ବିମାନରେ ଚୀନ୍‌ ନାଗରିକମାନଙ୍କୁ ଭାରତକୁ ନ ଆଣିବା ଲାଗି ଏୟାର୍‌ଲାଇନ୍‌ମାନଙ୍କୁ କେନ୍ଦ୍ର ସରକାରଙ୍କ ନିର୍ଦେଶ

ସତ୍ୟଶିଖା (ନୂଆଦିଲ୍ଲୀ) ୨୮/୧୨/୨୦୨୦ : ବିମାନରେ ଚୀନ୍‌ ନାଗରିକମାନଙ୍କୁ ଭାରତକୁ ନ ଆଣିବା ପାଇଁ କେନ୍ଦ୍ର ସରକାର ଅନୌପଚାରିକ ଭାବେ ସମସ୍ତ ଏୟାର୍‌ଲାଇନ୍‌ଙ୍କୁ କହିଥିବା ଜଣାପଡ଼ିଛି । ଭାରତୀୟ ନାଗରିକମାନଙ୍କୁ ବିମାନରେ ଚୀନ୍‌ ନ ଆଣିବାକୁ ନଭେମ୍ବର ମାସରେ ଚୀନ୍‌ ପ୍ରତ୍ୟକ୍ଷଭାବେ ଘୋଷଣା କରିବା ପରେ ଭାରତ ଏ ଭଳି ପଦକ୍ଷେପ ଗ୍ରହଣ କରିଥିବା କୁହାଯାଉଛି ।ସମ୍ପ୍ରତି ଭାରତ ଓ ଚୀନ୍‌ ମଧ୍ୟରେ ବିମାନ ଚଳାଚଳ କରୁ ନ ଥିଲେ ବି ବିଦେଶୀ ନାଗରିକଙ୍କ ବିମାନ ଯାତ୍ରା ପାଇଁ କରାଯାଇଥିବା ‘ଟ୍ରାଭେଲ୍‌ ବବଲ୍‌’ ଜରିଆରେ ଚୀନ୍‌ ନାଗରିକମାନେ ଭାରତକୁ ଆସିବାରେ ସମର୍ଥ ହେଉଛନ୍ତି । ଅର୍ଥାତ୍‌ ସ୍ୱତନ୍ତ୍ର ଅର୍ନ୍ତରାଷ୍ଟ୍ରୀୟ ବିମାନ ଚଳାଚଳ ଲାଗି ଭାରତ ସହ ଯେଉଁ ଦେଶମାନେ ‘ଟ୍ରାଭେଲ୍‌ ବବଲ୍‌’ ରାଜିନାମା କରିଛନ୍ତି, ଚୀନ୍‌ ନାଗରିକମାନେ ସେ ସବୁ ଦେଶକୁ ଯାଇ ସେଠାରୁ ବିମାନ ଯୋଗେ କୌଣସି କାମ କିଂବା ବ୍ୟବସାୟ ଲାଗି ଭାରତକୁ ଚାଲି ଆସୁଛନ୍ତି ।ତେଣୁ , ଚୀନ୍‌ ନାଗରିକମାନଙ୍କୁ ଭାରତକୁ ନ ଆଣିବାକୁ ଉଭୟ ଭାରତୀୟ ଏବଂ ବିଦେଶୀ ଏୟାର୍‌ଲାଇନ୍‌ମାନଙ୍କୁ ଗତ ସପ୍ତାହ ଶେଷ ଭାଗରେ ନିର୍ଦେଶ ଦିଆଯାଇଛି । ସମ୍ପ୍ରତି ଭାରତକୁ ଆସିବା ପାଇଁ ‘ଟୁରିଷ୍ଟ୍‍ ଭିସା’ ବନ୍ଦ ଥିଲେ ବି କୌଣସି କାର୍ଯ୍ୟ ବା କୌଣସି ‘ଅଣ-ଟୁରିଷ୍ଟ୍‍ ଭିସା’ ବର୍ଗରେ ବିଦେଶୀମାନଙ୍କୁ ଭାରତକୁ ଛଡ଼ାଯାଉଛି । ୟୁରୋପରେ ଥିବା ‘ଏୟାର୍‌ ବବଲ୍‌’ ଦେଶମାନଙ୍କରୁ ଅଧିକାଂଶ ଚୀନ୍‌ ନାଗରିକ ବିମାନ ଯୋଗେ ଭାରତକୁ ଚାଲି ଆସୁଛନ୍ତି ବୋଲି ଶିଳ୍ପସୂତ୍ରରୁ ଜଣାପଡ଼ିଛି । କିନ୍ତୁ, ଚୀନ୍‌ ନାଗରିକମାନଙ୍କୁ ଭାରତକୁ ନ ଆଣିବାର କାରଣ ଦର୍ଶାଇବାକୁ ପଡୁଛି କହି କେତେକ ଏୟାର୍‌ଲାଇନ୍‌ ଭାରତ ସରକାରଙ୍କୁ ଲିଖିତ ଭାବେ ଏହି ନିର୍ଦେଶ ଦେବାକୁ ଅନୁରୋଧ କରିଛନ୍ତି ।