ଇସଲାମାବାଦ: କଶ୍ମୀରରେ ଭାରତ ସହ ଚ୍ଛାୟାଯୁଦ୍ଧ କରୁଥିବା ପାକିସ୍ତାନ ଏବେ ନୂଆ ଧରଣର ଯୁଦ୍ଧ ଆରମ୍ଭ କରିଛି। ଭାରତ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ବଦନାମ କରିବା ପାଇଁ ପାକିସ୍ତାନ ଗୁଇନ୍ଦା ବିଭାଗ ସାଇବର ଯୁଦ୍ଧ ଆରମ୍ଭ କରିଛି। ଏଥିପାଇଁ ସୋଶାଲ ମିଡିଆରେ ବିଭିନ୍ନ ଆକାଉଣ୍ଟ ଖୋଲି ଭାରତ ଓ ମୋଦିଙ୍କ ବିରୋଧରେ ମିଥ୍ୟା ପ୍ରଚାର କରାଯାଉଛି।
ଭାରତୀୟ ଗୁଇନ୍ଦା ବିଭାଗ ସରକାରଙ୍କୁ ଦେଇଥିବା ତଥ୍ୟ ଅନୁଯାୟୀ, ଲୋକଙ୍କ ମନରେ ଭାରତ ବିରୋଧୀ ଚିନ୍ତାଧାରା ସୃଷ୍ଟି କରିବା ପାଇଁ ପାକିସ୍ତାନ ସୋଶାଲ ମିଡିଆର ବ୍ୟବହାର କରୁଛି। ସୋଶାଲ ମିଡିଆରେ ଏଥିପାଇଁ ଲକ୍ଷଲକ୍ଷ ଭାରତ ବିରୋଧୀ ବୟାନ ସବୁ ପ୍ରଚାର କରାଯାଉଛି।
ଆହୁରି ପଢ଼ନ୍ତୁ
ବିଶେଷ କରି ଗଲ୍ଫ ଦେଶରେ ଏହି ସବୁ କାର୍ଯ୍ୟ କରାଯାଉଛି। ଭାରତରେ ଇସଲାମଫୋବିଆ ରହିଥିବା ମିଛରେ ଲୋକଙ୍କ ପାଖରେ ପହଞ୍ଚା ଯାଉଛି। ମଧ୍ୟପ୍ରାଚ୍ୟ ଦେଶ ସହ ସମ୍ପର୍କ ବୃଦ୍ଧି କରିବା ପାଇଁ ଭାରତ ସରକାର ବିପୁଳ ପୁଞ୍ଜି ନିବେଶ କରୁଛନ୍ତି। ଏହି ସମ୍ପର୍କରେ ଫାଟ ସୃଷ୍ଟି କରିବା ପାଇଁ ପାକିସ୍ତାନ ମୋଦିଙ୍କ ନାଁରେ ଅପପ୍ରଚାର କରୁଛି। ଭାରତ ବିରୋଧରେ ଅପପ୍ରଚାର କରି ପାକିସ୍ତାନ ବିଷ ମଞ୍ଜି ବୁଣିବାକୁ ଚେଷ୍ଟା କରୁଥିବା ଗୁଇନ୍ଦା ବିଭାଗ ଜାଣିବାକୁ ପାଇଛି।
ସୋଶାଲ ମିଡିଆରେ ଭାରତ ବିରୋଧରେ ପ୍ରଚାର କରିବା ଏହା ପ୍ରଥମ ଘଟଣା ନୁହେଁ। ଏହାପୂର୍ବରୁ ମଧ୍ୟ ଜମ୍ମୁ-କଶ୍ମୀରରେ ଲକଡାଉନ ବେଳେ ପାକିସ୍ତାନ ଭାରତ ସରକାରଙ୍କ ବିରୋଧରେ ସ୍ଥାନୀୟ ଲୋକଙ୍କୁ ଉସୁକାଇବାକୁ ଚେଷ୍ଟା କରିଥିଲା।
