ସତ୍ୟଶିଖା(ଭୁବନେଶ୍ୱର) ୧୫.୦୭.୨୦୨୧: ରାତି ପାହିଲେ ସରିବ ଆଂଶିକ ଲକ୍ଡାଉନ୍ ଅବଧି। ଶୁକ୍ରବାର ସକାଳ ୬ଟାରେ ସରିବ ରାଜ୍ୟ ସରକାରଙ୍କ ପକ୍ଷରୁ ଘୋଷିତ ଆଂଶିକ ଲକ୍ଡାଉନ୍ ଅବଧି । ରାଜ୍ୟ ସରକାରଙ୍କ ପକ୍ଷରୁ ସମ୍ପୂର୍ଣ୍ଣ ଅନ୍ଲକ୍ ନା କାଟାଗୋରୀ ଏ, ବି ଫର୍ମୁଲାରେ ପୁଣି ଜାରି ହେବ କଟକଣା ତାହା ଉପରେ ସମସ୍ତଙ୍କ ନଜର ରହିଛି । ଆଜି ଏନେଇ ଘୋଷଣା କରିପାରନ୍ତି ସରକାର। ତେବେ କଣ ରୂପରେଖ ରହିବ ତାକୁ ନେଇ ଚାଲିଛି ତର୍ଜମା। ତେବେ ରାଜ୍ୟରେ ପ୍ରତ୍ୟେକ ଦିନ ଆକ୍ରାନ୍ତ ଚିହ୍ନଟ ହେଉଛନ୍ତି। ଏହାସହ ମୃତ୍ୟୁ ସଂଖ୍ୟାରେ ବ୍ରେକ ଲାଗୁନି। ଲକଡାଉନ ଜାରି ରହିଛି। ଏଭଳି ସ୍ଥିତିରେ ଜୀବନ ଜୀବିକା ଉପରେ କରୋନାର ପ୍ରଭାବ ପଡ଼ିଥିବା ଦେଖିବାକୁ ମିଳିଛି।
ଶୁକ୍ରବାର ସକାଳୁ ଆଂଶିକ ଲକ୍ଡାଉନ୍ ଅବଧି ଶେଷ ହେଉଥିବାରୁ ଗୁରୁବାର ଆଗାମୀ କାର୍ଯ୍ୟପନ୍ଥା ସମ୍ପର୍କରେ ରାଜ୍ୟ ସରକାରଙ୍କ ପକ୍ଷରୁ ଆନୁଷ୍ଠାନିକଭାବେ ଘୋଷଣା କରାଯିବ । ରାଜ୍ୟରେ ଦୈନିକସଂକ୍ରମଣ କମୁଥିବା ବେଳେ ଲକଡାଉନ୍ କୋହଳ ହେବା ନେଇ ସାଧାରଣରେ ଆଶା ପ୍ରକାଶ ପାଇଛି । ତେବେ ଉପକୂଳ ଜିଲ୍ଲା ବିଶେଷକରି କଟକ ଓ ଖୋର୍ଦ୍ଧା ଜିଲ୍ଲାରେ ସଂକ୍ରମଣ ସବୁଠୁ ଅଧିକ ରହୁଥିବାରୁ ସରକାରଙ୍କ ଫୋକସରେ ରହିଛି ଏହି ଦୁଇ ଜିଲ୍ଲା । ଏହି ଦୁଇ ଜିଲ୍ଲାକୁ ବାଦ୍ ଦେଇ ବାକି ୨୮ଟି ଜିଲ୍ଲାରେ ଲକ୍ଡାଉନ୍ ଉଠାଯାଇପାରେ ବୋଲି ଚର୍ଚ୍ଚା ହେଉଛି । ଏହି ଦୁଇଟି ଜିଲ୍ଲାରେ ଲକଡାଉନର ରୂପରେଖ କ’ଣ ରହିବ ତାକୁ ନେଇ ଏବେ ତର୍ଜମା ଚାଲିଛି।
