ସତ୍ୟଶିଖା ୨୯ .୦୮.୨୦୨୦ : ଉପରମୁଣ୍ଡରେ ଲଗାଣ ବର୍ଷା କାରଣରୁ ହୀରାକୁଦ ନଦୀ ଜଳଭଣ୍ଡାରରେ ଜଳସ୍ତର ବୃଦ୍ଧି ପାଇବାରେ ଲାଗିଛି । ମଧ୍ୟରାତ୍ରୀରେ ଜଳଭଣ୍ଡାରର ଦୁଇଟି ଗେଟ୍ ଖୋଲିଥିବା ବେଳେ ଆଜି ସକାଳେ ଆଉ ଦୁଇଟି ଗେଟ୍ ଖୋଲିଛି । ଜଳଭଣ୍ଡାରରୁ ଏବେ ୪୪ଟି ଗେଟ ଦେଇ ବନ୍ୟା ଜଳ ନିଷ୍କାସିତ ହେଉଛି । ବର୍ତ୍ତମାନ ଡ୍ୟାମର ଜଳସ୍ତର ରହିଛି ୬୨୬.୨୭ ଫୁଟ । ପ୍ରତି ସେକେଣ୍ଡରେ ଜଳଭଣ୍ଡାରକୁ ୮ ଲକ୍ଷ ୫୩ ହଜାର ୨୯ କ୍ୟୁସେକ୍ ଜଳ ପ୍ରବେଶ କରୁଛି । ସେହିପରି ପ୍ରତି ସେକେଣ୍ଡରେ ଜଳଭଣ୍ଡାରରୁ ୬ ଲକ୍ଷ ୯୪ ହଜାର ୨୦୦ କ୍ୟୁସେକ୍ ଜଳ ନିଷ୍କାସିତ ହେଉଛି ।
ହୀରାକୁଦର ଜଳଧାରଣ କ୍ଷମତା ୬୩୦ ଫୁଟ ହୋଇଥିବାବେଳେ ଏପର୍ଯ୍ୟନ୍ତ ଜଳସ୍ତର ୬୨୬ ଫୁଟରେ ପହଞ୍ଚିସାରିଲାଣି । ସେପଟେ ହୀରାକୁଦର ତଳିଆ ଅଞ୍ଚଳ ବେଲଗାଁଓ ଠାରେ ସେକେଣ୍ଡ ପ୍ରତି ୬୬ ହଜାର ୪୦୦ କ୍ୟୁସେକ୍, ଖଇରମାଲ ଠାରେ ୧୦ ଲକ୍ଷ ୧୧ ହଜାର କ୍ୟୁସେକ୍, ପଥରଲା ଠାରେ ୧ ଲକ୍ଷ ୭୫ ହଜାର ୪୨୮ କ୍ୟୁସେକ୍, ବରମୁଲ ଠାରେ ୮ ଲକ୍ଷ ୭୦ ହଜାର କ୍ୟୁସେକ୍, ମୁଣ୍ଡଳି ଠାରେ ୮ ଲକ୍ଷ ୯୫ ହଜାର ୭୦୮ କ୍ୟୁସେକ୍ ଜଳ ପ୍ରବାହିତ ହେଉଥିବା ରିପୋର୍ଟ ଆସିଛି । କଟକ ଜିଲ୍ଲାରେ ମୁଣ୍ଡୁଳି ବ୍ୟାରେଜରେ ଜଳସ୍ତର ବିପଦ ସଂକେତ ଉପରକୁ ଉଠିଯାଇଛି । ଫଳରେ କଟକ,ଜଗତସିଂପୁର, ପୁରୀ ଆଦି ଜିଲ୍ଲାରେ ବନ୍ୟା ପରିସ୍ଥିତି ଗୁରୁତର ହେବାର ଆଶଙ୍କା ରହିଛି ।
