ସତ୍ୟଶିଖା (ଭୁବନେଶ୍ୱର) ୦୯,୧୧,୨୦୨୩ : ବୃଦ୍ଧ,ବୃଦ୍ଧା ଓ ଅସହାୟ ଲୋକମାନଙ୍କୁ ସହଯୋଗର ହାତ ବଢାଇ ସରକାର ବାର୍ଦ୍ଧକ୍ୟ ଭତ୍ତା ଯୋଜନା ପ୍ରଣୟନ କରିଛନ୍ତି । ଏହି ଯୋଜନା ଯୋଗୁଁ ଅନେକଙ୍କ ମୁହଁରେ ହସଫୁଟିବା ସହ ସେମାନଙ୍କୁ ବଂଚିବାର ରାହା ମିଳୁଛି । କିନ୍ତୁ ଏପରି କିଛି ମହିଳା ଅଛନ୍ତି ଯାହାଙ୍କୁ ଗତ କିଛି ମାସ ହେଲା ଭତ୍ତା ଟଙ୍କା ମିଳିନାହିଁ। ସେହିପରି ଜଣେ ମହିଳା ହେଉଛନ୍ତି ବାଲିଆପାଳ ବ୍ଲକ ଅସ୍ତି ପଂଚାୟତ ପାରୁଳିଆ ଗ୍ରାମର ପାର୍ବତୀ ପ୍ରଧାନ । ତାଙ୍କ ପାଖରେ ନା ତାଙ୍କ ସ୍ବାମୀ ଅଛନ୍ତି ନା କୈାଣସି ପିଲାପିଲି । ସେ ଏକା ହିଁ ଜୀବନ ଅତିବାହିତ କରୁଛନ୍ତି। ଦୀର୍ଘ ଦିନ ହେବ ହୃଦରୋଗରେ ଆକ୍ରାନ୍ତ ହୋଇ ସେ ଶଯ୍ୟାଶାୟୀ ଅଛନ୍ତି । ତାଙ୍କୁ ମିଳୁଥିବା ଇନ୍ଦିରାଗାନ୍ଧୀ ବାର୍ଦ୍ଧକ୍ୟ ଭତ୍ତା ଟଙ୍କା ହିଁ ତାଙ୍କର ଔଷଧ ଖର୍ଚ୍ଚର ବଡ ମାଧ୍ୟମ ଥିଲା । ପ୍ରଥମେ ତାଙ୍କୁ ୭୦୦ ଟଙ୍କା ଭତ୍ତା ମିଳୁଥିଲା । ପରେ ତାଙ୍କ ବ୍ୟାଙ୍କ ଖାତାକୁ ୨୦୨୨ ମସିହାଠାରୁ ୨୦୨୩ ମସିହା ଜାନୁଆରୀ ମାସ ପର୍ଯ୍ୟନ୍ତ ୫୦୦ ଟଙ୍କା ଆସିଥିଲା । ଆଉ ତା ପରଠାରୁ ତାଙ୍କ ଖାତାକୁ ଭତ୍ତା ଟଙ୍କା ଆସୁନାହିଁ କିମ୍ବା ଅଫଲାଇନରେ ମଧ୍ୟ ଦିଆଯାଉ ନାହିଁ । ଭତ୍ତା ଟଙ୍କା ପାଇଁ ପାର୍ବତୀ ବହୁ ଲୋକଙ୍କୁ ଗୁହାରୀ କରିଥିଲେ ମଧ୍ୟ କେହି ତାଙ୍କ ଗୁହାରୀ ଶୁଣୁନାହାନ୍ତି।
ବାଲିଆପାଳ ବ୍ଲକରେ ଏହି ଭଳି ୬୭ ଜଣ ଇନ୍ଦିରା ଗାନ୍ଧୀ ଭତ୍ତା ହିତାଧିକାରୀ ଫେବୃଆରୀ ମାସଠାରୁ ଭତ୍ତା ଟଙ୍କା ନ ପାଇ ବ୍ଲକ କାର୍ଯ୍ୟାଳୟକୁ ଦୈାଡି ଦୈାଡି ନୟାନ୍ତ ହେଲେଣି । ଅସହାୟ ବୃଦ୍ଧବୃଦ୍ଧାଙ୍କୁ ତାଙ୍କ ଘରେ ଭତ୍ତା ଦେବାର ସରକାରୀ ନିୟମ ଥିଲାବେଳେ ବାଲିଆପାଳ ବ୍ଲକରେ ସବୁ ନିୟମ ଚୁଲି ମୁଣ୍ଡରେ ପଡିଛି । ସେହିପରି କୁମ୍ବlରୀ ବାସନ୍ତୀ ଜେନା ମଧ୍ୟ 6 ମାସର ବିଧବା ଭତ୍ତା ପାଇ ନାହାନ୍ତି ବୋଲି ପୁଅ ସନ୍ତୋଷ ଜେନା ଅଭିଯୋଗ କରିଛନ୍ତି। ଏ ସଂପର୍କରେ ବାଲିଆପାଳବ୍ଲକ ଭତ୍ତା ଦାୟିତ୍ୱରେ ଥିବା ସାମାଜିକ ସୁରକ୍ଷା ଅଧିକାରୀ ଶର୍ମିଷ୍ଠା ପାତ୍ରଙ୍କୁ ପଚାରିବାରୁ ଆଧାର ଅପଡେଟ ହୋଇନଥିବାରୁ ଏଭଳି ସମସ୍ୟା ଉପୁଜିଛି ବୋଲି କହିଥିଲେ । ମାତ୍ର ସେ କ୍ୟାମେରା ଆଗରେ କିଛି କହିପାରିବେ ନାହିଁ ବୋଲି ମନା କରିଥିଲେ।
ରାଜ୍ୟ ସରକାର ଗରିବ ଲୋକଙ୍କ ଦୁଃଖ ସୁଖରେ ସାଥି ବୋଲି ସବୁଆଡେ ଚର୍ଚ୍ଚା। ହେଲେ ବାସ୍ତବରେ ଗରିବ ଲୋକଙ୍କ ଦୁଃଖ ଯଦି ସରକାର ବୁଝନ୍ତେ ତାହାଲେ ଏ ବୁଢି ମାଉସୀର ଦୁଃଖ ଆଜି ଦେଖିବାକୁ ମିଳିନଥାନ୍ତା। ଏ ବାବଦରେ ବାଲିଆପାଳ ବ୍ଲକ ବିଡିଓ କହିଛନ୍ତି 10 ଦିନ ଭିତରେ ସମସ୍ୟା ସମାଧାନ କରାଯିବ।
