ଡେସ୍କଟପରେ କରିପାରିବେ ଭଏସ୍ ଓ ଭିଡିଓ କଲ୍


ସତ୍ୟଶିଖା (ନୂଆଦିଲ୍ଲୀ) ୧୯.୧୨.୨୦୨୦ : ଫେସବୁକ୍ ମାଲିକାନା କମ୍ପାନୀ ହ୍ୱାଟ୍ସଆପ୍ ଖୁବ ଶୀଘ୍ର ଡେସ୍କଟପ ପାଇଁ ଭଏସ ଓ ଭିଡିଓ କଲିଂ ଫିଚର ଲଞ୍ଚ କରିପାରେ । କମ୍ପାନୀ ବହୁ ଦିନ ହେଲା ଏହି ଫିଚର୍ସର ଟେଷ୍ଟିଙ୍ଗ କରୁଛି । କମ୍ପାନୀ ଖୁବ ଶୀଘ୍ର ୟୁଜର୍ସଙ୍କ ପାଇଁ ଏହି ଫିଚର୍ ରୋଲଆଉଟ୍ କରିପାରେ । WABetaInfo ରିପୋର୍ଟ ଅନୁଯାୟୀ, ହ୍ୱାଟ୍ସଆପର ଭଏସ୍ ଓ ଭିଡିଓ କଲିଂ ଫିଚର୍ ବର୍ତ୍ତମାନ ବିଟାରେ ଉପଲବ୍ଧ ଯେଉଁଠାରେ ଏହାର ଟେଷ୍ଟିଙ୍ଗ୍ କରାଯାଉଛି ।
ହ୍ୱାଟ୍ସଆପର ଡେସ୍କଟପ୍ ଭଏସ୍ ଓ କଲିଂ ଫିଚର୍ ଲଞ୍ଚ୍ ହେବାପରେ ଏହାର ମୁକାବିଲା ସିଧା ସଳଖ ଜୁମ୍, ଗୁଗଲ୍ ମିଟ୍ ଓ ମାଇକ୍ରୋସଫ୍ଟ ଟିମ୍ସ ଆପ୍ ସହ ହେବ । ବିଶେଷଜ୍ଞଙ୍କ କହିବାନୁଯାୟୀ, ଏହି ଫିଚର୍ ଆସିବାପରେ ହ୍ୱାଟ୍ସଆପ୍ ବାକି ସବୁ ଆପକୁ ପଛରେ ପକାଇଦେବ । କାରଣ ହ୍ୱାଟ୍ସଆପରେ ଭିଡିଓ କିମ୍ବା ଅଡିଓ କଲ୍ ପାଇଁ ଅନ୍ୟ କୌଣସି ଆପ୍ ଖୋଲିବାର ଆବଶ୍ୟକତା ପଡିବ ନାହିଁ । ଅପରପକ୍ଷରେ ଭଏସ୍ ଏବଂ ଭିଡିଓ କଲ୍ ପାଇଁ ଜୁମ୍, ଗୁଗୁଲ୍ ମିଟ୍ ଏବଂ ମାଇକ୍ରୋସଫ୍ଟ ଆପଗୁଡିକ ବାରମ୍ବାର ଖୋଲିବାକୁ ପଡିଥାଏ ।
ଏହି ଫିଚର୍ସ ରୋଲଆଉଟ୍ ହେବାପରେ ଆପଣ ଡେସ୍କଟପରେ ହ୍ୱାଟ୍ସଆପ୍ ଖୋଲିଲେ ଆପଣମାନଙ୍କୁ ଏକ ୱିଣ୍ଡୋ ପପ୍ ଅପ୍ ଦେଖାଯିବ । କଲ୍ କରିବାକୁ ୟୁଜର୍ସଙ୍କୁ ଚାଟ୍ ଓପନ୍ କରି ଡାହାଣ ପଟେ ଉପରକୁ ଥିବା ଭଏସ୍ କିମ୍ବା ଭିଡିଓ କଲ୍ ଅପ୍ସନ୍ ଚୟନ କରିବାକୁ ହେବ । ମୋବାଇଲ ଆପରେ ଯେଉଁଭଳି ଭଏସ୍ ଓ ଭିଡିଓ କଲ୍ କରାଯାଏ ଏହା ଠିକ୍ ସେହିଭଳି । ବହୁ ଦିନ ହେଲା ହ୍ୱାଟ୍ସଆପରେ ଭଏସ୍ ଓ ଭିଡିଓ କଲ୍ ସୁବିଧା ଦାବି କରୁଛନ୍ତି ୟୁଜର୍ସ ।