ବ୍ଲାକ ଫଙ୍ଗସରେ ୨୯ ରୋଗୀ ମୃତ

ସତ୍ୟଶିଖା(ଭୁବନେଶ୍ୱର )୨୧.୦୯ .୨୦୨୧: ରାଜ୍ୟରେ ବ୍ଲାକ ଫଙ୍ଗସରେ ୨୯ ଜଣଙ୍କ ମୃତ୍ୟୁ ହୋଇଛି । ୨୯ ଜଣଙ୍କ ମୃତ୍ୟୁ ହୋଇଥିବା ନେଇ ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି । ରାଜ୍ୟରେ ଏ ଯାବତ ୨୧୨ ବ୍ଲାକ ଫଙ୍ଗସ ରୋଗୀ ଚିହ୍ନଟ ହୋଇଛନ୍ତି । ୨୧୨ ଚିହ୍ନଟଙ୍କ ମଧ୍ୟରୁ ୧୦୯ ଜଣଙ୍କ ହସ୍ପିଟାଲରେ ଚିକିତ୍ସା ଚାଲିଛି । ୬୮ ଜଣ ବ୍ଲାକ ଫଙ୍ଗସରୁ ସୁସ୍ଥ ହୋଇଛନ୍ତି । ୨୯ ଜଣଙ୍କ ମୃତ୍ୟୁ ଘଟିଛି ।

ସୂଚନାଯୋଗ୍ୟ, କରୋନାର ଦ୍ୱିତୀୟ ଲହରରେ ରୋଗୀଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ଷ୍ଟେରଏଡ ଦିଆଯାଉଥିଲା। ତେବେ ଅତ୍ୟଧିକ ମାତ୍ରାର ଷ୍ଟେରଏଡ ଯୋଗୁ ‘ବ୍ଲାକ୍ ଫଙ୍ଗସ୍’ ନାମକ ରୋଗରେ ଅନେକ ଲୋକ ପୀଡ଼ିତ ହେବାରେ ଲାଗିଥିଲେ। ଏହି ରୋଗରେ ଆକ୍ରାନ୍ତ କିଛି ରୋଗୀ ସେମାନଙ୍କ ଆଖି ମଧ୍ୟ ହରାଇଛନ୍ତି। ବ୍ଲାକ ଫଙ୍ଗସ ନାକରୁ ଆରମ୍ଭ ହୋଇ ଆଖି ଓ ମସ୍ତିଷ୍କକୁ ବ୍ୟାପିଥାଏ। ବିଶେଷଜ୍ଞମାନଙ୍କ ମତରେ ଫଙ୍ଗସ୍ ନାକରେ ୨ରୁ ୩ ଦିନ ରହିଥାଏ। ଏହାପରେ ଏହା ଆଖି ଆଡ଼କୁ ଗତି କରିଥାଏ।  ଯଦି ଏହାକୁ ଠିକଣା ସମୟରେ ଚିକିତ୍ସା କରା ନଯିବ, ତା’ହେଲେ ଏହା ମସ୍ତିଷ୍କକୁ ଚାଲି ଯାଇଥାଏ। ରୋଗ ମସ୍ତିଷ୍କକୁ ଚାଲି ଯିବା ଦ୍ୱାରା ମୃତ୍ୟୁର ଆଶଙ୍କା ବଢ଼ି ଯାଇଥାଏ। ଇଏନଟି ଡାକ୍ତରମାନେ ନାକର ଟେଷ୍ଟ ମାଧ୍ୟମରେ ରୋଗକୁ ଚିହ୍ନଟ କରନ୍ତି। ପ୍ରଥମେ ଆଣ୍ଟି-ଫଙ୍ଗଲ୍ ଇଞ୍ଜେକ୍ସନ୍ ଦିଅନ୍ତି। ଯଦି ସଂକ୍ରମଣ ଆଖିରେ ପହଞ୍ଚି ଯାଇଥାଏ, ତା’ହେଲେ ଏହାର ଅସ୍ତ୍ରୋପଚାର ଆବଶ୍ୟକ ପଡ଼େ। ସଂକ୍ରମଣ ଅତ୍ୟଧିକ ହୁଏ, ତେବେ ସମଗ୍ର ଆଖିକୁ ଶରୀରରୁ ବାହାର କରିବାକୁ ପଡ଼େ। ସାଧାରଣତଃ ଏହା ମଧୁମେହ ରୋଗୀଙ୍କ ଠାରେ ଦେଖାଯାଉଥିଲା। ଏବେ କମ ରୋଗ ପ୍ରତିରୋଧକ ଶକ୍ତି ଥିବା ଲୋକଙ୍କ ଶରୀରରେ ବ୍ଲାକ ଫଙ୍ଗସ ଦେଖିବାକୁ ମିଳୁଛି।