ସତ୍ୟଶିଖା (ଭୁବନେଶ୍ୱର) ୦୫/୧୨/୨୦୨୦ : ରାଜ୍ୟର ୧୦୦ ଆୟୁଷ ଡିସ୍ପେନସାରିରେ ଖୋଲିବ ସ୍ୱାସ୍ଥ ଓ ଆରୋଗ୍ୟ କେନ୍ଦ୍ର । ୬୦ଟି ଆୟୁର୍ବେଦିକ ଓ ୪୦ଟି ହୋମିଓପ୍ୟାଥିକ ଡିସ୍ପେନସାରିକୁ ନବୀକରଣ କରାଯାଇ ସ୍ୱାସ୍ଥ ଓ ଆରୋଗ୍ୟ କେନ୍ଦ୍ରର ରୂପ ଦିଆଯିବ । ଏ ନେଇ ଆଜି ସ୍ୱାସ୍ଥସେବା ନିର୍ଦ୍ଦେଶାଳୟ ସହ ଆୟୁଷ ନିର୍ଦ୍ଦେଶାଳୟ ମଧ୍ୟରେ ଏକ ଚୁକ୍ତି ସ୍ୱାକ୍ଷରିତ ହୋଇଛି । ଆସନ୍ତା ୩ ବର୍ଷରେ ପ୍ରତିବର୍ଷ ଶହେ ଲେଖାଏଁ ସମୁଦାୟ ୩ଶହ ଡିସ୍ପେନସାରିକୁ ନବୀକରଣ କରାଯିବ । ଏ ନେଇ କେନ୍ଦ୍ର ଆୟୁଷ ମନ୍ତ୍ରଣାଳୟ ପକ୍ଷରୁ ମଞ୍ଜୁରି ମିଳିଥିବା ଜଣାପଡ଼ିଛି ।
ରାଜ୍ୟରେ ଜାତୀୟ ସ୍ୱାସ୍ଥ ମିସନ୍ ଅଧୀନରେ ମଧ୍ୟ ଏଲୋପ୍ୟାଥିକ ଡିସ୍ପେନସାରିଗୁଡ଼ିକ ନବୀକରଣ କରାଯାଇ ସ୍ୱାସ୍ଥ ଓ ଆରୋଗ୍ୟ କେନ୍ଦ୍ରର ରୂପ ଦିଆଯାଇଛି । ତେଣୁ ରାଜ୍ୟରେ ଆୟୁଷର ୪ଶହଟି ଡିସ୍ପେନସାରି ଥିବା ବେଳେ ଏ ସବୁକୁ ମଧ୍ୟ ପରିବର୍ତ୍ତନ କରିବା ଲାଗି ଯୋଜନା ହୋଇଛି । ଚଳିତ ୨୦୨୦/୨୧ବର୍ଷରେ ୧୦୦ଟି ଡିସ୍ପେନସାରି ନବୀକରଣ କରାଯିବ ବୋଲି ଯୋଜନା ହୋଇଛି । ରାଜ୍ୟରେ ୨ଶହଟି ଲେଖାଏଁ ଆୟୁର୍ବେଦିକ ଓ ହୋମିଓପ୍ୟାଥିକ ଡିସ୍ପେନସାରି ରହିଥିବା ବେଳେ ନୂଆ ରୂପ ପାଇବ । ଏହି କେନ୍ଦ୍ରରେ ଯୋଗ ଶିକ୍ଷାଠାରୁ ଆରମ୍ଭ କରି ସାଧାରଣ ପାଥୋଲୋଜି ପରୀକ୍ଷା, ଔଷଧୀୟ ବଗିଚା ଓ ଆୟୁଷ ସଂପର୍କରେ ସଚେତନତା ବାର୍ତା ରହିବ । ଯୋଗ ହଲ୍ ନିର୍ମାଣ କରାଯାଇ ଲୋକମାନଙ୍କୁ ଯୋଗ ଶିକ୍ଷା ଦିଆଯିବାକୁ ଯୋଜନା ରହିଛି । ଏହାସହ ଏହି ସ୍ୱାସ୍ଥ ଓ ଆରୋଗ୍ୟ କେନ୍ଦ୍ର ଏକ ରେଫରାଲ ହସ୍ପିଟାଲ ଭଳି କାର୍ଯ୍ୟ କରିବ । ଏପରିକି ଆଶା ଓ ଏଏନ୍ଏମ୍ଙ୍କ ସହାୟତାରେ ନିୟମିତ ଟିକାକରଣ ଯେପରି ହୋଇପାରିବ, ତାହାର ମଧ୍ୟ ବ୍ୟବସ୍ଥା କରାଯିବ । ମହିଳା/ପୁରୁଷ ସ୍ୱାସ୍ଥ କର୍ମୀମାନଙ୍କୁ ଏନ୍ସିଡି ବା ଅଣ ସଂକ୍ରାମକ ରୋଗ ସଂପର୍କିତ ତାଲିମ୍ ମଧ୍ୟ ପ୍ରଦାନ କରାଯାଇ ଅଧିକ ସଚେତନ କରାଯିବାକୁ ଯୋଜନା କରାଯାଇଛି ।
ଆୟୁଷ ନିର୍ଦେଶକ ତ୍ରିଲୋଚନ ମାଝୀ କହିଛନ୍ତି, ପୂର୍ବରୁ ଏସବୁ ଡିସ୍ପେନସାରି ଏକପ୍ରକାର ଅବହେଳିତ ହୋଇ ରହିଥିଲା । ତେବେ ନବୀକରଣ କରାଯିବା ପରେ ଏହା ଅଧିକ କ୍ରିୟାଶୀଳ ହେବ । ପ୍ରତିବର୍ଷ ଶହେଟି ଲେଖାଏଁ ଆୟୁଷ ଡିସ୍ପେନସାରିକୁ ନବୀକରଣ କରିବା ଲାଗି ଲକ୍ଷ୍ୟ ରଖାଯାଇଛି । ଏଥିରେ କୌଣସି ନୂତନ ନିଯୁକ୍ତି ଦିଆଯିବ ନାହିଁ । ପୂର୍ବରୁ ଯେଉଁ କର୍ମଚାରୀ ରହିଛନ୍ତି, ସେମାନଙ୍କୁ ଅଧିକ ତାଲିମ୍ ଦିଆଯିବ । ତେବେ ଯୋଗାଭ୍ୟାସ ପାଇଁ ପୁରୁଷ/ମହିଳା ଯୋଗ ପ୍ରଶିକ୍ଷକ ଓ ପ୍ରଦର୍ଶକଙ୍କୁ ନିଯୁକ୍ତି ଦେବା ଲାଗି ସ୍ଥିର ହୋଇଛି । ପର୍ଯ୍ୟାୟକ୍ରମେ ସେମାନଙ୍କୁ ନିଯୁକ୍ତି ଦିଆଯିବ ବୋଲି ସେ କହିଛନ୍ତି ।
