ସତ୍ୟଶିଖା (କଟକ) ୦୫/୦୧/୨୦୨୧ : ଆସନ୍ତା ୧୧ ତାରିଖରୁ ଖୋଲିବ କଲେଜ ଓ ବିଶ୍ୱବିଦ୍ୟାଳୟ । ପ୍ରଥମ ପର୍ଯ୍ୟାୟରେ ସ୍ନାତକ ଓ ସ୍ନାତକୋତ୍ତରର ଶେଷବର୍ଷ ଛାତ୍ରଛାତ୍ରୀଙ୍କ ପାଇଁ କ୍ଲାସରୁମ୍ ପାଠପଢା ଓ ପରୀକ୍ଷା ଅନୁଷ୍ଠିତ ହେବ । ରାଜ୍ୟ ସରକାରଙ୍କ ଏହି ନିଷ୍ପତ୍ତିକୁ ଦେଖି ଆଜି ରେଭେନ୍ସା ବିଶ୍ୱବିଦ୍ୟାଳୟରେ ଏକ ଅନ୍ଲାଇନ୍ ବୈଠକ ଅନୁଷ୍ଠିତ ହୋଇଯାଇଛି । ବିଶ୍ୱବିଦ୍ୟାଳୟର ଭାରପ୍ରାପ୍ତ କୁଳପତି ତଥା ରମାଦେବୀ ମହିଳା ବିଶ୍ୱବିଦ୍ୟାଳୟର କୁଳପତି ପ୍ରଫେସର ଅପରାଜିତା ଚୌଧୁରୀଙ୍କ ଅଧ୍ୟକ୍ଷତାରେ ଏହା ଅନୁଷ୍ଠିତ ହୋଇଥିଲା । ଏଥିରେ ମହାମାରୀକୁ ଦେଖି ରେଭେନ୍ସା ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଛି ।
କ୍ଲାସ୍ରୁମରେ ପଢ଼ିବାକୁ ଆସିବାକୁ ଇଛା ରଖିଥିବା ଶେଷବର୍ଷର ଛାତ୍ରଛାତ୍ରୀଙ୍କ ପାଇଁ କୋଭିଡ୍ ନେଗେଟିଭ୍ ସାଟିଫିକେଟ୍କୁ ବାଧ୍ୟତାମୂଳକ କରାଯାଇଛି । ଏହାସହ ଛାତ୍ରଛାତ୍ରୀ ସେମାନଙ୍କ ଅଭିଭାବକଙ୍କଠାରୁ ଆପତ୍ତିବିହୀନ(ନୋ-ଅବ୍ଜେକସନ୍) ପ୍ରମାଣପତ୍ର ଆଣିବାକୁ କୁହାଯାଇଛି । ରେଭେନ୍ସା ବିଶ୍ୱବିଦ୍ୟାଳୟରେ ମହାମାରୀ ପାଇଁ ହଷ୍ଟେଲ, କ୍ଲାସ୍ରୁମ ଓ ପରିସରରେ ଛାତ୍ରଛାତ୍ରୀଙ୍କ ପାଇଁ କେଉଁ ପ୍ରକାର ନିୟମ ରହିବ ତାହା ବିଶ୍ୱବିଦ୍ୟାଳୟର ୱେବ୍ସାଇଟ୍ରେ ଖୁବ ଶୀଘ୍ର ରହିବ ବୋଲି କର୍ତ୍ତୃପକ୍ଷ କହିଛନ୍ତି ।
ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ଆସନ୍ତା ୧୧ ତାରିଖରୁ ରେଭେନ୍ସା ବିଶ୍ୱବିଦ୍ୟାଳୟରେ ଶ୍ରେଣୀଗୃହ ଶିକ୍ଷାଦାନ ଆରମ୍ଭ ହେବ । ଏହାସହ ୧୦ ତାରିଖରେ ବିଶ୍ୱବିଦ୍ୟାଳୟର ବିଭିନ୍ନ ହଷ୍ଟେଲଗୁଡିକୁ ଛାତ୍ରଛାତ୍ରୀଙ୍କ ପାଇଁ ଖୋଲାଯିବ । ନିର୍ଦ୍ଦେଶ ଅନୁସାରେ ପ୍ରଥମେ ୟୁଜି ଓ ପିଜି ଶେଷବର୍ଷ ଛାତ୍ରଛାତ୍ରୀଙ୍କ ପାଇଁ କ୍ଲାସ୍ରୁମ ଖୋଲାଯିବ । ଛାତ୍ରଛାତ୍ରୀ ବିଶ୍ୱବିଦ୍ୟାଳୟକୁ ଆସିବା ପୂର୍ବରୁ ରେଭେନ୍ସାର ସମସ୍ତ ହଷ୍ଟେଲ ଓ କ୍ଲାସ୍ରୁମ୍କୁ ସାନିଟାଇଜ୍ କରାଯିବ । କ୍ଲାସରୁମରେ ପ୍ରବେଶ ପୂର୍ବରୁ ଛାତ୍ରଛାତ୍ରୀ, ଅଧ୍ୟାପକ ଓ ଅଧ୍ୟାପିକା ହାତ ସାନିଟାଇଜ୍ କରିବେ । ସମସ୍ତ ପରିସ୍ରାଗାର ଓ ଶୌଚାଳୟରେ ହ୍ୟାଣ୍ଡୱାସ୍ ରଖାଯିବ ।
କ୍ଲାସ୍ରୁମ୍ ସିଟ୍ସଂଖ୍ୟାର ପଚାଶ ଭାଗ ଛାତ୍ରଛାତ୍ରୀଙ୍କୁ ଗୋଟିଏ ସମୟରେ ଡକାଯିବ । ଏଥିପାଇଁ କ୍ଲାସ୍ଗୁଡିକୁ ଏକାଧିକ ବ୍ୟାଚ୍ରେ ବଣ୍ଟାଯିବ । ରେଭେନ୍ସା ପରିସର ଓ ଲନ୍ରେ ଛାତ୍ରଛାତ୍ରୀଙ୍କୁ ବିନା କାରଣରେ ବସିବା ଓ ବୁଲିବା ଉପରେ କଟକଣା ଲଗାଯାଇଛି । ଶେଷବର୍ଷର ଛାତ୍ରଛାତ୍ରୀ ବିଶ୍ୱବିଦ୍ୟାଳୟକୁ ଆସିବା ପୂର୍ବରୁ ସେମାନଙ୍କ ଆଣ୍ଟିଜେନ୍ ଟେଷ୍ଟ କରିବାକୁ କୁହାଯାଇଛି । ଟେଷ୍ଟ ରିପୋର୍ଟ ନେଗେଟିଭ୍ ଥିଲେ ସେମାନଙ୍କୁ ବିଶ୍ୱବିଦ୍ୟାଳୟକୁ ଆସିବାକୁ ଦିଆଯିବ । ସମସ୍ତ କ୍ଲାସ୍ରୁମ୍ ଓ ବିଭାଗରେ କୋଭିଡ୍ କଟକଣା ପାଳନ କରାଯାଉଛି କି’ ନାହିଁ ତାହା ଦେଖିବାକୁ ବିଭାଗୀୟ ମୁଖ୍ୟଙ୍କୁ ଦାୟିତ୍ୱ ଦିଆଯାଇଛି । ବିଶ୍ୱବିଦ୍ୟାଳୟର ସମସ୍ତ ହଷ୍ଟେଲକୁ ୧୦ ତାରିଖ ପୂର୍ବରୁ ସାନିଟାଇଜ କରାଯିବା ସହିତ ସେଠାରେ କୋଭିଡ୍ କଟକଣାକୁ ଅଧିକ ଗୁରୁତ୍ୱ ଦିଆଯିବ । ହଷ୍ଟେଲଗୁଡିକର ଦାୟିତ୍ୱରେ ଥିବା ୱାର୍ଡେନଙ୍କୁ ଏହାର ତଦାରଖ କରିବାକୁ କୁହାଯାଇଛି ।
ବିଶ୍ୱବିଦ୍ୟାଳୟର ୱେବ୍ସାଇଟ୍ରେ କୋଭିଡ୍ କଟକଣାର ସମସ୍ତ ନିୟମ ଖୁବ ଶୀଘ୍ର ରହିବ । ଛାତ୍ରଛାତ୍ରୀଙ୍କ ଆସବା ପୂର୍ବରୁ ବିଶ୍ବବିଦ୍ୟାଳୟର ସମସ୍ତ ହେଷ୍ଟଲ, କ୍ଲାସ୍ରୁମକୁ ପ୍ରଥମିକତା ଦିଆଯାଇ ସାନିଟାଇଜ୍ କରାଯିବ । ରେଭେନ୍ସାକୁ ଆସବା ପାଇଁ ଛାତ୍ରଛାତ୍ରୀ କୋଭିଡ୍ ରିପୋର୍ଟ ନେଗେଟିଭ୍ ରହିବା ଜରୁରୀ ବୋଲି ବିଶ୍ୱବିଦ୍ୟାଳୟ ସିସିଡି ପ୍ରଫେସର ଡକ୍ଟର ସ୍ମୃତିପ୍ରଭା ଦାସ କହିଛନ୍ତି । ଆଜିର ଅନ୍ଲାଇନ୍ ବୈଠକରେ ଭାରପ୍ରାପ୍ତ କୁଳପତି ପ୍ରଫେସର ଚୌଧୁରୀଙ୍କ ସହିତ ରେଭେନ୍ସା ସିସିଡି ସ୍ମୃତିପ୍ରଭା ଦାସ, ଚିଫ୍ ୱାର୍ଡେନ କିଶୋର କୁମାର ଦାସଙ୍କ ସହିତ ସମସ୍ତ ବିଭାଗର ମୁଖ୍ୟଙ୍କ ସହିତ ସମସ୍ତ ଅଧିକାରୀ ଉପସ୍ଥିତ ଥିଲେ ।
