ସତ୍ୟଶିଖା(ଭୁବନେଶ୍ୱର ) ୨୮.୦୧.୨୦୨୨ : ରାଜ୍ୟରେ ଜାରି ରହିଛି କରୋନା ଟିକାକରଣ। ଏବେ ସୁଦ୍ଧା ୫ କୋଟି ୬୪ ଲକ୍ଷ ପାନ ଟିକାକରଣ କରାଯାଇଛି। ଆଜି ଗୋଟିଏ ଦିନରେ ୧ ଲକ୍ଷ ୯୪ ହଜାର ୨୫୨ ଟିକାକରଣ ହୋଇଥିବା ସ୍ବାସ୍ଥ୍ୟ ବିଭାଗ ପକ୍ଷରୁ ଜଣାପଡିଛି। ଯେଉଁଥିରେ ସ୍ବାସ୍ଥ୍ୟକର୍ମୀ, ସମ୍ମୁଖ ଯୋଦ୍ଧା, ବରିଷ୍ଠ ନାଗରିକ ଏବଂ କିଶୋର କିଶୋରୀ ରହିଛନ୍ତି। ଅନ୍ୟପକ୍ଷରେ ଏପର୍ଯ୍ୟନ୍ତ ୩ ଲକ୍ଷ ୯୯ ହଜାର ୮୫୫ ପ୍ରତିଷେଧାତ୍ମକ ପାନ ଦିଆଯାଇଥିବାବେଳେ ୬୦.୩ ପ୍ରତିଶତ କିଶୋର କିଶୋରୀଙ୍କୁ ପ୍ରଥମ ପାନ ଦିଆସରିଛି। ସ୍ବାସ୍ଥ୍ୟ ବିଭାଗରୁ ମିଳିଥିବା ସୂଚନା ଅନୁସାରେ ଆଜି ୧,୯୪,୨୫୨ ପାନ ଟିକା ଦିଆଯାଇଛି। ୧୫ରୁ ୧୮ ବର୍ଷ ମଧ୍ୟରେ ୨୫ ହଜାର ୭୩ ପ୍ରଥମ ପାନ ଦିଆଯାଇଛି।
ଏହାଛଡ଼ା ୨୭୬୮ ସ୍ବାସ୍ଥ୍ୟକର୍ମୀ, ୧୪୪୩ ସମ୍ମୁଖ ଯୋଦ୍ଧା ଏବଂ ୬୦ରୁ ଊର୍ଦ୍ଧ୍ବ ୮୬୧୭ ପ୍ରତିଷେଧାତ୍ମକ ପାନ ନେଇଥିବା ଜଣାପଡିଛି। ସେହିପରି ୧୮ରୁ ୪୪ ବର୍ଷ ମଧ୍ୟରେ ୨୦,୭୪୫ ପ୍ରଥମ ପାନ ଓ ୮୩,୮୯୧ ଦ୍ବିତୀୟ ପାନ ନେଇଛନ୍ତି। ୪୫ରୁ ଊର୍ଦ୍ଧ୍ବ ୭୨୦୪ ପ୍ରଥମ ପାନ, ୪୪,୧୫୯ ଦ୍ବିତୀୟ ପାନ ନେଇସାରିଛନ୍ତି। ଅନ୍ୟପକ୍ଷରେ ଆଜି ୧୦୦୭ ଗର୍ଭବତୀ ଟିକା ନେଇଛନ୍ତି। ବର୍ତ୍ତମାନ ୩ ହଜାର ୨୬୨ ଟିକାକରଣ କେନ୍ଦ୍ରରେ ଟିକାକରଣ କରାଯାଉଛି ବୋଲି କହିଛନ୍ତି ପରିବାର କଲ୍ୟାଣ ଡାକ୍ତର ବିଜୟ ପାଣିଗ୍ରାହୀ।
ସେହିପରି ଗତ କିଛି ଦିନ ଧରି କରୋନା ସଂକ୍ରମଣ ୧୦ ହଜାର ଉପରେ ରହୁଥିବା ବେଳେ ଏବେ ତଳମୁହାଁ ହୋଇଛି। ଏହାକୁ ଦେଖିଲେ ରାଜ୍ୟରେ କରୋନା ସଂକ୍ରମଣ ଶୀର୍ଷ ଛୁଇଁ ସାରିଥିବା ଜଣାପଡୁଛି ବୋଲି ଜନସ୍ବାସ୍ଥ୍ୟ ନିର୍ଦେଶକ ଡାକ୍ତର ନିରଞ୍ଜନ ମିଶ୍ର ସୂଚନା ଦେଇଛନ୍ତି। ଅନ୍ୟପକ୍ଷରେ ଦୈନିକ ସଂକ୍ରମଣ କମୁଛି। ରାଜ୍ୟରେ ଚିକିତ୍ସାଧୀନଙ୍କ ସଂଖ୍ୟା ମଧ୍ୟ ତଳମୁହାଁ ରହିଛି। ସଂକ୍ରମଣ ରୋକିବାକୁ ଏବେ ବି ସତର୍କତା ଅବଲମ୍ବନ କରିବାକୁ ପଡିବ। ପୂର୍ବଭଳି ନିୟମକୁ ସଠିକ୍ ଭାବେ ଅନୁପାଳନ କରିବାକୁ ପଡ଼ିବ।
