ସତ୍ୟଶିଖା(ଭୁବନେଶ୍ୱର) ୦୯ .୧୨.୨୦୨୧: କର୍ତ୍ତବ୍ୟରେ ଅବହେଳା ଏବଂ ଶୃଙ୍ଖଳା ଭଙ୍ଗ ଅଭିଯୋଗରେ ରାଜ୍ୟ ସରକାର ବୁଧବାର ଦୁଇ ସରକାରୀ ବାବୁଙ୍କୁ ସସପେଣ୍ଡ କରିଛନ୍ତି । ଏମାନଙ୍କ ଭିତରୁ ଜଣେ ହେଉଛନ୍ତି ଓଏଏସ ଏବଂ ଅନ୍ୟଜଣେ ଓଆରଏସ୍ । ଏମାନେ ହେଲେ ବଣାଇ ତହସିଲଦାର ଥିବା ଓଏଏସ ଅଧିକାରୀ ସୁଶିଲ କୁଞ୍ଜୁର ଏବଂ ଭୁବନେଶ୍ୱର ସ୍ଥିତ ଦେବୋତ୍ତର କମିଶନଙ୍କ କାର୍ଯ୍ୟାଳୟରେ ଲ୍ୟାଣ୍ଡ୍ ଅଫିସର ଥିବା ଓଆରଏସ୍ ଅଧିକାରୀ ତାରିଣୀ ରଞ୍ଜନ ରାୟ । ଦୁଇ ଜଣଙ୍କ ନାଁରେ ବର୍ତ୍ତମାନ ଶୃଙ୍ଖଳାଗତ ମାମଲା ବିଚାରାଧିନ ରହିଛି । ଏଣୁ ଉଭୟଙ୍କୁ କାର୍ଯ୍ୟରୁ ନିଲମ୍ବନ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ । ଏନେଇ ରାଜ୍ୟ ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଚିଠି ଜାରି ହୋଇଛି । ଏଥିସହ ଉଭୟଙ୍କୁ କାର୍ଯ୍ୟାନୁଷ୍ଠାନ ସ୍ୱରୂପ ମାଲକାନଗିରି ପଠାଇ ଦିଆଯାଇଛି । ନିଲମ୍ବନ ଅବଧି ଭିତରେ ଦୁହେଁ ମାଲକାନଗିରି ଜିଲ୍ଲାପାଳଙ୍କ କାର୍ଯ୍ୟାଳୟରେ ଅବସ୍ଥାପିତ ହେବାସହ ଜିଲ୍ଲାପାଳଙ୍କ ବିନା ଅନୁମତିରେ ସେ ମୁଖ୍ୟାଳୟ ଛାଡ଼ିପାରିବେ ନାହିଁ । ଓଡ଼ିଶା ସର୍ଭିସ୍ କୋଡର ରୁଲ୍ ନମ୍ବର-୯୦ ଆଧାରରେ ଦୁହିଁଙ୍କୁ ଏହି ଅବଧିରେ ଆବଶ୍ୟକୀୟ ଭତ୍ତା ଅର୍ଥ ପ୍ରଦାନ କରାଯିବ । ପ୍ରକାଶ ଯେ ନିକଟରେ ଶ୍ରୀ ରାୟଙ୍କୁ ମାଲକାନଗିରିର ଅତିରିକ୍ତ ଜିଲ୍ଲାପାଳ ଭାବେ ରାଜ୍ୟ ସରକାର ବଦଳି କରିଥିଲେ । ହେଲେ ବାବୁଙ୍କ ନାଁରେ ଶୃଙ୍ଖଳା ଭଙ୍ଗ ଅଭିଯୋଗ ଆସିବା ପରେ ତାଙ୍କର ବଦଳି ପ୍ରକ୍ରିୟାକୁ ରଦ୍ଦ କରାଯିବା ସହ ତାଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଛି ।
