ଇକୋ-ରିଟ୍ରିଟର ମଜା ନେଉଛନ୍ତି ପର୍ଯ୍ୟଟକ

ସତ୍ୟଶିଖା ୧୭/୧୨/୨୦୨୦ : ମହାନଦୀ, ବ୍ରାହ୍ମଣୀ ଓ ବୈତରଣୀ ନଦୀର ତ୍ରିକୋଣା ଭୂମିରେ ଗଢି ଉଠିଥିବା ଭିତରକନିକାର ପ୍ରାକୃତିକ ପରିବେଶ ବାସ୍ତବିକ ମନମୁଗ୍ଧକର । ଭିତରକନିକାର ବଉଳା କୁମ୍ଭୀର, ରଂଗବେରଂଗର ପକ୍ଷୀ, ହେନ୍ତାଳ ଇଚ୍ଚ ସାରା ବିଶ୍ୱର ପ୍ରକୃତିପ୍ରେମୀ ପ୍ରଥମ ପସନ୍ଦ । ଚଳିତ ବର୍ଷ ପ୍ରଥମଥର ରାଜ୍ୟ ସରକାରଙ୍କ ପକ୍ଷରୁ ଏଠାରେ ଇକୋ ରିଟ୍ରିଟ ବ୍ୟବସ୍ଥା କରାଯାଇଥିବା ବେଳେ ପର୍ଯ୍ୟଟକ ତମ୍ବୁ ତଳେ ରହି ରାତି କାଟିବା ସହ ପ୍ରାକୃତିକ ସନ୍ଦୌଯ୍ୟରେ ମଜା ଉଠାଉଛନ୍ତି ।୧୯୭୫ରେ ଭିତରକନିକାର ୬୭୨ ବର୍ଗ କିମି ଅଂଚଳକୁ ରାଜ୍ୟ ସରକାର ଅଭୟାରଣ୍ୟ ଭାବେ ଘୋଷଣା କରିବା ପରେ ୧୯୯୮ରେ ଏହାକୁ ଜାତୀୟ ଉଦ୍ୟାନ ରୂପେ ଘୋଷଣା କରାଯାଇଛି । ବଉଳା କୁମ୍ଭୀରଙ୍କ ଅମରାବତି ପ୍ରାକୃତିକ ବିଭବରେ ଭରପୁର ପ୍ରକୃତିରାଣୀ ଭିତରକନିକାରେ ଏବେ ପର୍ଯ୍ୟଟକଙ୍କ ଭିଡ । ପର୍ଯ୍ୟଟନ ଋତୁ ଆସିଲେ ଜାତୀୟ ଉଦ୍ୟାନ ଭିତରକନିକା ବୁଲି ଆସିବା ପାଇଁ ଦେଶୀ ବିଦେଶୀ ପର୍ଯ୍ୟଟକଙ୍କ ମନରେ ଉତ୍ସାହ ଦେଖାଦେଇଥାଏ । ଚଳିତବର୍ଷ କରୋନା ମହାମାରୀ ଯୋଗୁଁ ଦୀର୍ଘ ୮ମାସ ଭିତରକନିକା ବନ୍ଦ ରହିବା ପରେ ଏବେ କୋଭିଡ କଟକଣା ଭିତରେ ପର୍ଯ୍ୟଟକଙ୍କ ପାଇଁ ଭିତରକନିକା ଖୋଲାଯାଇଛି ।ବେଶ ମନଭରି ପର୍ଯ୍ୟଟକମାନେ ଭିତରକନିକାର ଜୈବ ବିବିଧତା ଓ ପ୍ରାକୃତିକ ସୌନ୍ଦର୍ଯ୍ୟକୁ ମନଭରି ଉପଭୋଗ କରୁଛନ୍ତି । ଚଳିତ ବର୍ଷ ଭିତରକନିକାରେ ପ୍ରଥମଥର ଇକୋ ରିଟ୍ରିଟ ଅନୁଷ୍ଠିତ ହୋଇଥିବାରୁ ପର୍ଯ୍ୟଟକଙ୍କ ଭିଡ ଦେଖିବାକୁ ମିଳିଛି । ପାଟ୍ଟଶାଳା ନଦୀର ସୁଦୀର୍ଘ ନୀଳ ଜଳରାଶିରେ ବୋଟରେ ବସି ନୈସର୍ଗିକ ଶୋଭାରାଶିକୁ ଉପଭୋଗ କରୁଛନ୍ତି । ଭିତରକନିକାର ପ୍ରାକୃତିକ ଶୋଭା ଉପଭୋଗ କରିବା ସହ ବିଳାସପୂର୍ଣ୍ଣ କଟେଜରେ ତମ୍ବୁ ତଳେ ରାତି ବିତାଇବାକୁ ପର୍ଯ୍ୟଟକଙ୍କ ଆଗ୍ରହ ବଢୁଛି । ପ୍ରଥମ ୩ଦିନ ପର୍ଯ୍ୟଟକଙ୍କ ଭିଡ ନଥିବା ବେଳେ ଦୁଇ ଦିନ ହେଲା ହାଉସଫୁଲ ରହିଛି । ତମ୍ବୁ ତଳେ ରାତିି ବିତାଇବା ସହ ଦୁଃସାହାସିକ କ୍ରୀଡା ଓ ଭାସମାନ ରେଷ୍ଟୁରାଂଟର ମଜା ନେବା ପାଇଁ ପର୍ଯ୍ୟଟକଙ୍କ ମଧ୍ୟରେ ଏକ ପ୍ରକାର ପ୍ରତିଯୋଗିତା ଆରମ୍ଭ ହୋଇଛି ।ନଳିତାପାଟିଆରେ ୨୧ଟି ବିଳାସପୂର୍ଣ୍ଣ କଟେଜ ନିର୍ମାଣ ହୋଇଛି । ଇକୋ ରିଟ୍ରିଟକୁ ଆସୁଥିବା ପର୍ଯ୍ୟଟକଙ୍କ ପାଇଁ ୩ ପ୍ରକାରର କଟେଜ ଉପଲବ୍ଧ ହେଉଛି । ୨ଜଣ ପର୍ଯ୍ୟଟକ ଇକୋ ରିଟ୍ରିଟର ମଜା ସହିତ ଖାଦ୍ୟ, ପାନୀୟ ଓ ଭିତରକନିକା ବୁଲିବା ପାଇଁ ସର୍ବନିମ୍ନ ୯ହଜାର ଟଙ୍କା ଦେବାକୁ ପଡୁଛି । ଇକୋ ରିଟ୍ରିଟରେ ପ୍ରିମିୟମ ସୁଇସ କଟେଜ, ରୟାଲ କଟେଜ ଓ ରୟାଲ ଫ୍ୟାମିଲି କଟେଜ ନିର୍ମାଣ କରାଯାଇଛି । ଦିନ ବେଳା କେନ୍ଦ୍ରାପଡା ଜିଲ୍ଲାର ବିଭିନ୍ନ ପର୍ଯ୍ୟଟନସ୍ଥଳ ବୁଲି ଦେଖି ସଂଧ୍ୟାରେ ଭାସମାନ ରେଷ୍ଟୁରାଂଟରେ କ୍ୟାଣ୍ଡେଲ ଡିନର ସହ ନାଚଗୀତରେ ଝୁମି ଯାଉଛନ୍ତି ପର୍ଯ୍ୟଟକ ।