ପୁରୀ: ଦୋକାନ ବଜାରର ଗହଳ ଭିତରେ ହଜିଯାଉଥିବା ବଡ଼ଦାଣ୍ଡର ପ୍ରକୃତ ସ୍ବରୂପକୁ ପ୍ରତ୍ୟକ୍ଷ କରିବାର ସୁଯୋଗ ମିଳିଛି। ରଥଯାତ୍ରା ପାଇଁ ବଡ଼ଦାଣ୍ଡରୁ ଉଠାଦୋକାନ ଖାଲି କରାଯିବା ପରେ ବଡ଼ଦାଣ୍ଡର ପ୍ରଶସ୍ତ ରାସ୍ତା ପୁରୀବାସୀଙ୍କୁ ଚମତ୍କୃତ କରିଛି। ଏଣେ ଗୁଣ୍ଡିଚା ମନ୍ଦିର ନିକଟରେ ମଧ୍ୟ ଓଡ଼ିଆ ଘରର ପାରମ୍ପରିକ ଝୋଟି ପ୍ରସ୍ତୁତ କରାଯାଉଛି।
ଗୁଣ୍ଡିଚା ମନ୍ଦିରର ମୁଖ୍ୟ ମନ୍ଦିର ଓ ନାକଚଣା ମନ୍ଦିର ସମେତ ପାଚେରିକୁ ଧଉଳାଯାଇ ଆଲୋକମାଳାରେ ସୁସଜ୍ଜିତ କରାଯାଇଛି। ବଡ଼ଦାଣ୍ଡ ଖାଲି ହେବା ପରେ ଷ୍ଟଲ୍ କାମ ଆରମ୍ଭ ହୋଇଛି। ପାଗ ଶୁଖିଲା ଥିବାରୁ ଏଥର ରଥଯାତ୍ରାର ଅପୂର୍ବ ପରିବେଶକୁ ଉପଭୋଗ କରିବା ପାଇଁ କାହିଁ କେତେ ଦୂରରୁ ଭକ୍ତମାନେ ଧାଇଁ ଆସୁଥିବା ବେଳେ ସୁରକ୍ଷାଠୁ ନେଇ ସେବା କାର୍ଯ୍ୟ ପର୍ଯ୍ୟନ୍ତ ଯେପରି କେଉଁଥିରେ ଉଣା ନହୁଏ ସେନେଇ ବାରମ୍ବାର ଅଭ୍ୟାସ ଚାଲିଛି।
ଗୁରୁତ୍ବପୂର୍ଣ୍ଣ କଥା ହେଉଛି, ବଡ଼ଦାଣ୍ଡ ଭାବେ ପରିଗଣିତ ଶ୍ରୀକ୍ଷେତ୍ରର ମୁଖ୍ୟ ରାସ୍ତା ଦୋକାନ ବଜାରର ଗହଳି ଭିତରେ ଏହାର ସ୍ବରୂପ ଲୁଚିଯାଏ। କେବଳ ରଥଯାତ୍ରା ସମୟରେ ହିଁ ବଡ଼ଦାଣ୍ଡର ମହତ୍ତ୍ବକୁ ଉପଲବ୍ଧି କରିବାର ସୁଯୋଗ ମିଳେ। ତେଣୁ ସ୍ଥାନୀୟ ବାସିନ୍ଦାମାନେ ବଡ଼ଦାଣ୍ଡ ଖାଲି ହେବା ପରେ ଏହାକୁ ନିଜ ମୋବାଇଲ୍ କ୍ୟାମେରାରେ କଏଦ କରି ନେଉଛନ୍ତି। ଅନେକ ବିସ୍ତୃତ ବଡ଼ଦାଣ୍ଡ ସହ ସେଲ୍ଫି ନେଉଛନ୍ତି।
