ସତ୍ୟଶିଖା(ଭୁବନେଶ୍ୱର )୨୩.୧୦ .୨୦୨୧: କଳାହାଣ୍ଡି ଜିଲ୍ଲା ମହାଲିଙ୍ଗ ସନସାଇନ ପବ୍ଲିକ ସ୍କୁଲର ଶିକ୍ଷୟିତ୍ରୀ ମମିତା ମେହେର ହତ୍ୟାକାଣ୍ଡ ଘଟଣାକୁ ନେଇ ଏବେ ସାରା ରାଜ୍ୟ ଉଠୁଛି ପଡ଼ୁଛି । ଏହି ଘଟଣାରେ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁ ଓ ତାର ସହଯୋଗୀ ରାଧେକୁ ଗିରଫ କରାଯାଇଥିବାବେଳେ ଏଥିରେ ସମ୍ପୃକ୍ତି ଅଭିଯୋଗରେ ଗୃହରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବି ହୋଇଆସୁଛି । ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବି ନେଇ ଗତ କିଛି ଦିନ ହେଲା ବିରୋଧୀ ତୁମ୍ଭିତୋଫାନ କରିଆସୁଛନ୍ତି ।
ଏହାରି ଭିତରେ କଂଗ୍ରେସ ନେତା ସତ୍ୟପ୍ରକାଶ ନାୟକ ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି । ଏହି ମାମଲାରେ ଗୃହରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ଭୂମିକାକୁ ନେଇ ଶ୍ରୀ ନାୟକ ପ୍ରଶ୍ନ ଉଠାଇଛନ୍ତି । ଦିବ୍ୟଶଙ୍କରଙ୍କୁ ମୁଖ୍ୟମନ୍ତ୍ରୀ ସୁରକ୍ଷା ଦେଉଛନ୍ତି ବୋଲି ସେ ଅଭିଯୋଗ କରିଛନ୍ତି । ଏପରିକି ଦିବ୍ୟଶଙ୍କରଙ୍କୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦ୍ୱନ୍ଦ୍ୱରେ ରହିଛନ୍ତି । ଏଥିପାଇଁ ଶୁକ୍ରବାର ମୟୂରଭଞ୍ଜରେ ଅନୁଷ୍ଠିତ ସ୍ୱାସ୍ଥ୍ୟକାର୍ଡ ବଣ୍ଟନ ବେଳେ ମଞ୍ଚରେ ତାଙ୍କ ପାଖରେ ଦିବ୍ୟଶଙ୍କରଙ୍କୁ ବସିବାକୁ ଦେଇନାହାନ୍ତି । ଦ୍ୱନ୍ଦ୍ୱ ଯୋଗୁଁ ବାରିପଦା ଗସ୍ତବେଳେ ମୁଖ୍ୟମନ୍ତ୍ରୀ ଗୃହରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ସାଥିରେ ନେଇନାହାନ୍ତି ବୋଲି ଶ୍ରୀ ନାୟକ କହିଛନ୍ତି ।
ପ୍ରକାଶ ଯେ, ନବୀନଙ୍କ ମୟୂରଭଂଜ ଗସ୍ତର ଶେଷ ମୁହୂର୍ତରେ ଅତିଥି ତାଲିକାରୁ ବାଦ୍ ପଡ଼ିଥିଲା ଦିବ୍ୟଶଙ୍କରଙ୍କ ନାଁ । ମନ୍ତ୍ରୀ ଦିବ୍ୟଶଙ୍କର ମିଶ୍ର ମଂଚ ଉପରେ ବସିବା ପାଇଁ ସ୍ଥିର ହୋଇଥିଲା । ସେ ୪ ମିନିଟ୍ ଭାଷଣ ବି ଦେଇଥାନ୍ତେ । ହେଲେ ପ୍ରସ୍ତୁତ ହୋଇଥିବା ଚୂଡାନ୍ତ କାର୍ୟ୍ୟସୂଚୀରୁ ତାଙ୍କୁ ବାଦ୍ ଦିଆଯାଇଥିଲା । କେବଳ ସେତିକି ନୁହଁ, ମୟୂରଭଂଜ ଜିଲ୍ଲାର ବିଭିନ୍ନ ବ୍ଲକରେ ସ୍ମାର୍ଟ ହେଲଥ୍ କାର୍ଡ ବାଂଟିବା ପାଇଁ ଯେଉଁ ତାଲିକା ହୋଇଥିଲା, ସେଥିରୁ ମଧ୍ୟ ତାଙ୍କ ନାଁ ବାଦ୍ ଦିଆଯାଇଛି । ଏଥରୁ ଜଣାପଡ଼ୁଛି ଯେ, ମୁଖ୍ୟମନ୍ତ୍ରୀ ଘଟଣାକୁ ଗମ୍ଭୀରତାର ସହ ନେଇଛନ୍ତି ଓ ତାଙ୍କଠାରୁ ଦୂରେଇ ରଖିଛନ୍ତି ।
