ସତ୍ୟଶିଖା( କଲମ୍ବୋ )୨୦.୦୪.୨୦୨୨ : ଗମ୍ଭୀର ଆର୍ଥିକ ସଂକଟରେ ଫସିଥିବା ଶ୍ରୀଲଙ୍କାର ଅବସ୍ଥା ଦିନକୁ ଦିନ ଆହୁରି ଖରାପ ହେବାକୁ ଯାଉଛି । ରାଜଧାନୀ କଲମ୍ବୋର ସଡ଼କରେ ପ୍ରଦର୍ଶନକାରୀଙ୍କ ଭିଡ ରହୁଛି । ରାଷ୍ଟ୍ରପତି ଗୋଟବାୟା ରାଜପକ୍ଷେ ଓ ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେ ଶ୍ରୀଲଙ୍କାର ଅର୍ଥବ୍ୟବସ୍ଥାକୁ ଋଣବୋଝରେ ଏମିତି ବୁଡାଇଛନ୍ତି ଯେ, ସାଧାରଣ ଲୋକଙ୍କୁ ଅସୁବିଧା ଭୋଗିବାକୁ ପଡୁଛି ।
ଶ୍ରୀଲଙ୍କାର ହସ୍ପିଟାଲ ଗୁଡ଼ିକରେ ଔଷଧର ସଂକଟ ପରିସ୍ଥିତି ଦେଖାଯାଇଛି । ସରକାରୀ କର୍ମଚାରୀଙ୍କୁ ଅନେକ ମାସ ହେଲା ଦରମା ମିଳିପାରି ନାହିଁ । ବିଗତ ଏକ ମାସ ହେବ ପେଟ୍ରୋଲ-ଡିଜେଲ ପାଖାପାଖି ଶେଷ ହୋଇଯାଇଥିଲା । ଏବେ ପ୍ରେଟ୍ରୋଲ ଆସିବାରୁ ଲିଟର ପିଛା ୮୪ ଟଙ୍କା ବଢ଼ାଇ ଦିଆଯାଇଛି । ଏବେ ଶ୍ରୀଲଙ୍କାରେ ପେଟ୍ରୋଲ ଲିଟର ପିଛା ୩୩୮ ଟଙ୍କାରେ ମିଳୁଛି ।
୧୯୪୮ ପରେ ଶ୍ରୀଲଙ୍କାରେ ଘୋର ଅଭାବ ପରିସ୍ଥିତି ଉପୁଜିଛି । ଦେଶରେ ବିଦେଶୀ ମୁଦ୍ରାର ଅଭାବ ରହିଛି, ଯେଉଁଥି କାରଣରୁ ଖାଦ୍ୟସାମଗ୍ରୀ ଓ ଇନ୍ଧନ ଆମଦାନୀ ହୋଇପାରୁ ନାହିଁ । ଦେଶରେ ଏହି ଅଭାବକୁ ନେଇ ବିଗତ କିଛି ଦିନ ହେବ ପ୍ରଦର୍ଶନ ଜାରି ରହିଛି । ଲୋକେ ରାଷ୍ଟ୍ରପତିଙ୍କ ଇସ୍ତଫା ଦାବି କରିଆସୁଛନ୍ତି ।
ଏହାରି ମଧ୍ୟରେ ରାମବୁକାନାରେ ମଙ୍ଗଳବାର ଅପରାହ୍ନରେ ପୋଲିସ ଓ ପ୍ରଦର୍ଶନକାରୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିଥିଲା । ଏହି ସମୟରେ ପୋଲିସ ଗୁଳରେ ଜଣଙ୍କର ମୃତ୍ୟୁ ହୋଇଥିଲା ବେଳେ ୧୦ ଜଣ ଆହତ ହୋଇଥିବା ଗଣମାଧ୍ୟମ ରିପୋର୍ଟ କରିଛି । ପ୍ରଦର୍ଶନକାରୀ ଥାନା ଘେରାଉ କରି ପଥରମାଡ଼ କରିଥିଲେ । ଫଳରେ ପୋଲିସ ଉପାୟ ଶୂନ୍ୟ ହୋଇ ଗୁଳି ଚଳାଇଥିଲା ।
