ସତ୍ୟଶିଖା( ପୁରୀ )୨୨.୦୩.୨୦୨୨ : ଶ୍ରୀମନ୍ଦିର ସେବାୟତ କୃଷ୍ଣଚନ୍ଦ୍ର ପ୍ରତିହାରୀଙ୍କୁ ଗୁଳି କରି ହତ୍ୟା ମାମଲାରେ ଫେରାର୍ ଥିବା ଆଉ ୪ ଜଣଙ୍କୁ ଆଜି ପୁଲିସ୍ ଗିରଫ କରିଛି । ସେମାନେ ହେଲେ କୁନମୁନ୍ ସୁଆର, ଟୁଟୁ ମହାପାତ୍ର, ହରି ପଣ୍ଡା ଓ ଜଗନ ଖଟେଇ । କୃଷ୍ଣଚନ୍ଦ୍ରଙ୍କ ପରିବାର ପକ୍ଷରୁ ହୋଇଥିବା ଏତଲାରେ କୁନ୍ମୁନ୍, ଟୁଟୁ, ହରିଙ୍କ ନାଁରେ ଥିବା ବେଳେ ଜଗନଙ୍କ ନାଁ ନଥିଲା, କିନ୍ତୁ ହତ୍ୟାରେ ସମ୍ପୃକ୍ତ ଥିବାରୁ ତାଙ୍କୁ ଗିରଫ କରାଯାଇଛି । ତେବେ ଘଟଣା ପରଠୁ ଏବଂ ତଦନ୍ତ ଆରମ୍ଭ ହେବା ଦିନ ଠାରୁ ସମ୍ପୃକ୍ତ ୪ ଜଣ ବାଇକ୍ ଯୋଗେ ସାତପଡ଼ା ଚାଲି ଯିବା ସହ ଏକ ବୋଟ୍ ଯୋଗେ ଚିଲିକାରେ ଦୁଇ ରାତି ବିତାଇଥିଲେ । ସେଠାରୁ ସେ ରାଜ୍ୟ ବାହାରକୁ ଯିବା ପାଇଁ ଯୋଜନା କରୁଥିବା ବେଳେ ଆଜି ତାଙ୍କୁ କୋରାପୁଟ ଠାରୁ ପୁଲିସ୍ କାବୁ କରିଥିଲା । ଏ ସମ୍ପର୍କରେ ଆଜି ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ପୁରୀ ଏସ୍ପି ଡ. କନୱର୍ ବିଶାଲ୍ ସିଂ ।
ଶ୍ରୀ ସିଂ କହିଛନ୍ତି ଯେ, ଗତକାଲି ୬ ଜଣଙ୍କୁ ଗିରଫ କରାଯାଇଥିବା ବେଳେ ଆଜି ପୁଣି ୪ ଜଣଙ୍କୁ ଗିରଫ କରାଯାଇଛି । ଏମାନଙ୍କୁ ମିଶାଇ ମୋଟ୍ ୧୦ ଜଣ ଏବେ ଗିରଫ ହୋଇ ସାରିଥିବା ବେଳେ ତଦନ୍ତ ପ୍ରକ୍ରିୟା ତ୍ୱରାନ୍ୱିତ କରାଯିବ । ତେବେ ଆବଶ୍ୟକ ପଡ଼ିଲେ ଏମାନଙ୍କୁ ରିମାଣ୍ଡରେ ଅଣାଯିବ ବୋଲି ସେ କହିଛନ୍ତି ।
ସୂଚନା ଯୋଗ୍ୟ ଜମିବିକ୍ରିକୁ କେନ୍ଦ୍ର କରି କୃଷ୍ଣଚନ୍ଦ୍ରଙ୍କୁ ଦୁର୍ବୃତ୍ତମାନେ ଦୁଇ ରାଉଣ୍ଡ ଗୁଳି ଚଳାଇ ହତ୍ୟା କରିଥିଲେ । ଗୋଟିଏ ଗୁଳି ମୁଣ୍ଡକୁ ମାରିଥିବା ବେଳେ ଆଉ ଗୋଟିଏ ଗୁଳି ପଞ୍ଚରାକୁ ମାରିଥିଲେ । ହତ୍ୟାକାଣ୍ଡ ପୂର୍ବରୁ ଦୁର୍ବୃତ୍ତମାନେ ଏକ ଲଜ୍ରେ ମର୍ଡର୍ ପ୍ଲାନ୍ ପ୍ରସ୍ତୁତ କରିଥିଲେ ଏବଂ ବାରବାଟୀ ଠାରେ ତାଙ୍କୁ ଗୁଳି ମାଡ଼ କରିଥିଲେ । ଗତକାଲି ୬ ଜଣଙ୍କୁ ଗିରଫ କରାଯାଇଥିବା ଏସ୍ପି ସାମ୍ବାଦିକ ସମ୍ମିଳନୀ କରି ସୂଚନା ଦେଇଥିଲେ ।
