ସତ୍ୟଶିଖା( ଭୁବନେଶ୍ୱର )୧୭.୧୦.୨୦୨୨: ଆମେରିକା ଓ ମରକ୍କୋ ଠାରୁ ପରାଜିତ ହେବା ପରେ ଭାରତୀୟ ୧୭ ବର୍ଷରୁ କମ୍ ମହିଳା ଦଳ କ୍ୱାର୍ଟର ଫାଇନାଲ ଦୌଡ଼ରୁ ବାଦ ପଡ଼ି ସାରିଛି । ସୋମବାର କଳିଙ୍ଗ ଷ୍ଟାଡିୟମରେ ଭାରତ ଶେଷ ମ୍ୟାଚ୍ ଶକ୍ତିଶାଳୀ ବ୍ରାଜିଲ ସହ ଖେଳିବ । ଏହି ମ୍ୟାଚ୍ ସନ୍ଧ୍ୟା ୮ଟାରୁ ଆରମ୍ଭ ହେବ । କଳିଙ୍ଗରେ ଗ୍ରୁପ୍ ଏ’ର ୪ଟି ମ୍ୟାଚ୍ ଗତ ୧୧ ଓ ୧୪ ତାରିଖରେ ଖେଳ ଶେଷ ହୋଇଛି । ସୋମବାର ଶେଷ ଦୁଇ ମୁକାବିଲା ପରେ ଭୁବନେଶ୍ୱର ଭେନ୍ୟୁରେ ଖେଳ ଶେଷ ହେବ । ଅପରାହ୍ଣ ୪.୩୦ ମିନିଟରୁ ଗ୍ରୁପ୍-ବି’ର ନାଇଜେରିଆ ଓ ଚିଲି ମଧ୍ୟରେ ପ୍ରଥମ ମ୍ୟାଚ୍ ଖେଳାଯିବ । ରାତିରେ ଭାରତ ଓ ବ୍ରାଜିଲ ସାମ୍ନାସାମ୍ନି ହେବେ ।
ପୂର୍ବ ଦୁଇ ମ୍ୟାଚ୍ରେ ଭାରତ ଶୋଚନୀୟ ଭାବେ ପରାଜିତ ହୋଇଥିଲା । ଆମେରିକା ବିପକ୍ଷରେ ପ୍ରଦର୍ଶନ ଅତି ନୈରାଶ୍ୟଜନକ ରହିଥିଲା । ଫଳରେ ଦଳ ୮ଟି ଗୋଲ ଖାଇଥିଲା । କିନ୍ତୁ ମରକ୍କୋ ବିପକ୍ଷରେ ପ୍ରଥମାର୍ଦ୍ଧରେ ଦଳ ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରୟାସ କରିଥିଲା । ଫଳରେ ଏହି ଭାଗ ଖେଳ ଗୋଲଶୂନ୍ୟ ରହିଥିଲା । ମାତ୍ର ଦ୍ୱିତୀୟ ଭାଗରେ ଘରୋଇ ଖେଳାଳି ନିଜର ପୂର୍ବ ପ୍ରଦର୍ଶନ ବଜାୟ ରଖିବାରେ ବିଫଳ ହୋଇଥିଲେ । ମରକ୍କୋ ଦଳ ଏହାର ସୁଯୋଗ ନେଇ ୩-୦ ଗୋଲରେ ବିଜୟୀ ହୋଇଥିଲା । ଭାରତ ଗତ ଦୁଇଟି ମ୍ୟାଚ୍ରେ ଗୋଲ ଖାତା ଖୋଲିବାରେ ବିଫଳ ରହିଛି । ଆୟୋଜକ ଭାବେ ଦଳ ପଦାର୍ପଣ ବିଶ୍ୱକପ୍ ଖେଳୁଛି । କିନ୍ତୁ ପଦାର୍ପଣରେ ଦଳ ସେମିତି କିଛି ଚମକ ଦେଖାଇ ପାରିଲା ନାହିଁ । ବ୍ରାଜିଲ ବିପକ୍ଷରେ ଭାରତ କେବଳ ସମ୍ମାନ ପାଇଁ ଖେଳିବ । ଶକ୍ତିଶାଳୀ ବ୍ରାଜିଲକୁ ପରାଜିତ କଲା ଭଳି ଭାରତୀୟ ଦଳର ସାମର୍ଥ୍ୟ ନାହିଁ । ବ୍ରାଜିଲ ଖେଳାଳିଙ୍କୁ ଟକ୍କର ଦେବାକୁ ହେଲେ ଉଭୟାର୍ଦ୍ଧରେ ପ୍ରତ୍ୟେକ ଭାରତୀୟ ଖେଳାଳିଙ୍କୁ ଶ୍ରେଷ୍ଠ ପ୍ରଦର୍ଶନ ଦେବାକୁ ପଡ଼ିବ ।
ଯଦିଓ ସୋମବାର ଘରୋଇ ଦଳ ଚାପମୁକ୍ତ ହୋଇ ଖେଳିବ, ତଥାପି ବ୍ରାଜିଲର ଡିଫେଣ୍ଡର, ମିଡ୍ଫିଲ୍ଡର ଓ ଫରୱାର୍ଡଙ୍କୁ ଭେଦ କରି ଆଗକୁ ବଢ଼ିବା ଏତେ ସହଜ ହେବ ନାହିଁ । ବ୍ରାଜିଲ ଖେଳାଳି ଗତ ଆମେରିକା ବିପକ୍ଷ ମ୍ୟାଚ୍ରେ ଯେଉଁଭଳି ପ୍ରଦର୍ଶନ କଲେ ତାହା ଅତି ପ୍ରଶଂସନୀୟ ଥିଲା । ଫଳରେ ଏହି ମ୍ୟାଚ୍ ୧-୧ ଗୋଲରେ ଡ୍ର’ରେ ଶେଷ ହୋଇଥିଲା । ବିଶ୍ୱକପ୍ ଆରମ୍ଭ ହେବା ପୂର୍ବରୁ ଭାରତୀୟ କୋଚ୍ ଥୋମାସ ଡେନର୍ବି ଅତି ଦମ୍ଭର ସହ ଯୁକ୍ତି ବାଢ଼ୁଥିଲେ ଯେ ଘରୋଇ ଦଳ କ୍ୱାର୍ଟର ଖେଳିବ । କିନ୍ତୁ ଦଳ ଗ୍ରୁପ୍ ପର୍ଯ୍ୟାୟରୁ ଆଗକୁ ବଢ଼ିବା ଦୂରର କଥା ବିଶ୍ୱକପ୍ରେ ପ୍ରଥମ ଗୋଲ୍ ଦେବା ନେଇ ସଂଘର୍ଷ ଜାରି ରଖିଛି । ଶେଷ ମ୍ୟାଚ୍ରେ ଦଳ ଗୋଲ ଖାତା ଖୋଲିପାରୁଛି କି ନାହି ତାହା ଅପେକ୍ଷା ରହିଲା ।
ଚିଲା ବନାମ ନାଇଜେରିଆ ଗ୍ରୁପ୍ ବି’ରେ ଚିଲି ଓ ନାଇଜେରିଆ ଗୋଟିଏ ଲେଖାଏଁ ମ୍ୟାଚ୍ ଜିତିଛନ୍ତି । ଉଭୟ ଦଳ ଜର୍ମାନୀ ଠାରୁ ପରାଜିତ ହୋଇଛନ୍ତି । ଗତକାଲି ସନ୍ଧ୍ୟାରେ ଦୁଇ ଦଳ ଭୁବନେଶ୍ୱର ପହଞ୍ଚିଥିଲେ । ସପ୍ତମ ବାଟାଲିୟନ ଅଭ୍ୟାସ ଗ୍ରାଉଣ୍ଡରେ ଚିଲି ଓ ନାଇଜେରିଆ ଖେଳାଳି ଦୀର୍ଘ ସମୟରେ ଧରି ଆଜି ଅଭ୍ୟାସ କରିଥିଲେ । ଉଭୟ ଦଳ ପାଇଁ ମ୍ୟାଚ୍ ବେଶ୍ ଗୁରୁତ୍ୱପୂର୍ଣ୍ଣ ରହିଛି। ଯେଉଁ ଦଳ ବିଜୟୀ ହେବ ସେ ପରବର୍ତ୍ତୀ ରାଉଣ୍ଡକୁ ଉନ୍ନୀତ ହେବ । ତେଣୁ ଏହି ମ୍ୟାଚ୍ ବେଶ ଚିତାକର୍ଷକ ହେବ ବୋଲି ଆଶା କରାଯାଉଛି।
