ଟଙ୍କାରେ ଟିଆର୍ପି କାରବାର୍ ! ୫୦ ଲକ୍ଷ ପରିବାର ପାଇଁ ରହିଛି ମାତ୍ର ୧୫ଶହ ପିପୁଲ ମିଟର l
ସତ୍ୟଶିଖା (ଭୁବନେଶ୍ୱର) ୧୦.୧୦.୨୦୨୦ : ଜାତୀୟସ୍ତରରେ ଟିଆର୍ପି (ଟେଲିଭିଜନ ରେଟିଂ ପଏଣ୍ଟ) ସ୍କାମ୍କୁ ନେଇ ହଟଚମଟ ସୃଷ୍ଟି ହୋଇଛି । ଟଙ୍କା ଦେଇ ଟିଆର୍ପି କିଣାଯାଉଛି । ଏଭଳି ଅଭିଯୋଗ ଉଠିବା ପରେ ବାର୍କ ରେଟିଂର ବିଶ୍ୱସନୀୟତାକୁ ନେଇ ବିରାଟ ପ୍ରଶ୍ନବାଚୀ ଛିଡ଼ା ହେଲାଣି । ଓଡ଼ିଶାରେ ମଧ୍ୟ ଅନୁରୂପ ଭାବେ ଟିଆର୍ପି ଟ୍ୟାମ୍ପରିଂ ହେଉଥିବା ଜଣାପଡ଼ିଛି ।
ବାର୍କ (ବ୍ରଡ୍କାଷ୍ଟ ଅଡିଏନ୍ସ ରିସର୍ଚ୍ଚ କାଉନସିଲ୍) ନାମକ ଏକ ସ୍ୱାଧୀନ ତଥା ଘରୋଇ ସଂସ୍ଥା ଏହି ଟିଆର୍ପି ମାପିଥାଏ । ଏହା ନମୁନା ଭାବେ ଅଳ୍ପ କିଛି ଦର୍ଶକଙ୍କ ଘରେ ଏକ ପିପୁଲ ମିଟର ଲଗାଇଛି ।
ଓଡ଼ିଶାରେ ପାଖାପାଖି ୫୦ଲକ୍ଷ ପରିବାର ଟିଭି ଦେଖନ୍ତ । କିନ୍ତୁ ଓଡ଼ିଶାରେ ଟିଆର୍ପି ମାପିବାକୁ ମାତ୍ର ୧୫୦୦ ପିପୁଲ୍ ମିଟର ଲଗାଯାଇଛି । ଜିଲ୍ଲାୱାରୀ ହିସାବ କଲେ ପ୍ରତି ଜିଲ୍ଲାରେ ମାତ୍ର ୫୦ଟି ପିପୁଲ ମିଟର ଲାଗିଛି । ଭୁବନେଶ୍ୱର ଭଳି ସହରରେ ପ୍ରାୟ ୧୨ଲକ୍ଷରୁ ଅଧିକ ହୋଇଥିବାବେଳେ ୩ଲକ୍ଷ ପରିବାର ରହୁଛନ୍ତି । ଏହାବାଦ୍ ଅନେକ ସରକାରୀ ଓ ଘରୋଇ ଅଫିସ୍ ରହିଛି । ପୂରା ଭୁବନେଶ୍ୱରରେ ଟିଆର୍ପି ମାପିବାକୁ ମାତ୍ର ୫୦ଟି ପିପୁଲ ମିଟର ଅଛି । ଅର୍ଥାତ୍ ୧୨ଲକ୍ଷ ପରିବାରର କେଉଁ ଚ୍ୟାନେଲ ପସନ୍ଦ ତାହା ଏହି ୫୦ଟି ମିଟରରୁ ମାପି କୁହାଯାଉଛି । ସମାନ ଭାବେ ୪ କୋଟି ଓଡ଼ିଶାବାସୀଙ୍କ ପସନ୍ଦର ଚ୍ୟାନେଲ୍ ବା ସୋ’ କ’ଣ ତାହା ମାତ୍ର ୧୫୦୦ ମିଟର ନିଷ୍ପତ୍ତି ନେଉଛି । ଏଭଳି ଉଦ୍ଭଟ ଓ ହାସ୍ୟାସ୍ପଦ ଢଙ୍ଗରେ ଟିଆର୍ପି ମପାଯାଉଛି ।
ଟିଆର୍ପି ମାପିବାକୁ ଲାଗିଥିବା ପିପୁଲ ମିଟର ସହ ଇଣ୍ଟରନେଟ୍ ବି ସଂଯୋଗ ହୋଇଥାଏ । ପିପୁଲ ମିଟର ଲାଗିଥିବା ଦର୍ଶକଙ୍କୁ ଏକ ସ୍ୱତନ୍ତ୍ର ରିମୋଟ୍ ଦିଆଯାଇଥାଏ । ଦର୍ଶକଙ୍କ ଘରର ପ୍ରତି ସଦସ୍ୟଙ୍କ ପାଇଁ ଏହି ରିମୋଟ୍ରେ ଭିନ୍ନ ଭିନ୍ନ ବଟନ୍ ଥାଏ । ପରିବାରର କେଉଁ ସଦସ୍ୟ ନିଜ ପସନ୍ଦ ମୁତାବକ କେଉଁ ଚ୍ୟାନେଲ୍ ବା କେଉଁ ସୋ’ ଦେଖୁଛନ୍ତି ତାହା ସେମାନେ ଦବାଉଥିବା ବଟନ୍ରୁ ଜଣାପଡ଼ିଥାଏ । ବାର୍କ ଏହାକୁ ରେକର୍ଡ କରିବା ସହ ପ୍ରତି ଗୁରୁବାର ଚ୍ୟାନେଲ୍ମାନଙ୍କର ର୍ୟାଙ୍କିଙ୍ଗ୍ ତାଲିକା ପ୍ରକାଶ କରିଥାଏ । ସାରା ଦେଶରେ ମାତ୍ର ୪୪ ହଜାର ଲୋକଙ୍କ ଘରେ ଏହି ପିପୁଲ ମିଟର ଲାଗିଛି ।
ଓଡ଼ିଶାର ଟିଆର୍ପି ଖେଳ ପଛରେ ନିର୍ଦ୍ଦିଷ୍ଟ କିଛି ଚ୍ୟାନେଲ୍ ଓ କେବଲ ଅପରେଟର୍ସ ଅଛନ୍ତି । ଓଡ଼ିଶାରେ ଦୁଇଟି କେବଲ ଅପରେଟର୍ସଙ୍କ ନିଜସ୍ୱ ବ୍ରଡ୍କାଷ୍ଟିଂ (ପ୍ରସାରଣ) ସହ ଡିଷ୍ଟ୍ରିବ୍ୟୁସନ୍ (ବିତରଣ) ମାଧ୍ୟମ ରହିଛି । ସବୁଠୁ ଅଧିକ ଟିଆର୍ପି ବୋଲି ଦାବି କରୁଥିବା ଏକ ଚ୍ୟାନେ୍ଲ ମାଲିକାନାରେ ଏକ କେବଲ୍ ଟେଲିଭିଜନ୍ ସଂସ୍ଥା ମଧ୍ୟ ରହିଛି ।
ସେହିଭଳି ନମ୍ବର-୨ ବୋଲି ଦାବି କରୁଥିବା ଅନ୍ୟ ଏକ ସଂସ୍ଥାର ମାଲିକାନାରେ ଉଭୟ କେବଲ୍ ଟିଭି ଓ ଚ୍ୟାନେଲ୍ ରହିଛି । ବିତରଣ କ୍ଷେତ୍ରରେ କାମ କରୁଥିବାରୁ ଉଭୟ ସଂସ୍ଥା ଦର୍ଶକଙ୍କ ସହ ସିଧାସଳଖ ସମ୍ପର୍କରେ ରହୁଛନ୍ତି । ବାର୍କ କେଉଁ ଦର୍ଶକଙ୍କ ଘରେ ପିପଲ୍ ମିଟର ଲଗାଇଛି ତାହା ସେମାନେ ଅବଗତ । ଏଣୁ ଏଠାରେ ଟିଆର୍ପି ଟାମ୍ପରିଂର ସିଧାସଳଖ ଆଶଙ୍କା ସୃଷ୍ଟି ହୋଇଛି । ପିପୁଲ ମିଟର ଲାଗିଥିବା ଲୋକଙ୍କୁ ଟଙ୍କା ଦେଇ ଓ ବିଭିନ୍ନ ବାଟରେ ପ୍ରଲୋଭିତ କରି ଟିଭି ଅଧିକ ସମୟ ଚଲାଇବାକୁ କୁହାଯାଉଛି । ଏଭଳି ଟିଆର୍ପି କିଣାଯାଉଥିବା ନେଇ ଅତୀତରେ ଅନେକ ଅଭିଯୋଗ ଉଠିଛି । ବାର୍କ ବୈଠକରେ ଅନେକ ଥର ଚ୍ୟାନେଲ୍ମାନେ ଏହି ଅଭିଯୋଗ ଉଠାଇଛନ୍ତି । ଓଡ଼ିଶାରେ ଟିଆର୍ପି କେଳେଙ୍କାରୀର ତୁରନ୍ତ ତଦନ୍ତ କରିବାକୁ ଦାବି ହୋଇଛି l
