ସତ୍ୟଶିଖା (ନୂଆଦିଲ୍ଲୀ) ୦୮.୧୦.୨୦୨୦ : ଆମାଜନ ଇଣ୍ଡିଆ ଜରିଆରେ ବର୍ତ୍ତମାନ ଟ୍ରେନ ଟିକେଟ ମଧ୍ୟ ବୁକ କରିପାରିବେ । ଏଥିପାଇଁ ଆମାଜନ ଓ I.R.C.T.C ମଧ୍ୟରେ ଚୁକ୍ତି ହୋଇଛି । ଆମାଜନ ନିଜ ୱେବସାଇଟରେ ଟିକେଟ ରିଜର୍ଭେସନ କରାଇଲେ ପ୍ରଥମ ଟିକେଟ ବୁକିଂରେ ୧୦ ପ୍ରତିଶତ କ୍ୟାସବ୍ୟାକ ଦେବ । ପ୍ରାଇମ ମେମ୍ବର୍ସଙ୍କୁ ୧୨ ପ୍ରତିଶତ କ୍ୟାସବ୍ୟାକ ମିଳିବ । କ୍ୟାସବ୍ୟାକ ଅଫର ସୀମିତ ସମୟ ପାଇଁ ରହିଛି । ନୂଆ ଫିଚର ଅନୁଯାୟୀ, ପ୍ରାରମ୍ଭିକ ଅବଧି ପାଇଁ କମ୍ପାନୀ ସେବା ଓ ପେମେଣ୍ଟ ଗେଟୱେ ଟ୍ରାଞ୍ଜାକ୍ସନ ଚାର୍ଜରୁ ରିହାତି ମିଳିବ । ଏହା ଏକ ଲିମିଟେଡ଼ ପିରିୟଡ଼ ଅଫର । ଆମାଜନର ଟ୍ରେନ ଟିକେଟ ବୁକିଂ ଫିଚର ଏଣ୍ଡ୍ରଏଡ ଓ ଆଇଓଏସ ଉଭୟ ଆପ ୟୁଜର୍ସଙ୍କ ପାଇଁ ଉପଲବ୍ଧ ।
ଆମାଜନ ପ୍ଲାଟଫର୍ମରେ ଆପଣ ଥରକେ ୬ଜଣଙ୍କ ପାଇଁ ଟ୍ରେନ ଟିକେଟ ବୁକ କରିପାରିବେ । ତତ୍କାଳ ଟିକେଟ ବୁକିଂ ମାମଲାରେ ଗୋଟିଏ ଟ୍ରାଞ୍ଜାକ୍ସନରେ ୪ଜଣଙ୍କ ପାଇଁ ଟିକେଟ ବୁକ କରାଯାଇପାରିବ । ଯାତ୍ରାର ୧୨୦ ଦିନ ପୂର୍ବରୁ ଆଡ଼ଭାନ୍ସ ଟିକେଟ ବୁକ କରିପାରିବେ । ପାଖାପାଖି ଦେଢ଼ ବର୍ଷ ପୂର୍ବରୁ ଆମାଜନ ନିଜ ପ୍ଲାଟଫର୍ମ ଜରିଆରେ ଫ୍ଲାଇଟ ଟିକେଟ ବୁକ କରିବା ସୁବିଧା ଆରମ୍ଭ କରିଥିଲା । ଏହାପରେ ୨୦୧୯ ନଭେମ୍ବରରେ ବସ ଟିକେଟ ବୁକିଂ ଫିଚର ଆଡ଼ କରିଥିଲା । ବର୍ତ୍ତମାନ କମ୍ପାନୀ ଗ୍ରାହକଙ୍କୁ ରିଜର୍ଭ ଟ୍ରେନ ଟିକେଟ ବୁକ କରିବା ସୁବିଧା ଦେଉଛି । ଆମାଜନ ପେ ରେ ଅନ୍ୟ ଏକ ଟ୍ରାଭେଲ କାଟାଗୋରୀକୁ ସଂଯୋଜିତ କରାଯାଇଛି ଯେଉଁଠି ଗ୍ରାହକଙ୍କୁ ଫ୍ଲାଇଟ, ବସ ଓ ଟ୍ରେନ ଟିକେଟ ବୁକିଂ ପାଇଁ ୱାନ୍ ସ୍ଟପ୍ ଶପ୍ ପେଶ କରାଯାଇଥାଏ । ଏଥରୁ ଟିକେଟ ବୁକ କଲେ ଆପଣଙ୍କୁ ଏହି ଆପରେ ପିଏନଆର ଷ୍ଟେଟସ ଚେକିଂ, ଲାଇଭ ଟ୍ରେନ ଟ୍ରାକିଙ୍ଗ, ଟିକେଟ ଡାଉନଲୋଡିଂ, କ୍ୟାସଲିଙ୍ଗ ସୁବିଧା ମଧ୍ୟ ମିଳିବ । ଆମାଜନ ପେ ରୁ ପେମେଣ୍ଟ କରୁଥିବା ଗ୍ରାହକଙ୍କୁ ଟିକେଟ କ୍ୟାନସେଲ ହେବାରେ ତତ୍କାଳ ରିଫଣ୍ଡ ମିଳିବ ।
ଆମାଜନ ପେ ବାଲାନ୍ସ ବ୍ୟବହାର କରି ବୁକ କରିଥିବା ଟ୍ରେନ ଟିକେଟ କ୍ୟାନସେଲ କଲେ କିମ୍ବା ବୁକିଂ ଫେଲ ହେଲେ ଗ୍ରାହକଙ୍କୁ ତୁରନ୍ତ ରିଫଣ୍ଡ ମିଳିବ । ଆମାଜନ ଟ୍ରେନ ଟିକେଟ ବୁକିଂ ଫିଚର ଏଣ୍ଡ୍ରଏଡ଼ ଓ ଆଇଓଏସ ଉଭୟ ଆପ ୟୁଜର୍ସଙ୍କ ପାଇଁ ଉପଲବ୍ଧ । ଆମାଜନ ଆପରେ ଆମାଜନ ପେ ଟ୍ୟାବରେ ଟ୍ରାଭେଲ କାଟାଗୋରୀ ଅନୁସାରେ ଫ୍ଲାଇଟ, ଟ୍ରେନ, ବସ ଟିକେଟ ବୁକିଂ ଫିଚର ଉପଲବ୍ଧ । ୟୁଜର୍ସ ସହଜରେ ରେଳ ଯାତ୍ରା ରୁଟ, ଯାତ୍ରା ତାରିଖ ଆଦି ସିଲେକ୍ଟ କରିପାରିବେ ଏବଂ ସମସ୍ତ ଉପଲବ୍ଧ ଟ୍ରେନ ତାଲିକା ମଧ୍ୟ ଚେକ କରିପାରିବେ । ପେମେଣ୍ଟ ପାଇଁ ଆମାଜନ ପେ/ଆମାଜନ ପେ I.C.I.C.I କ୍ରେଡିଟ କାର୍ଡ କିମ୍ବା ଅନ୍ୟ ଡିଜିଟାଲ ପେମେଣ୍ଟ ମାଧ୍ୟମରେ କରିପାରିବେ । ଆମାଜନରୁ ବୁକ କରିଥିବା ଟ୍ରେନ ଟିକେଟ କ୍ୟାନସେଲ ପାଇଁ ୟୋର ଅର୍ଡର ସେକ୍ସନକୁ ଯାଇ କରିପାରିବେ ।
