ସତ୍ୟଶିଖା (ଭୁବନେଶ୍ୱର) ୧୩/୧୧/୨୦୨୦ : ବଢିବ ଶୀତ । ଆଜିଠୁ ପାଗ ଫିଟିବ । ଦୂରେଇଯିବ ମେଘୁଆ ବାଦଲ । ମେଘମୁକ୍ତ ଆକାଶ ହେବ ଓ ଖରା ହେବ। ଏପରିକି ଆଜି ରାତିରୁ ପୁଣି ପାରଦ ଖସିବା ସହ ଧୀରେ ଧୀରେ ଥଣ୍ଡା ବଢ଼ିବ। ରାତିର ତାପମାତ୍ରା ୩-୪ ଡିଗ୍ରୀ ସେଲସିୟସ୍ ଖସିପାରେ । ଏଭଳି ପୂର୍ବାନୁମାନ କରିଛି ପାଣିପାଗ ବିଭାଗ । ଗତ ଦୁଇଦିନ ହେବ ପାଗ ମେଘୁଆ ଥିବାରୁ ରାତି ତାପମାତ୍ରା ବଢ଼ିଥିଲା । ଫଳରେ ଥଣ୍ଡା ପ୍ରକୋପ କମିଥିଲା । ଏବେ କିନ୍ତୁ ପାଗ ପୁଣି ବଦଳିବ ।
ଆଜି ଠାରୁ ରାଜ୍ୟରେ ପାଗ ଶୁଖିଲା ରହିବ । ବର୍ଷା ସମ୍ଭାବନା ଏବେ ନାହିଁ । ବୁଧବାର ରାତିରେ ୧୫ ଡିଗ୍ରୀ ସେଲସିୟସ୍ ତଳେ କୌଣସି ସହର ନଥିଲା । ଗୁରୁବାର ଦିନ କିଛି ସ୍ଥାନରେ ତାପମାତ୍ରା ପ୍ରାୟତଃ ୩୦ ଡିଗ୍ରୀ ଉପରେ ଥିଲା । କେତେକ ସ୍ଥାନରେ ପାଗ ଆଂଶିକ ମେଘୁଆ ଥିଲା । ଦିନରେ ଗୋପାଳପୁରରେ ୧୦ ମିଲିମିଟର ବର୍ଷା ହୋଇଥିବାବେଳେ ଛତ୍ରପୁର ୭ ମିମି, ପାରଳାଖେମୁଣ୍ଡି ୬.୬ ମିମି, ଦାରିଙ୍ଗିବାଡ଼ିରେ ୨ ମିମି ବର୍ଷା ହୋଇଥିଲା । ତେଣୁ ରାତିରେ ବିଶେଷ ଥଣ୍ଡା ନଥିଲା ।
