ସତ୍ୟଶିଖା ( ନୂଆଦିଲ୍ଲୀ ) ୨୨ . ୦୮.୨୦୨୦ : ଦିଲ୍ଲୀରୁ ଆଇଏସଆଇଏସ୍ ଆତଙ୍କୀ ଗିରଫ । ଦିଲ୍ଲୀର ଧଲାକୂଆଁ ରିଙ୍ଗ ରୋଡ ନିକଟରେ ଗତକାଲି ବିଳମ୍ବିତ ରାତିରେ ପୋଲିସ-ଆତଙ୍କବାଦୀ ଗୁଳିବିନିମୟ ହୋଇଥିଲା । ପୋଲିସ୍ ଆଇଏସ୍ଆଇଏସ୍ର ଏକ ଆତଙ୍କବାଦୀକୁ ଗିରଫ କରିବା ସହ ସଂପୃକ୍ତ ଅଞ୍ଚଳରୁ ଆଇଡି ବିସ୍ଫୋରକ ଏବଂ କିଛି ଅସ୍ତ୍ରଶସ୍ତ୍ର ଜବତ କରିଛି । ଗିରଫ ଆତଙ୍କବାଦୀ ଜଣକ ଆବୁ ୟୁସୁଫ୍ ବୋଲି ଜଣାପଡ଼ିଛି । ଆବୁ ୟୁସୁଫ୍ ଦିଲ୍ଲୀର କିଛି ସହଯୋଗୀଙ୍କ ସହ କାମ କରୁଥିଲା ପୋଲିସ ଆବୁକୁ ଗିରଫ କରିବା ପରେ ତା’ର ଘରେ ଚଢ଼ାଉ ଆରମ୍ଭ କରିଛି । ଏନେଇ ଦିଲ୍ଲୀ ସ୍ପେସାଲ ସେଲ ପକ୍ଷରୁ ସୂଚନା ଦିଆଯାଇଛି ।
ସୂଚନାମୁତାବକ, ଗତକାଲି ବିଳମ୍ବିତ ରାତିରେ ଦିଲ୍ଲୀ ପୋଲିସର ସ୍ୱତନ୍ତ୍ର ସେଲ୍ ଏହି ଅପରେସନ କାର୍ଯ୍ୟ ଆରମ୍ଭ କରିଥିଲା । ପୁରା ଅଞ୍ଚଳକୁ ସ୍ପେଶାଲ ସେଲ୍ ଘେରିଯାଇଥିଲା । ଉଭୟ ଆତଙ୍କବାଦୀ-ପୋଲିସ ମଧ୍ୟରେ ଗୁଳିବିନିମୟ ହୋଇଥିଲା । ଶେଷରେ ଆତଙ୍କବାଦୀକୁ କାବୁ କରିନେଇଥିଲା ସ୍ପେଶାଲ ସ୍କ୍ୱାର୍ଡ । ଅଞ୍ଚଳରେ ଆହୁରି ଆତଙ୍କବାଦୀ ଲୁଚି ରହିଥିବା ମଧ୍ୟ ସନ୍ଦେହ କରାଯାଉଛି । ଦିଲ୍ଲୀ ପୋଲିସ କହିଛି ଯେ, ଆଇଏସଆଇଏସ୍ ଆତଙ୍କବାଦୀମାନେ ଦିଲ୍ଲୀରେ ଏକ ବଡ଼ ଆତଙ୍କବାଦୀ ଆକ୍ରମଣ କରିବାକୁ ଯୋଜନା କରିଥିଲେ ।
