ନୂଆଦିଲ୍ଲୀ: ସାରା ଦେଶ ଏବେ ଲକ୍ଡାଉନ୍। ୨୧ ଦିନିଆ ଲକ୍ଡାଉନ୍ ଦେଶର ଅର୍ଥନୀତି ଉପରେ ଖରାପ ପ୍ରବାହ ପକାଉଛି। ଲୋକଙ୍କୁ ଆଶ୍ୱାସନା ଦେବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଘୋଷଣା କରୁଛନ୍ତି। ଏଥିରେ ଆରବିଆଇ ମଧ୍ୟ ସାମିଲ୍ ହୋଇଛି। ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଆଜି ଏ ନେଇ ଘୋଷଣା କରିଛନ୍ତି।
ସେ କହିଛନ୍ତି ଦେଶର ଅର୍ଥନୀତିକ ସ୍ଥିତିକୁ ଦେଖି ଆରବିଆଇ ରେପୋ ରେଟ୍ କମାଇବାକୁ ନିଷ୍ପତ୍ତି ନେଇଛି। ଏହାଦ୍ୱାରା ଦେଶବାସୀ ଋଣ ବୋଝରୁ ଆଶ୍ୱସ୍ତ ହେବେ। ରେପୋ ରେଟକୁ ୦.୭୫ ପ୍ରତିଶତ କମାଇ ୪.୪୫ ପ୍ରତିଶତ କରିଛନ୍ତି। ଏହା ଦ୍ୱାରା ବ୍ୟାଙ୍କ ଏବଂ ସାଧାରଣ ଲୋକ ମାନେ ଋଣ ଉପରେ କମ୍ ସୁଧ ଦେବେ। ରୋପୋ ରେଟ୍ କମିବା ପରେ ବ୍ୟାଙ୍କମାନେ ମଧ୍ୟ ଇଏମଆଇ ହ୍ରାସ କରିବେ। ପୂର୍ବରୁ ମଧ୍ୟ ଆରବିଆଇ ସମୟ ସମୟରେ ରେପୋ ରେଟ୍ କମାଇଛି। ହେଲେ ୦.୭୫ ପ୍ରତିଶତ ରେପୋ ରେଟ୍ କମାଇବା ସର୍ବାଧିକ ବୋଲି ଜଣାପଡ଼ିଛି।
ଆହୁରି ପଢ଼ନ୍ତୁ
ଏହା ସହିତ ଆରବିଆଇ ରିଭର୍ସ ରେପୋ ରେଟକୁ ୯୦ ବେସିସ ପଏଣ୍ଟ କମାଇ ୪ ପ୍ରତିଶତ କରିଛି। ରେପୋ ରେଟ୍ କମିବା ପରେ ଘର, କାର୍ କିମ୍ବା ଅନ୍ୟାନ୍ୟ ଋଣ ନେଉଥିବା ବ୍ୟାଙ୍କ ଗ୍ରାହକମାନେ କମ୍ ସୁଧ ଦେବେ।
ସୂଚନାଯୋଗ୍ୟ, ପୂର୍ବରୁ ଆରବିଆଇ ଦୁଇଥର ମୁଦ୍ରାସ୍ଫୀତି ସମୀକ୍ଷା କରିଥିଲା। ହେଲେ ରପୋ ରେଟକୁ ଅପରିବର୍ତ୍ତିତ ରଖିଥିଲା। ଦେଶର ଅଭିବୃଦ୍ଧି ହାର ଏବେ ୪ ପ୍ରତିଶତ ରହିଛି।
