୨୬/୧୧ ମୁମ୍ବଇ ଆକ୍ରମଣର ୧୨ବର୍ଷ ପୂର୍ତ୍ତି

ସତ୍ୟଶିଖା (ମୁମ୍ବଇ) ୨୬/୧୧/୨୦୨୦ :  ନଭେମ୍ବର ୨୬, ୨୦୦୮ ମୁମ୍ବଇ ଆତଙ୍କବାଦୀ ଆକ୍ରମଣକୁ ୧୨ବର୍ଷ ପୂରଣ ହୋଇଛି । ୧୨ବର୍ଷ ପୂର୍ବେ ଆଜିର ଦିନରେ ପାକିସ୍ତାନସ୍ଥିତ ଆତଙ୍କବାଦୀ ସଂଗଠନ ଲସ୍କର-ଇ-ତୋଇବାର ୧୦ଜଣ ଆତଙ୍କବାଦୀ ମୁମ୍ବଇ ସହରରେ ପଶି ଆକ୍ରମଣ କରିଥିଲେ । ଆତଙ୍କବାଦୀମାନେ ପାକିସ୍ତାନ କରାଚି ବନ୍ଦରରୁ ସମୁଦ୍ର ପଥରେ ଆସି ମୁମ୍ବଇ ସହରରେ ଅନୁପ୍ରବେଶ କରିଥିଲେ । ପରେ ସେମାନେ ସହରର ବିଭିନ୍ନ ସ୍ଥାନ ଯଥା ଛତ୍ରପତି ଶିବାଜୀ ଟର୍ମିନସ, ଚବାଡ ହାଉସ, ହୋଟେଲ ଓବରାଇ ଟ୍ରାଇଡେଣ୍ଟ, ତାଜ ପ୍ୟାଲେସ, ନରିମାନ ହାଉସରେ ଆକ୍ରମଣ ଘଟାଇଥିଲେ । ୪ ଦିନ ଧରି ଏହି ଆକ୍ରମଣ ଚାଲିଥିଲା । ପରେ ଏନଏସଜି କମାଣ୍ଡୋଙ୍କ ସ୍ଵତନ୍ତ୍ର ଅପରେସନ (ବ୍ଲାକ୍‌ ଟର୍ଣ୍ଣାଡୋ)ରେ ଆତଙ୍କବାଦୀଙ୍କୁ ନିପାତ କରାଯାଇଥିଲା ।ଜଣେ ମାତ୍ର ଆତଙ୍କବାଦୀ ଅଜମଲ କସାବ ଜୀବନ୍ତ ରହିଥିଲା । ପରବର୍ତ୍ତୀ ସମୟରେ ଏହି ପାକିସ୍ତାନୀ ଆତଙ୍କବାଦୀକୁ ଫାଶୀ ଦିଆଯାଇଥିଲା । ଏହି ଆକ୍ରମଣରେ କେତେକ ବିଦେଶୀ ନାଗରିକଙ୍କ ସମେତ ୧୭୪ଜଣଙ୍କର ମୃତ୍ୟୁ ହୋଇଥିଲା ୩୦୦ରୁ ଅଧିକ ଆହତ ହୋଇଥିଲେ । ଏହି ଆକ୍ରମଣ ପଛରେ ପାକିସ୍ତାନ ସରକାର ଓ ସେନାର ପ୍ରଚ୍ଛନ୍ନ ହାତ ରହିଥିବା ନେଇ ଭାରତ ସମେତ ବିଶ୍ୱ ସମୁଦାୟ ଅଭିଯୋଗ କରିଆସିଛନ୍ତି । ଆକ୍ରମଣରେ ପାକିସ୍ତାନର ସମ୍ପୃକ୍ତି ବିଷୟକୁ ନିଜ ଦେଶର ଜଣେ ସାଂସଦ ମଧ୍ୟ ସ୍ୱୀକାର କରିଥିଲେ । ଆକ୍ରମଣରେ ୧୨ବର୍ଷ ପୂର୍ତ୍ତି ଅବସରରେ ମହାରାଷ୍ଟ୍ର ସରକାରଙ୍କ ପକ୍ଷରୁ ସହିଦ ଯବାନ ଓ ମୃତକଙ୍କୁ ଶ୍ରଦ୍ଧାଞ୍ଜଳି ଅର୍ପଣ ବ୍ୟବସ୍ଥା କରାଯାଇଛି ।