ସତ୍ୟଶିଖା(ନୂଆଦିଲ୍ଲୀ ) ୦୬.୦୮ .୨୦୨୧: କେରଳ ହାଇକୋର୍ଟ ଦୁଷ୍କର୍ମର ପରିଭାଷାକୁ ନେଇ ଏକ ରାୟରେ କହିଛନ୍ତି, କୌଣସି ମହିଳାଙ୍କୁ ଦୁଷ୍କର୍ମ ପ୍ରୟାସ ସମୟରେ ତାଙ୍କର ଜଂଘକୁ ବି ଯଦି ସ୍ପର୍ଶ କରାଯାଇଥିବ ତା’ହେଲେ ବି ଏହା ଦୁଷ୍କର୍ମ ଭାବେ ଗ୍ରହଣ ହେବ । ଯୌନ ଶୋଷଣ ସମ୍ପର୍କିତ ଏକ ମାମଲାର ରାୟ ଦେବାକୁ ଯାଇ କେରଳ ହାଇକୋର୍ଟର ଖଣ୍ଡପୀଠ ଏକଥା କହିଛନ୍ତି ।
ବିଚାରପତି ବିନୋଦ ଚନ୍ଦ୍ରନ୍ ଏବଂ ଜିୟାଦ ରହମନଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ପୀଡ଼ିତାଙ୍କ ସହ ଶାରୀରିକ ସଂପର୍କ ହୋଇନଥିଲେ ମଧ୍ୟ ଜଂଘକୁ ଛୁଇଁଲେ ବି ତାହାକୁ ଦୁଷ୍କର୍ମ ଭାବେ ଧରାଯିବ । ୨୦୧୫ ମସିହାରେ ଜଣେ ବ୍ୟକ୍ତି ୧୧ ବର୍ଷର ପଡ଼ୋଶୀ ନାବାଳିକା ସହ ଦୁଷ୍କର୍ମ କରିଥିବା ଅଭିଯୋଗ ମାମଲାର ବିଚାର କରି ଖଣ୍ଡପୀଠ ଏହି ରାୟ ଦେଇଛନ୍ତି ।
