ଗବେଷକଙ୍କ ପାଇଁ ଖୋଲିବ ପ୍ରୟୋଗଶାଳା
ସତ୍ୟଶିଖା (ଭୁବନେଶ୍ୱର) ୦୫/୧୨/୨୦୨୦ : ପିଏଚ୍ଡି, ଏମ.ଫିଲ୍ ଓ ପିଜି ପାଠ୍ୟକ୍ରମର ଗବେଷଣାରତ ଛାତ୍ରଛାତ୍ରୀଙ୍କ ପାଇଁ ବିଶ୍ୱବିଦ୍ୟାଳୟ ଓ କଲେଜଗୁଡ଼ିକର ଲାବରୋଟାରି ଖୋଲିବ । ବିଜ୍ଞାନ ଓ ପ୍ରଯୁକ୍ତିବିଦ୍ୟା ବିଭାଗର ବିଭିନ୍ନ ବିଷୟରେ ଶିକ୍ଷାଲାଭ କରୁଥିବା ଛାତ୍ରଛାତ୍ରୀଙ୍କ ଲାଗି ଏହି ସୁବିଧା ଉପଲବ୍ଧ କରାଇବାକୁ ଉଚ୍ଚଶିକ୍ଷା ସଚିବ ଶାଶ୍ବତ ମିଶ୍ର ଆଜି ଉଚ୍ଚଶିକ୍ଷା ବିଭାଗ ଅଧୀନରେ ଥିବା ରାଜ୍ୟର ସମସ୍ତ ବିଶ୍ବବିଦ୍ୟାଳୟ କୁଳପତି, ସରକାରୀ ଓ ବେସରକାରୀ କଲେଜ ଅଧ୍ୟକ୍ଷଙ୍କୁ ଚିଠି ଲେଖିଛନ୍ତି । ଶ୍ରୀ ମିଶ୍ର କହିଛନ୍ତି ଯେ ନଭେମ୍ବର ୩୦ରେ ରାଜ୍ୟ ସରକାର ଡିସେମ୍ବର ମାସ ଲାଗି କରୋନା ଗାଇଡ୍ଲାଇନ୍ ଜାରି କରିଛନ୍ତି । ଯେଉଁଥିରେ ଉଚ୍ଚ ଶିକ୍ଷାନୁଷ୍ଠାନ ଖୋଲିବା ନିଷ୍ପତ୍ତି ଉଚ୍ଚଶିକ୍ଷା ବିଭାଗ ଉପରେ ନ୍ୟସ୍ତ କରାଯାଇଛି । ତାହାକୁ ଆଧାର କରି ବିଭାଗ ଅଧୀନରେ ଥିବା ବିଶ୍ୱବିଦ୍ୟାଳୟ ଓ କଲେଜର ଗବେଷଣାରତ ଛାତ୍ରଛାତ୍ରୀ ତଥା ରିସର୍ଚ୍ଚ ସ୍କଲାରଙ୍କ ଲାଗି ଲାବରୋଟାରି ସୁବିଧା ଉପଲବ୍ଧ କରାଯିବ । ଶିକ୍ଷାନୁଷ୍ଠାନଗୁଡ଼ିକ କୋଭିଡ୍-୧୯ କଟକଣା ସହ ଲାବରୋଟାରି ଖୋଲିବେ । ଏହି ନିର୍ଦ୍ଦେଶକୁ ତୁରନ୍ତ କାର୍ଯ୍ୟକାରୀ କରିବାକୁ କୁହାଯାଇଛି ।
ଅନ୍ୟପକ୍ଷରେ ବିଶ୍ୱବିଦ୍ୟାଳୟ ଓ କଲେଜର ଗବେଷଣାରତ ଛାତ୍ରଛାତ୍ରୀ ତଥା ରିସର୍ଚ୍ଚ ସ୍କଲାରଙ୍କ ଲାଗି ଲାବରୋଟାରି ଖୋଲିବାକୁ ବିଜ୍ଞପ୍ତି ଜାରି ପରେ ଉଚ୍ଚ ଶିକ୍ଷାନୁଷ୍ଠାନ ଖୋଲିବା ଆଶା ସଞ୍ଚାର ହୋଇଛି । ବିଭାଗର ଜଣେ ଅଧିକାରୀ କହିଛନ୍ତି ଯେ ରାଜ୍ୟରେ କରୋନା ସଂକ୍ରମଣ ଏବେ ତଳମୁହାଁ ହୋଇଛି । ପ୍ରତିଦିନ ଆକ୍ରାନ୍ତଙ୍କ ସଂଖ୍ୟା ୪୦୦ରୁ କମ୍ ରହିଛି, ଯାହାକି ଏକ ଖୁସି ଖବର । ଯଦି ଏଭଳି ସ୍ଥିତି ଲାଗି ରୁହେ, ତେବେ ଆସନ୍ତା ମାସକ ମଧ୍ୟରେ କରୋନା ଗ୍ରାଫ୍ ଶୂନ୍ୟ ହୋଇପାରେ । ଏବେ କରୋନା ସ୍ଥିତିରେ ସାମାନ୍ୟ ପରିବର୍ତ୍ତନ ଆସିଥିବାରୁ ଉଚ୍ଚ ଶିକ୍ଷାନୁଷ୍ଠାନ ଖୋଲିବା ଦିଗରେ ପଦକ୍ଷେପ ନିଆଯାଉଛି । କ୍ୟାମ୍ପସ୍ ପ୍ରସ୍ତୁତ ରଖିବାକୁ ବିଶ୍ୱବିଦ୍ୟାଳୟଗୁଡ଼ିକୁ କୁହାଯାଇଛି । ଡିସେମ୍ବର ଶେଷ କିମ୍ବା ଜାନୁଆରି ପ୍ରଥମରୁ ଉଚ୍ଚ ଶିକ୍ଷାନୁଷ୍ଠାନର ଛାତ୍ରଛାତ୍ରୀଙ୍କ ପାଇଁ କ୍ଲାସରୁମ୍ ଶିକ୍ଷା ଆରମ୍ଭ କରିବାକୁ ଆଲୋଚନା ଚାଲିଛି । ଇତିମଧ୍ୟରେ ଯୁକ୍ତ୩ ଓ ପିଜି ନାମଲେଖା ଶେଷ ପର୍ଯ୍ୟାୟରେ ପହଞ୍ଚିଛି । ଯଦି ସବୁ କିଛି ଠିକ୍ ରୁହେ, ଖୁବ୍ଶୀଘ୍ର ଛାତ୍ରଛାତ୍ରୀଙ୍କ କ୍ଲାସରୁମ୍ ପାଠପଢ଼ା ଆରମ୍ଭ ହେବ ।
