ସତ୍ୟଶିଖା(ଭୁବନେଶ୍ୱର) ୧୧.୧୨.୨୦୨୧: ବିବାହ ହେଉ କି ବ୍ରତଘର, ସମାରୋହ ହେଉ ଅବା ସମ୍ମିଳନୀ, ଯେଉଁ ସବୁ ସାମାଜିକ ଓ ସାଂସ୍କୃତିକ କାମ ପାଇଁ ବିଏମସିରୁ ଅନୁମତି ନେବାକୁ ପଡ଼ୁଥିଲା, ତାହା ଏବେ ଅନଲାଇନରେ ମିଳିବ । ଲୋକଙ୍କୁ ଆଉ ବିଏମସି ଅଫିସ ଦଉଡ଼ିବାକୁ ପଡ଼ିବ ନାହିଁ କିମ୍ବା କାଗଜକଲମରେ ଦରଖାସ୍ତ ଲେଖିବାକୁ ପଡ଼ିବ ନାହିଁ । ଅନଲାଇନରେ ଫର୍ମ ପୂରଣ କରିଦେଲେ ଅନଲାଇନରେ ହିଁ ଅନୁମତିପତ୍ର ମିଳିଯିବ ।
ଭୁବନେଶ୍ୱର ସ୍ମାର୍ଟସିଟି ଲିମିଟେଡ (ବିଏସସିଏଲ) ଏଭଳି ଏକ ଅନଲାଇନ୍ ବ୍ୟବସ୍ଥା ତିଆରି କରିଛି । ଯେଉଁଥିରୁ ସ୍ମାର୍ଟଫୋନ ଜରିଆରେ ଅନଲାଇନ୍ ଅନୁମତି ପାଇ ହେବ ବୋଲି ବିଏମସି ପକ୍ଷରୁ କୁହାଯାଇଛି । ସୂଚନାଯୋଗ୍ୟ, ଦୁଇ ଦିନ ତଳେ ବିଏମସି ନିୟନ୍ତ୍ରଣରେ ଥିବା ସମସ୍ତ କଲ୍ୟାଣ ମଣ୍ଡପଗୁଡ଼ିକୁ ବୁକିଂ କରିବାକୁ ଏଭଳି ଅନଲାଇନ ବ୍ୟବସ୍ଥା କରାଯାଇଛି । ଅନଲାଇନରେ ବୁକିଂ କରିବାକୁ ହେଲେ ଇଣ୍ଟରନେଟରେ ‘ଭୁବନେଶ୍ୱର ଡଟ୍ ମି’କୁ ଯାଇ ପଞ୍ଜୀକରଣ କରିବାକୁ ପଡ଼ିବ । ଏଥିରେ ସମସ୍ତ ବିବରଣୀ ଦାଖଲ କରିବା ପରେ ଅନଲାଇନରେ ନିର୍ଦ୍ଧିଷ୍ଟ ଅଧିକାରୀଙ୍କ ଦ୍ୱାରା ଏହି ଆବେଦନପତ୍ରକୁ ଯାଞ୍ଚ କରାଯିବ । ତାହା ଅନୁମତି ପାଇବା ପାଇଁ ଯୋଗ୍ୟ ବିବେଚିତ ହେଲେ, ଅନୁମୋଦନ କରାଯିବ ।
ଅନୁମୋଦିତ ହେବା ପରେ ଇ-ମେଲ ଓ ମୋବାଇଲ ନମ୍ବର ଜରିଆରେ ଆବେଦନକାରୀକୁ ଅବଗତ କରାଯିବ । ଆବେଦନକାରୀ ଏହାକୁ ଡାଉନଲୋଡ କରି ବ୍ୟବହାର କରିପାରିବେ । ଏ ସଂପର୍କରେ ବିଏସସିଏଲ ପରିଚାଳନା ନିଦେ୍ର୍ଧଶକ ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ସଞ୍ଜୟ ସିଂ କହିଛନ୍ତି, ଆଧୁନିକ ଜ୍ଞାନକୌଶଳ ସହାୟତାରେ ଭୁବନେଶ୍ୱର ବାସିନ୍ଦାଙ୍କୁ ଅନଲାଇନରେ ସେବା ଯୋଗାଇଦେବା ପାଇଁ ଉଦ୍ୟମ ହେଉଛି । ଅନଲାଇନ ଫଳରେ ବ୍ୟବସ୍ଥାରେ ସ୍ୱଚ୍ଛତା ରହିବା ସହ ନାଗରିକମାନେ ଅଫିସ ଦଉଡ଼ିବେ ନାହିଁ । ଏବେ ପାଖାପାଖି ଶହେ ପ୍ରକାରର ସେବା ଅନଲାଇନରେ ଉପଲବ୍ଧ ହେଉଛି । ଆଗକୁ ମଧ୍ୟ ଏଭଳି ସମସ୍ତ ସେବାକୁ ଅନଲାଇନରେ କରିବାକୁ ଯେଜାନା ରହିଛି ।
ବିଏସସିଏଲର ଜେନେରାଲ ମ୍ୟାନେଜର କମଲଜିତ ଦାସ କହିଛନ୍ତି, ସ୍ମାର୍ଟ ସିଟିର ଥିବା ଇଣ୍ଟିଗ୍ରେଟେଡ୍ ଇଣ୍ଟରଫେସ୍ ଜରିଆରେ ଅନଲାଇନ୍ ଆବେଦନପତ୍ର ଗ୍ରହଣ କରାଯିବା ସହ ଅନୁମତି ଦିଆଯିବ । ଏଥିପାଇଁ ପ୍ରିଣ୍ଟଆଉଟ କିମ୍ବା ଦସ୍ତଖତର ଆବଶ୍ୟକତା ପଡ଼ିବ ନାହିଁ । ପୂର୍ବରୁ କୌଣସି କାର୍ଯ୍ୟକ୍ରମ ପାଇଁ ଅନୁମତି ନେବାକୁ ହେଲେ ଅଫିସ ଦଉଡ଼ିବାକୁ ପଡ଼ୁଥିଲା । ଅନୁମତି ପାଇବାକୁ ବିଳମ୍ବ ହେଉଥିଲା । ହେଲେ ଅନଲାଇନ ଜରିଆରେ କେଉଁ ଆବେଦନ କେତେଦିନ ପଡ଼ି ରହିଲା, ତାହା ଉଚ୍ଚପଦସ୍ଥ ଅଧିକାରୀ ଜାଣିପାରିବେ । ଏଣୁ ଆବେଦନପତ୍ରକୁ ଜାଣି ଜାଣି ପକାଇ ରଖିବା ସମ୍ଭବ ହେବ ନାହିଁ ।
