ଭୁବନେଶ୍ୱର (ସତ୍ୟଶିଖା): ଲକଡାଉନ୍ ଯୋଗୁ ଅନ୍ୟ ରାଜ୍ୟରେ ଅଟକି ରହିଥିବା ଓଡ଼ିଆମାନଙ୍କ ଘରବାହୁଡ଼ା ହେଉଥିବାବେଳେ ସେମାନଙ୍କଠୁ ଦୂରେଇ ରହିବା ନିମନ୍ତେ ଗଣମାଧ୍ୟମକୁ ରାଜ୍ୟ ସରକାର ପରାମର୍ଶ ଦେଇଛନ୍ତି। ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଆଜି ଏକ ଆଡଭାଇଜରି ମଧ୍ୟ ଜାରି ହୋଇଛି।
ଆହୁରି ପଢ଼ନ୍ତୁ
ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ନିର୍ଦ୍ଦେଶକ କୃପାସିନ୍ଧୁ ମିଶ୍ର ଆଜି ସମସ୍ତ ଗଣମାଧ୍ୟମ ସଂସ୍ଥା ଓ ପ୍ରତିନିଧିଙ୍କ ପାଇଁ ଏକ ନିର୍ଦ୍ଦେଶନାମା ଜାରି କରି କହିଛନ୍ତି ଯେ, କେନ୍ଦ୍ର ଗୃହ ମନ୍ତ୍ରଣାଳୟ ଏପ୍ରିଲ ୨୯ତାରିଖରେ ପ୍ରବାସୀ ଶ୍ରମିକ, ତୀର୍ଥଯାତ୍ରୀ, ପର୍ଯ୍ୟଟକ, ଛାତ୍ରଛାତ୍ରୀ ଓ ଅନ୍ୟାନ୍ୟ ଲୋକମାନଙ୍କୁ ନିଜ ରାଜ୍ୟକୁ ଫେରିବା ନିମନ୍ତେ ଅନୁମତି ଦେଇଛନ୍ତି। ଏହି କାରଣରୁ ବହୁ ସଂଖ୍ୟକ ଓଡ଼ିଆ ଲୋକମାନେ ସଡ଼କ ଓ ରେଳ ମାର୍ଗରେ ଓଡ଼ିଶାକୁ ଫେରୁଛନ୍ତି। ସେମାନେ ଓଡ଼ିଶାରେ ପହଂଚିବା ପରେ ସେମାନଙ୍କୁ ସ୍ୱାଗତ ସହ ସ୍ୱାସ୍ଥ୍ୟ ଯାଂଚ କରାଯାଇ ସେମାନଙ୍କର ନିଜସ୍ୱ ଜିଲ୍ଲାକୁ ପଠାଇ ଦିଆଯିବ। ତେଣୁ ସଂକ୍ରମଣ ଆଶଙ୍କା ଓ ଗଣମାଧ୍ୟମ ପ୍ରତିନିଧିମାନଙ୍କର ବ୍ୟକ୍ତିଗତ ନିରାପତ୍ତାକୁ ଦୃଷ୍ଟିରେ ରଖି ରେଳ ଷ୍ଟେସନ କିମ୍ବା ଚେକ୍ ପଏଣ୍ଟ ସ୍ଥଳ, କୌଣସି କ୍ୱାରେଣ୍ଟାଇନ ସେଣ୍ଟର ଅବା ଆଇସୋଲେସନ୍ ସେଣ୍ଟରକୁ ନଯିବା ପାଇଁ ରାଜ୍ୟ ସରକାର ଅନୁରୋଧ କରିଛନ୍ତି। ଏହାସହିତ ଏଭଳି ଅସାଧାରଣ ପରିସ୍ଥିତିରେ କୋଭିଡ୍-୧୯ ସଂକ୍ରମଣ ଗାଇଡଲାଇନକୁ ପାଳନ କରିବାକୁ ଗଣମାଧ୍ୟମ ସଂସ୍ଥା ଓ ପ୍ରତିନିଧିଙ୍କୁ ରାଜ୍ୟ ସରକାର ପରାମର୍ଶ ଦେଇଛନ୍ତି। ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଓଡ଼ିଶା ଫେରନ୍ତାଙ୍କ ସମ୍ପର୍କିତ ଆବଶ୍ୟକ ଫଟୋଗ୍ରାଫ ଓ ଖବର ଗଣମାଧ୍ୟମ ସଂସ୍ଥାକୁ ପ୍ରଦାନ କରାଯିବ ବୋଲି ଶ୍ରୀ ମିଶ୍ର କହିଛନ୍ତି ।
ସୂଚନାଯୋଗ୍ୟ, ଓଡ଼ିଶା ଫେରନ୍ତାଙ୍କୁ ରେଳଷ୍ଟେସନ୍ ଓ ଚେକପଏଣ୍ଟରେ ଆବଶ୍ୟକ ଯାଂଚ ପ୍ରକ୍ରିୟାର ଅନୁପାଳନ କରିବାକୁ ପଡ଼ିବ।
