ସତ୍ୟଶିଖା (ଭୁବନେଶ୍ୱର) ୧୬.୧୨.୨୦୨୧: ଉଚ୍ଚଶିକ୍ଷା ବିଭାଗ ଅଧୀନରେ ସମସ୍ତ ବିଶ୍ବବିଦ୍ୟାଳୟ ଓ ମହାବିଦ୍ୟାଳୟରେ ସ୍ନାତକ(ୟୁଜି) ଓ ସ୍ନାତକୋତ୍ତର(ପିଜି) ସେମିଷ୍ଟର(ଅଧିବେଶନ) ଓ ବାର୍ଷିକ ପରୀକ୍ଷା ଅଫଲାଇନ୍ରେ ଶ୍ରେଣୀଗୃହରେ ଅନୁଷ୍ଠିତ ହେବ।
କୌଣସି ଶିକ୍ଷାନୁଷ୍ଠାନ ଅନ୍ଲାଇନ୍ (ସଞ୍ଚାର ଜରିଆରେ) ପରୀକ୍ଷା କରିପାରିବେ ନାହିଁ। କିଛି ଦିନ ପୂର୍ବେ ବିଶ୍ବବିଦ୍ୟାଳୟ ଅନୁଦାନ ଆୟୋଗ(ୟୁଜିସି) ପକ୍ଷରୁ ଏନେଇ ବିଶ୍ବବିଦ୍ୟାଳୟ କୁଳପତିଙ୍କୁ ନିର୍ଦେଶ ଦିଆଯାଇଥିବାବେଳେ ଆଜି ଉଚ୍ଚଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ସମସ୍ତ ମହାବିଦ୍ୟାଳୟର ଅଧ୍ୟକ୍ଷ ଓ ବିଶ୍ବବିଦ୍ୟାଳୟର କୁଳପତିଙ୍କୁ ଚିଠି ଲେଖିଛନ୍ତି ଉଚ୍ଚଶିକ୍ଷା ସଚିବ ଶାଶ୍ବତ ମିଶ୍ର।
ଚିଠିରେ ଉଲ୍ଲେଖ କରିଛନ୍ତି ଏଣିକି ସମସ୍ତ ପରୀକ୍ଷା ପାରମ୍ପରିକ ପଦ୍ଧତିରେ ଶ୍ରେଣୀଗୃହରେ ଅନୁଷ୍ଠିତ ହେବ। କରୋନା କଟକଣାକୁ ପାଳନ କରି ଶିକ୍ଷାନୁଷ୍ଠାନ କର୍ତ୍ତୃପକ୍ଷ ପରୀକ୍ଷା ପରିଚାଳନା କରିବେ। ଏହି ନିୟମକୁ ସଠିକ୍ ଭାବେ ଅନୁପାଳନ କରିବାକୁ ବିଭାଗ ପକ୍ଷରୁ ନିର୍ଦେଶ ଦିଆଯାଇଛି।
ରାଜ୍ୟ ଉଚ୍ଚଶିକ୍ଷା ବିଭାଗର ସ୍ପଷ୍ଟ ନୀତି ନ ଥିବାରୁ ରାଜ୍ୟରେ ଛାତ୍ରଛାତ୍ରୀ ଓ ଶିକ୍ଷାନୁଷ୍ଠାନ କର୍ତ୍ତୃପକ୍ଷ ଦୀର୍ଘଦିନ ଧରି ହଟହଟା ହୋଇଥିଲେ। ମହାବିଦ୍ୟାଳୟ ଓ ବିଶ୍ବବିଦ୍ୟାଳୟରେ ଛାତ୍ରଛାତ୍ରୀଙ୍କର ଠିକ୍ ଭାବେ ପରୀକ୍ଷା ହେଉ ନ ଥିବାବେଳେ ପରୀକ୍ଷା ପଦ୍ଧତିକୁ ନେଇ ବିବାଦ ଦେଖା ଦେଇଥିଲା। ଉଚ୍ଚଶିକ୍ଷା ବିଭାଗର ଶିକ୍ଷା ପଞ୍ଜିକା ନ ଥିବାରୁ ଛାତ୍ରଛାତ୍ରୀଙ୍କର ଠିକ୍ ସମୟରେ ସ୍ନାତକ(ୟୁଜି)ସେମିଷ୍ଟର(ଅଧିବେଶନ) ପରୀକ୍ଷା ହୋଇପାରୁ ନଥିଲା। କିଛି ବିଶ୍ବବିଦ୍ୟାଳୟ ବିକଳ୍ପ ପଦ୍ଧତି(ପୂର୍ବ ଅଧିବେଶନ) ମାର୍କ ଆଧାରରେ ମୂଲ୍ୟାୟନ କରିଥିବାବେଳେ ଆଉ କିଛି ଶିକ୍ଷାନୁଷ୍ଠାନ ଶ୍ରେଣୀଗୃହ ପରୀକ୍ଷାକୁ ନେଇ ବିଜ୍ଞପ୍ତି ପ୍ରକାଶ କରିଥିଲେ।
ଏଭଳି ସମସ୍ୟାକୁ ନେଇ ରାଜ୍ୟର ବିଭିନ୍ନ ସ୍ଥାନରେ ବିବାଦ ଦେଖା ଦେଇଥିବାବେଳେ ହଟହଟା ହୋଇଥିଲେ ଶିକ୍ଷାନୁଷ୍ଠାନ କର୍ତ୍ତୃପକ୍ଷ। ଏହାକୁ ନେଇ ବିଭାଗ ଉପରେ ଚାପ ବଢିଥିଲା। ଅନ୍ଲାଇନ୍(ସଞ୍ଚାର ଜରିଆରେ) ପରୀକ୍ଷାରେ ସ୍ବଚ୍ଛତା ରହୁ ନ ଥିବା ଅଭିଯୋଗ ହେଉ ଥିବାବେଳେ ବିକଳ୍ପ ମୂଲ୍ୟାୟନ ଯୋଗୁଁ ବିଦ୍ୟାର୍ଥୀଙ୍କର ଦକ୍ଷତା ଠିକ୍ ଭାବେ ମପା ଯାଇପାରୁନି ବୋଲି ଅଭିଯୋଗ ଆସିଥିଲା। ଏହାକୁ ଦୃଷ୍ଟିରେ ରଖି ଉଚ୍ଚଶିକ୍ଷା ବିଭାଗ ପକ୍ଷରୁ ଆଜି ପରୀକ୍ଷା ପରିଚାଳନା ନେଇ ନିୟମାବଳୀ ଜାରି କରାଯାଇଛି।
