ଶୀତର ପ୍ରକୋପ ରାଜ୍ୟରେ ବଢୁଛି : କନ୍ଧମାଳରେ ୧୫ଡିଗ୍ରୀ ଖସିଲା !

ସତ୍ୟଶିଖା (ଭୁବନେଶ୍ୱର) ୨୯/୧୦/୨୦୨୦ : ମୌସୁମୀ ଫେରିଯିବା ପରେ ରାଜ୍ୟରେ ବଢ଼ିଛି ଶୀତର ପ୍ରକୋପ । ଫୁଲବାଣୀ ସହର ସମେତ କନ୍ଧମାଳ ଜିଲ୍ଲାର ଦାରିଙ୍ଗବାଡ଼ି, ବେଲଘର, ରାଇକିଆ, ଜି. ଉଦୟଗିରି  ଆଦି ଅଞ୍ଚଳରେ କୁହୁଡ଼ି ସାଙ୍ଗକୁ ଥଣ୍ଡା  ଅନୁଭୂତ ହୋଇଛି । ସେହିପରି ଗତକାଲି ଫୁଲବାଣୀରେ ତାପମାତ୍ରା୧୫ ଡିଗ୍ରୀ ସେଲସିୟସକୁ ଖସିଆସିଥିଲା ।  ଲା-ନିନା ପ୍ରଭାବରେ ଶୀତର ପ୍ରକୋପ ଏବର୍ଷ  ଅଧିକ ରହିବ ବୋଲି ପାଣିପାଗ ବିଶେଷଜ୍ଞ ଆକଳନ କରିଛନ୍ତି । ଏବେ ସାରା ରାଜ୍ୟରେ ପାଗ ଶୁଖିଲା ରହିବ । ୧ ତାରିଖରେ ଉତ୍ତର ଓଡ଼ିଶାର କେତୋଟି ଜିଲ୍ଲାରେ ଘଡ଼ଘଡ଼ି ସହ ବର୍ଷା ହେବାର ସମ୍ଭାବନା ରହିଛି ।ସେପଟେ ଗତକାଲି ସାରା ଓଡ଼ିଶାରୁ ମୌସୁମୀ ପ୍ରତ୍ୟାବର୍ତ୍ତନ କରିଥିବା ନେଇ ପାଣିପାଗ ବିଭାଗ ପକ୍ଷରୁ ଘୋଷଣା କରାଯାଇଛି । ଏବର୍ଷ ରାଜ୍ୟରେ ମୋଟ୍ ୧୧ଟି ଲଘୁଚାପ ହୋଇଛି । ଜୁନ୍ ୧ରୁ ସେପ୍ଟେମ୍ବର ୩୦ ମଧ୍ୟରେ ୮ଟି, କେବଳ ଅକ୍ଟୋବରରେ ହୋଇଛି ୩ଟି ଲଘୁଚାପ । ତେବେ ଜୁନ୍ ପହିଲାରୁ ସେପ୍ଟେମ୍ବର ୩୦ ମଧ୍ୟରେ ରାଜ୍ୟରେ ୧୧୩୧ ଦଶମିକ ୮ ମିଲିମିଟର ବର୍ଷା ରେକର୍ଡ କରାଯାଇଛି, ଯାହା ହାରାହାରି ଠାରୁ ଏକ ପ୍ରତିଶତ କମ୍ । ମାଲକାନଗିରି ଓ ଝାରୁସୁଗୁଡାରେ ବର୍ଷାର ପରିମାଣ ସର୍ବାଧିକ ଥିଲା । ବାଲେଶ୍ବର, ଯାଜପୁର, ପୁରୀ, ଖୋର୍ଦ୍ଧା ଓ ଯାଜପୁରରେ ନିଅଣ୍ଟିଆ ବର୍ଷା ହୋଇଛି ।