ସତ୍ୟଶିଖା( ଭୁବନେଶ୍ୱର )୨୫.୦୭ . ୨୦୨୨: ରାଜ୍ୟର ଗୋଟିଏରୁ ଦୁଇଟି ଅଞ୍ଚଳରେ ପ୍ରବଳ ବର୍ଷା ହୋଇଛି। ବିଶେଷ କରି ଖୋର୍ଦ୍ଧା ଜିଲାର ଟାଙ୍ଗିରେ ସର୍ବାଧିକ ୧୧୫ ମିମି ଓ ସମ୍ବଲପୁର ଜିଲାର ଯୁଯୁମରାରେ ୧୧୦ ମିମି ବର୍ଷା ରେକର୍ଡ ହୋଇଛି। ରବିବାର ଯାଜପୁରରେ ୪୧ ମିମି ଏବଂ ମାଲକାନଗିରିରେ ୧୮ମିମି ହୋଇଥିବା ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ଆସନ୍ତା ୨୪ ଘଣ୍ଟା ମଧ୍ୟରେ ପ୍ରାୟ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ସତର୍କ ରହିବା ପାଇଁ ବିଭାଗ ପକ୍ଷରୁ ସୂଚନା ଦିଆଯାଇଛି। ମଙ୍ଗଳବାରଠାରୁ ବର୍ଷାର ପରିମାଣ ହ୍ରାସ ପାଇବାର ଆଶଙ୍କା ରହିଛି। ଗତ ୨୪ ଘଣ୍ଟାରେ ସୋହେଲାରେ ୯୮ ମିମି, ରାଜଘାଟ ୭୫.୮ ମିମି, ବରଗଡ ୬୬.୮ ମିମି, ବରପାଲି ୬୫ ମିମି, ବିଜେପୁର ୬୩ ମିମି, ଜୟପୁର ୫୯.୪ ମିମି, ଆର.ଗୁଡା ୫୭.୨ ମିମି, ଡୁଙ୍ଗୁରିପାଲି ୫୪ ମିମି ବର୍ଷା ହୋଇଛି। ଆଜି ବାଲେଶ୍ବର, କଟକ, ଭୁବନେଶ୍ବର, ପାରାଦ୍ବୀପ, ଚାନ୍ଦବାଲି, କୋରାପୁଟ, ଫୁଲବାଣୀ, ଟିଟିଲାଗଡ, ଦାରିଙ୍ଗବାଡି ଏବଂ ନୟାଗଡ ଆଦି ଅଞ୍ଚଳରେ ହାଲୁକାରୁ ମଧ୍ୟମ ଧରଣ ବର୍ଷା ହୋଇଥିବା ବିଭାଗ ପକ୍ଷରୁ କୁହାଯାଇଛି। ଆଗାମୀ ୨୪ ଘଣ୍ଟାରେ ନୂଆପଡା, ବଲାଙ୍ଗୀର, କଳାହାଣ୍ଡି, କନ୍ଧମାଳ, ଗଞ୍ଜାମ, ଗଜପତି, ରାୟଗଡା, ନବରଙ୍ଗପୁର, କୋରାପୁଟ ଏବଂ ମାଲକାନଗିରି ପରି ୧୦ ଜିଲାର କିଛି ଅଞ୍ଚଳରେ ପ୍ରବଳ ବର୍ଷା ହୋଇପାରେ। ଉପରୋକ୍ତ ଜିଲାଗୁଡିକୁ ପାଣିପାଗ ବିଭାଗ ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।
