ସତ୍ୟଶିଖା(ସମ୍ବଲପୁର )୨୫.୦୯ .୨୦୨୧: ନବରଙ୍ଗପୁରର ଏକ ଆଭ୍ୟନ୍ତରୀଣ ଅଞ୍ଚଳ ସାନମସିର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ୨୦୧୯ରୁ ଅବସ୍ଥାପିତ ଡାକ୍ତର ରୀନା ପ୍ରଧାନ ରୋଗୀ ସେବା ସହ ସିଭିଲ୍ ସର୍ଭିସ୍ ପାଇଁ ପ୍ରସ୍ତୁତି ଚଳାଇଥିଲେ । ସେଠାରେ ନେଟୱର୍କ ସମସ୍ୟା ରହୁଥିବାରୁ ସାନଭାଇ ଆଶିଷ ବିଭିନ୍ନ ଷ୍ଟଡି ମେଟେରିଆଲ୍ ଡାଉନଲୋଡ କରି ତାଙ୍କ ପାଖକୁ ପଠାଉଥିଲେ । ବହୁ ପ୍ରତିକୂଳ ପରିସ୍ଥିତି ମ୍ମରେ ନିଜର ଦୃଢ଼ ନିଷ୍ଠା ଓ ପରିଶ୍ରମ ବଳରେ ୧୯୪ ତମ ସ୍ଥାନରେ ଭାରତୀୟ ସିଭିଲ ସର୍ଭିସ ପରୀକ୍ଷାରେ ସେ ଉତ୍ତୀର୍ଣ୍ଣ ହୋଇଛନ୍ତି । ଝାରସୁଗୁଡ଼ା ସହର ସରବାହାଲ ଅଞ୍ଚଳରେ ଡା. ରୀନା ପ୍ରଧାନଙ୍କ ଘର । ପିତା ଧରଣୀଧର ପ୍ରଧାନ ଲେ‘୍ରିପଡ଼ା ଏବିଡିଓ ଭାବେ ଅବସର ନେଇଥିଲାବେଳେ ମାଆ କଲ୍ୟାଣୀ ପ୍ରଧାନ ଜଣେ ଗୃହିଣୀ । ସାନଭାଇ ଆଶିଷ ବୁର୍ଲା ଭିସୁଟରେ ପ୍ରଥମ ବର୍ଷ ଏମଟେକ ଛାତ୍ର । ପିଲାବେଳୁ ମେଧାବୀ ରୀନା ଝାରସୁଗୁଡ଼ା ସରକାରୀ ଉଚ୍ଚ ବିଦ୍ୟାଳୟରୁ ଦଶମ ପାସ ପରେ ଝାରସୁଗୁଡ଼ା ମହିଳା ମହାବିଦ୍ୟାଳୟରୁ +୨ ବିଜ୍ଞାନ ପଢ଼ିଥିଲେ । ଏହାପରେ ଭିମସାର ବୁର୍ଲାରେ ଡାକ୍ତରୀ ପାଠ ପଢ଼ି ୨୦୧୬ରେ ଉତ୍ତୀର୍ଣ୍ଣ ହୋଇଥିଲେ । ଅଳ୍ପ କିଛି ମାସ ପାଇଁ ସେ ଦିଲ୍ଲୀରେ ସିଭିଲ୍ ସର୍ଭିସ୍ ପାଇଁ ପ୍ରସ୍ତୁତି କରିଥିଲେ ବି ଗତ ୩ ବର୍ଷ ହେଲା ଏଥିପାଇଁ ଅଧିକ ସମୟ ଦେଉଛନ୍ତି । ଏହା ତାଙ୍କର ତୃତୀୟ ଉଦ୍ୟମ ଥିଲାବେଳେ ଦ୍ୱିତୀୟଥର ପାଇଁ ସାକ୍ଷାତକାର ପର୍ଯ୍ୟାୟରେ ଅବତୀର୍ଣ୍ଣ ହୋଇଥିଲେ । ନିଜ ସଫଳତା ନେଇ ବେଶ ଖୁସି ରୀନା ଭଗବାନଙ୍କ ଆଶୀର୍ବାଦ ସହ ନିଜ ବାପା, ମାଆ, ସାନଭାଇ, ବନ୍ଧୁ ପରିଜନ ଓ ଶୁଭଚିନ୍ତକଙ୍କୁ ସଫଳତାର ଶ୍ରେୟ ଦେଇଛନ୍ତି । ଜଣେ ଡାକ୍ତର ଓ ମହିଳା ହୋଇଥିବା ଦୃ୍ଷ୍ଟିରୁ ପ୍ରଶାସନିକ ସେବାରେ ମହିଳାଙ୍କ ଉନ୍ନତି ପାଇଁ ଅଧିକ କାମ କରିବେ ବୋଲି କହିଛନ୍ତି । ବିଶେଷ କରି ମହିଳାଙ୍କ ସ୍ୱାସ୍ଥ୍ୟ, ଶିକ୍ଷା ଓ ସାମାଜିକ ସୁରକ୍ଷା ଦିଗରେ କାମ କରିବେ ବୋଲି ନିଜ ପ୍ରତିକ୍ରିୟାରେ କହିଛନ୍ତି ।
