ସତ୍ୟଶିଖା(ବ୍ରହ୍ମପୁର ) ୨୪.୧୨.୨୦୨୧: ସ୍ଥାନୀୟ ଇଞ୍ିନିୟରିଂ ସ୍କୁଲର ଦୁଇଟି କୋଠରୀ ଗତକାଲି ରାତିରେ ଭୁଶୁପଡ଼ିଛି । ମଧ୍ୟରାତ୍ରିରେ ଘଟଣା ହୋଇଥିବାରୁ କେହି ଆହତ ହୋଇନଥିବା କୁହାଯାଇଛି । ଆଜି ସକାଳୁ ଘଟଣା ସଂପର୍କରେ ସୂଚନା ପାଇ ଅନୁଷ୍ଠାନର ଅଧ୍ୟକ୍ଷ ସୂର୍ଯ୍ୟନାରାୟଣ ଧର ଭୁଶୁଡିଥିବା କୋଠରୀ ଗୁଡିକୁ ଅନୁଧ୍ୟାନ କରିବା ସହ ଦୁଇଦିନ ଅନୁଷ୍ଠାନରେ ଶିକ୍ଷାଦାନ ବନ୍ଦ ରହିବ ବୋଲି ଘୋଷଣା କରିଛନ୍ତି । ଏହି କୋଠାଟି ପ୍ରାୟ ୬୦ ବର୍ଷ ପୂର୍ବେ ହୋଇଥିବା ଜଣାପଡ଼ିଛି । ଏହି କୋଠାଟି ସଂପ୍ରତି ସୁରକ୍ଷିତ ନା ନାହିଁ ସେ ନେଇ କୌଣସି ଯାଞ୍ଚ କରାଯାଇନାହିଁ । ଉଲ୍ଲେଖଯୋଗ୍ୟ ଯେ ସରକାରଙ୍କ ପୂର୍ତ୍ତ ବିଭାଗ ପକ୍ଷରୁ ନିର୍ଦିଷ୍ଟ କୋଠାର କାର୍ଯ୍ୟକାଳ କେତେ ସେ ନେଇ ଯାଞ୍ଚ କରାଯାଇ ସଂପୃକ୍ତ କର୍ତ୍ତୃପକ୍ଷଙ୍କୁ ଅବଗତ କରିବା ବିଧାନ ରହିଛି ।
ତେବେ ସେ ନେଇ ଇଞ୍ଜିନିୟରିଂ ସ୍କୁଲ କର୍ତ୍ତୃପକ୍ଷଙ୍କ ଠାରେ କୌଣସି ସୂଚନା ନାହିଁ ବୋଲି ଅଧ୍ୟକ୍ଷ ଶ୍ରୀ ଧର କହିଛନ୍ତି । ଅନ୍ୟପକ୍ଷରେ ପୂର୍ତ୍ତ ବିଭାଗର ସହକାରୀ ଯନ୍ତ୍ରୀ ବିଭୂତି ପ୍ରସାଦ ଆଚାର୍ଯ୍ୟ କହିଛନ୍ତି ଯେ ସ୍କୁଲର ଅନ୍ୟ କୌଣସି ଠାରେ ଫାଟ କିମ୍ବା ଅନ୍ୟ କୌଣସି ସଙ୍କେତ ନାହିଁ । ହଠାତ୍ ଦୁଇଟି କୋଠରୀ ଭୁଶୁଡ଼ିଛି । ଏ ନେଇ ବିଭାଗର ଉଚ୍ଚ କର୍ତ୍ତୃପକ୍ଷଙ୍କୁ ସୂଚନା ଦିଆଯାଇଛି । ଆଗାମୀ ଦିନେ ଦୁଇଦିନ ମଧ୍ୟରେ ସେମାନେ ଏଠାକୁ ଆସି ସଂପୂର୍ଣ୍ଣ କୋଠାର ଯାଞ୍ଚ କରିବେ । ପରେ ଆବଶ୍ୟକୀୟ କାର୍ଯ୍ୟକ୍ରମ କରାଯିବ । ବ୍ରହ୍ମପୁର ସହରରେ ଅନେକ କୋଠା ବିପଦଶଙ୍କୁଳ ଅବସ୍ଥାରେ ରହିଛି ।
ସେଗୁଡିକର ଯାଞ୍ଚ କରାଯାଇ ନଥିବା ନେଇ ଅଭିଯୋଗ ହୋଇଛି । ସ୍ଥାନୀୟ ପରିସଂଖ୍ୟାନ ବିଭାଗର କାର୍ଯ୍ୟାଳୟ ଅତି ଜରାଜୀର୍ଣ୍ଣ ହୋଇଥିବାରୁ କିଛି ମାସ ପୂର୍ବେ ଏହି କାର୍ଯ୍ୟାଳୟକୁ ଆରଡିସିଙ୍କ କାର୍ଯ୍ୟାଳୟ ନିକଟସ୍ଥ କୋଠାକୁ ସ୍ଥାନାନ୍ତର କରାଯାଇଛି । ଏହା ବ୍ୟତୀତ ଜିଲ୍ଲା କୃଷି କାର୍ଯ୍ୟାଳୟ ମଧ୍ୟ ଅସୁରକ୍ଷିତ ବୋଲି ଘୋଷିତ ହୋଇ ବହୁ ବର୍ଷ ବିତିଯାଇଥିଲେ ମଧ୍ୟ ଏହାର ବିକଳ୍ପ ବ୍ୟବସ୍ଥା କରାଯାଇନାହିଁ । ସଂପ୍ରତି ଇଞ୍ଜିନିୟର ସ୍କୁଲ କୋଠା ଭୁଶୁଡ଼ିବ ପରେ ପ୍ରଶାସନକୁ ଏହି ଘଟଣା ଚେତେଇ ଦେଇଛି । ଏବେ ପରୀକ୍ଷୀ ସମୟ ଆସନ୍ନ ହୋଇଥିବା ବେଳେ ସେଠାରେ ଏଣିକି ସ୍ମାଭାବିକ ଭାବେ ଶିକ୍ଷାଦାନ ହେବ ନା ଅନ୍ୟ କୌଣସି ବିକଳ୍ପ ଚିନ୍ତା କରାଯିବ ସେ ନେଇ ବିଚାର ବିମର୍ଶ ଚାଲିଛି । ଏଠାରେ ବିଦ୍ୟାର୍ଥୀଙ୍କ ଜୀବନ ଅସୁରକ୍ଷିତ ହୋଇଥିବା ବେଳେ ସହରରେ ଥିବା ଅନ୍ୟ କେତେକ ସରକାରୀ କୋଠାରେ କାର୍ଯ୍ୟରତଥିବା କର୍ମଚାରୀଙ୍କ ଜୀବନ ପ୍ରତି ମଧ୍ୟ ଅନୁରୁପ ଭାବେ ବିପଦ ରହିଛି ବୋଲି ଅଭିଯୋଗ ହୋଇଛି ।
