ସତ୍ୟଶିଖା( ମାଲକାନଗିରି ) ୨୦.୦୮ .୨୦୨୧: ଶୁଭାରମ୍ଭ ହେଲା ବିଜୁ ସ୍ବାସ୍ଥ୍ୟ କଲ୍ୟାଣ ସ୍ମାର୍ଟ ହେଲଥ କାର୍ଡ ଯୋଜନା । ଆଜି ମାଲକାନଗିରି ଗସ୍ତରେ ଯାଇ ଯୋଜନାର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟରେ ପ୍ରଥମ ଜିଲ୍ଲା ଭାବରେ ଉପାନ୍ତ ମାଲକାନଗିରିରେ ସ୍ବାସ୍ଥ୍ୟ ସେବାର ଚିତ୍ର ବଦଳାଇବା ପାଇଁ ଲୋକଙ୍କୁ ସ୍ମାର୍ଟ ହେଲଥ କାର୍ଡ ବାଣ୍ଟିଛନ୍ତି ମୁଖ୍ୟମନ୍ତ୍ରୀ ।
ସ୍ଥାନୀୟ ସଂସ୍କୃତି ଭବନରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ସ୍ମାର୍ଟ ହେଲଥ କାର୍ଡ ବଣ୍ଟନ କରିଛନ୍ତି । ଜିଲ୍ଲାର ମୋଟ ୧ ଲକ୍ଷ ୫୫ ହଜାର ୮୨୩ ହିତାଧିକାରୀଙ୍କୁ ଏହି ହେଲଥ କାର୍ଡ ବଣ୍ଟନ କରାଯିବ । ଯୋଜନାର ଶୁଭାରମ୍ଭ କରି ନିଜେ ୧୫୦ ହିତାଧିକାରୀଙ୍କୁ କାର୍ଡ ବାଣ୍ଟିଛନ୍ତି ମୁଖ୍ୟମନ୍ତ୍ରୀ । ଏହି ଯୋଜନା ଅଧିନରେ ପୁରୁଷଙ୍କ ପାଇଁ ୫ ଲକ୍ଷ ଓ ମହିଳାଙ୍କ ପାଇଁ ୧୦ ଲକ୍ଷ ଟଙ୍କା ଯାଏ ବାର୍ଷିକ ସ୍ବାସ୍ଥ୍ୟ ବୀମା ମିଳିପାରିବ । କାର୍ଡରେ ୬୪ ଜିବିର ଡାଟା ବ୍ୟବସ୍ଥା ରହିଛି । ଯେଉଁଥିରେ ହିତାଧିକାରୀଙ୍କ ସମସ୍ତ ତଥ୍ୟ ରହିବ ।
ଯୋଜନା ବିଷୟରେ ଅଧିକ ସୂଚନା ଜାଣିବା ପାଇଁ କିମ୍ବା ନିଜର ତଥ୍ୟକୁ ପରିବର୍ତ୍ତନ ପାଇଁ ଜନସାଧାରଣ ସ୍ଥାନୀୟ ଜନସେବା କେନ୍ଦ୍ର ବା ସ୍ବାସ୍ଥ୍ୟ ବିଭାଗର ୧୦୪ ହେଲ୍ପ ଲାଇନର ସହାୟତା ନେଇପାରିବେ ।
ବିଜୁ ସ୍ବାସ୍ଥ୍ୟ କଲ୍ୟାଣ ସ୍ମାର୍ଟ ହେଲଥ କାର୍ଡ ଯୋଜନାର ପ୍ରଥମ ହିତାଧିକାରୀ ହେଲେ ବଣ୍ଡା ଜନଜାତିର ସୁକ୍ରି ଧାଙ୍ଗଡା । ଏହା ବ୍ୟତୀତ କୋୟା, ଭୂମିଆ, ବେଙ୍ଗଲୀ ଓ ସ୍ବାଭିମାନ ଅଞ୍ଚଳର ଲୋକଙ୍କୁ କାର୍ଡ ବଣ୍ଟନ କରିଛନ୍ତି ମୁଖ୍ୟମନ୍ତ୍ରୀ ।
