଇବା ତାଙ୍କ ପକ୍ଷେ କଷ୍ଟକର ହୋଇପଡୁଛି ।ସେପଟେ ବ୍ୟବସାୟୀଙ୍କ କହିବା କଥା ହେଲା ଗଜପତି ଜିଲ୍ଲାକୁ ହାଇଦ୍ରାବାଦ କିମ୍ୱା ବେଙ୍ଗାଳୁରୁର ପିଆଜ ଆସିଥାଏ । ଯାହା ସେପଟେ ବନ୍ୟା ଲାଗି ମାଲ ମିଳି ପାରୁ ନାହିଁ । ଯାହାଫଳରେ ଚଢା ଦରରେ ବ୍ୟବସାୟୀମାନେ ପିଆଜ କିଣି ବିକ୍ରି କରୁଛନ୍ତି । ପିଆଜ ଦରକୁ ନେଇ ପ୍ରଶାସନର କହିବା କଥା ହେଲା ବଜାର ଦର ପ୍ରତି ଅବଗତ ଅଛନ୍ତି । ଯେହେତୁ ପିଆଜ ଦର ଚାରିଆଡେ ବଢିଛି ତେଣୁ ପ୍ରଶାସନ କୌଣସି ପଦକ୍ଷେପ ନେଇପାରୁନାହିଁ ।