ସତ୍ୟଶିଖା(ଭୁବନେଶ୍ୱର ) ୦୧.୦୨.୨୦୨୨ : ମହିଳା ସ୍ୱଂୟ ସହାୟକ ଗୋଷ୍ଠୀ(ଏସ୍ଏଚ୍ଜି)କୁ ଋଣ ଦେବା ନାଁରେ ଜାଲ କାଗଜପତ୍ର ଦେଇ ବିଭିନ୍ନ ବ୍ୟାଙ୍କରୁ ଋଣ ଆଣିଥିଲେ । ହେଲେ କୌଣସି ଋଣ ପ୍ରଦାନ ନକରି ସେହି ଟଙ୍କାକୁ ନିଜେ ଆତ୍ମସାତ କରୁଥିଲେ । ଏଭଳି ଭାବେ ବିଭିନ୍ନ ବ୍ୟାଙ୍କରୁ ଶହେ କୋଟିରୁ ଊର୍ଦ୍ଧ୍ୱ ଟଙ୍କା ଠକିବା ପରେ ଦମ୍ପତ୍ତିଙ୍କ କଳା କାରନାମା ପଦାକୁ ଆସିଛି । ଏହି ଘଟଣାରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା(ଇଓଡବ୍ଲୁ) ଜଣେ ମହିଳାଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ଜଣକ ହେଲେ ଦିଭ୍ୟା ଡେଆରି ଏଗ୍ରୋ ପ୍ରୋସେସର ପ୍ରାଇଭେଟ ଲିମିଟେଡର ଏମ୍ଡି ଅମ୍ରିତା କିଣ୍ଡୋ । ଏନେଇ ଇଓଡବ୍ଲୁ ପୁଲିସ କେସ୍ ନଂ ୧୭/୨୨ରେ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ସୋମବାର କୋର୍ଟ ଚାଲାଣ କରିଛି । ଜାମିନ ଖାରଜ ହୋଇଯିବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
ଏଥିରେ ସମ୍ପୃକ୍ତ ଥିବା ଅମ୍ରିତାଙ୍କ ସ୍ୱାମୀ ତଥା ସମ୍ବନ୍ଧ ଫିନସର୍ଭର ଏମ୍ଡି ଦୀପକ କିଣ୍ଡୋ ଫେରାର୍ ଅଛନ୍ତି । ଏହି ମାମଲାରେ ଦୀପକ ମୁଖ୍ୟଅଭିଯୁକ୍ତ । ତେଣୁ ତାଙ୍କୁ ଧରିବାକୁ ଇଓଡବ୍ଲୁ ଚେଷ୍ଟା ଚଳାଇଛି । ପୂର୍ବରୁ ଏହି ଦମ୍ପତ୍ତି ହାଇଦ୍ରାବାଦ, କର୍ଣ୍ଣାଟକର ବିଭିନ୍ନ ବ୍ୟାଙ୍କରୁ ଋଣ ଠକେଇ କରିଛନ୍ତି । ଗତବର୍ଷ ଦୀପକଙ୍କୁ ହାଇଦ୍ରାବାଦ ପୁଲିସ ଗିରଫ ମଧ୍ୟ କରିଥିଲା । ଏଥିସହ କର୍ଣ୍ଣାଟକ ପୁଲିସର ବିଭିନ୍ନ ଥାନାରେ ଏମାନଙ୍କ ବିରୋଧରେ ଏକାଧିକ ମାମଲା ରହିଛି । ସୂଚନା ଅନୁଯାୟୀ, ମୁଖ୍ୟଅଭିଯୁକ୍ତ ଦୀପକଙ୍କ ଚନ୍ଦକା ଶିଳ୍ପାଞ୍ଚଳରେ ସମ୍ବନ୍ଧ ଫିନସର୍ଭ ପ୍ରାଇଭେଟ ଲିମିଟେଡ୍ ନାମରେ ଏକ ସଂସ୍ଥା ରହିଛି । ଦୀପକ ଉକ୍ତ ସଂସ୍ଥା ଦ୍ୱାରା ବିଭିନ୍ନ ଏସ୍ଏଚଜିକୁ ଋଣ ଦେବାକୁ କହି ଖଣ୍ଡଗିରି ସ୍ଥିତ ଅନ୍ନପୂର୍ଣ୍ଣା ଫାଇନାନ୍ସ ପ୍ରାଇଭେଟ୍ ଲିମିଟେଡ୍ରୁ ୨୦୨୦ ମସିହା ଡିସେମ୍ବର ମାସରେ ଜାଲ କାଗଜପତ୍ର ଦେଇ ୫ କୋଟି ଟଙ୍କା ଋଣ ନେଇଥିଲେ । ହେଲେ ଟଙ୍କା ନେଇ ସେ କୌଣସି ଗ୍ରୁପକୁ ଋଣ ଦେଇନଥିଲେ ।
ବରଂ ସେହି ଟଙ୍କାରେ ଅଏସ କରିଥିଲେ । ଏମିତିକି ଋଣ ଟଙ୍କା ସେ ଅନ୍ନପୂର୍ଣ୍ଣା ଫାଇନାନ୍ସକୁ ଫେରସ୍ତ ମଧ୍ୟ କରିନଥିଲେ । ବାରମ୍ବାର ନୋଟିସ୍ ପରେ ଦୀପକ ୫୦ ଲକ୍ଷ ଟଙ୍କା ଫେରାଇଥିବା ବେଳେ ଅବଶିଷ୍ଟ ଟଙ୍କା ଫେରାଇଦେବେ ବୋଲି କହିଥିଲେ । ହେଲେ ବର୍ଷେ ପୂରିଯାଇଥିଲେ ବି ସେ ଟଙ୍କା ଫେରାଇନଥିଲେ । ଏନେଇ ଅନ୍ନପୂର୍ଣ୍ଣା ଫାଇନାନ୍ସର ଏମ୍ଡି ଗୋବିନ୍ଦ ଚନ୍ଦ୍ର ପଟ୍ଟନାୟକ ୨୦୨୧ ଡିସେମ୍ବର ୩୧ ତାରିଖରେ ଇଓଡବ୍ଲୁରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ଇଓଡବ୍ଲୁ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ତଦନ୍ତରୁ ଜଣାପଡ଼ିଥିଲା ଯେ ଦୀପକ ୨୦୧୫ରୁ ୨୦୨୦ବର୍ଷ ମଧ୍ୟରେ ଏହି ଉପାୟରେ ଡିସିପି ବ୍ୟାଙ୍କ, ଏସ୍ଆଇଡିବିଆଇ ବ୍ୟାଙ୍କ, ବିଓପିଏ, ଡିଆଇଏ ଭଳି ଋଣ ପ୍ରଦାନକାରୀ ସଂସ୍ଥା ଠାରୁ ଋଣ ଆଣିଥିଲେ ।
ନକଲି କାଗଜପତ୍ର ଜରିଆରେ ୧୦୦କୋଟିରୁ ଊର୍ଦ୍ଧ୍ୱ ଟଙ୍କା ଋଣ ଉଠାଇଥିଲେ । ପରେ ଏହି ଟଙ୍କାକୁ ସେ ତାଙ୍କର ସହବନ୍ଧିତ କମ୍ପାନୀ ଦିଭ୍ୟା ଡେଆରି ଏଗ୍ରୋ ପ୍ରୋସେସର ପ୍ରାଇଭେଟ ଲିମିଟେଡର ଆକାଉଣ୍ଟକୁ ପଠାଇ ଆତ୍ମସାତ କରିଥିଲେ । ଦୀପକଙ୍କ ପତ୍ନୀ ଅମ୍ରିତା ତଥା ଦିଭ୍ୟା ଡେଆରିର ଏମ୍ଡିଙ୍କ ଆକାଉଣ୍ଟକୁ ୨୦୧୭ରୁ ୨୦୨୦ ବର୍ଷ ମଧ୍ୟରେ ୨୨କୋଟି ୭୨ ଲକ୍ଷ ଟ୍ରାନ୍ସଫର ହୋଇଥିଲା । ତେଣୁ ଏହି ମାମଲାରେ ଇଓଡବ୍ଲୁ ଅମ୍ରିତାଙ୍କୁ ଗିରଫ କରାଯାଇଥିବା ନେଇ ଇଓଡବ୍ଲୁ ପ୍ରେସ ବିଜ୍ଞପ୍ତିରେ ସୂଚନା ଦେଇଛି ।
