ସତ୍ୟଶିଖା (ଭୁବନେଶ୍ୱର) ୨୪ /୧୨/୨୦୨୦ : ମା’ ଲକ୍ଷ୍ମୀ ଘରକୁ ଆସିବେ । ଶେଷ ଗୁରୁବାର ମାଣବସା ହୋଇଥିବାରୁ ଖାସ୍ ଏଇ ଉଦ୍ଦେଶ୍ୟ ନେଇ ଆଜିଠୁ ଆରମ୍ଭ ହୋଇଯାଇଛି ପ୍ରସ୍ତୁତି । ଘରଦ୍ବାର ପରିଷ୍କାର ସରିଛି। ରାତିରୁ ଚିତା ପକା ବି ସରିଛି । ମା’ଙ୍କ ପୂଜାର୍ଚ୍ଚନା ପାଇଁ ବଜାରରୁ ଆବଶ୍ୟକ ସାମଗ୍ରୀ ବି କିଣା ସରିଛି । ତେବେ ପୂଜା ସାମଗ୍ରୀ ଦର ଆଜି ମୁଣ୍ଡ ବିନ୍ଧା କରିଛି । ଧନର ଦେବୀଙ୍କୁ ପୂଜାର୍ଚ୍ଚନା କରିବା ପୂର୍ବରୁ ପକେଟ୍ରୁ ଉଚ୍ଚ ଅଙ୍କର ଧନ ବୁହାଇବାକୁ ପଡ଼ିଛି ।
ମା’ଙ୍କ ପ୍ରିୟ ଫୁଲ ପଦ୍ମ ଫୁଲର ଦର ଗୋଟା ପ୍ରତି ୮୦ ଟଙ୍କାରେ ବିକ୍ରି ହୋଇଛି । ଧାନ ମେଣ୍ଟା କେଉଁଠି ୫୦ ତ କେଉଁଠି ୭୦ ଟଙ୍କାରେ ବିକ୍ରି ହୋଇଛି । ମାଣ ବସାଇବା ପାଇଁ ଆବଶ୍ୟକ ନୂଆ ଧାନ ତଥା ଶୁକ୍ଳ ଧାନ ଗଉଣି ପ୍ରତି ୧୦୦ ଟଙ୍କାରେ ବିକ୍ରି ହୋଇଛି । ସେହିପରି ଆବଶ୍ୟକ ସୋରିଷ ଫୁଲ, କଣ୍ଟେଇ କୋଳି ଡାଳ, ଦୁବ, ବରକୋଳି ପତ୍ର, କଦଳୀପତ୍ର ମଧ୍ୟ କିଣିବାକୁ ପଡ଼ିଛି । କଂକ୍ରିଟ୍ ଜଙ୍ଗଲରେ ପରିଣତ ରାଜଧାନୀରେ ଏସବୁ ବି ଯେମିତି ଅମୂଲ ମୂଲ ହୋଇଯାଇଛି । ମାଣବସା ପୂଜା ସାମଗ୍ରୀ ବିକ୍ରି କରୁଥିବା ହରିହର ଖଟେଇ କହିଛନ୍ତି, ପଦ୍ମଫୁଲ ପୁରୀ ଓ କଟକ ଅଞ୍ଚଳରୁ ପ୍ରାୟ ଆସିଛି ।
ତେବେ ଚାହିଦା ମୁତାବକ ଫୁଲ ଆସିନାହିଁ । ତେଣୁ ଅଧିକ ଦର ଦେଇ କିଣିଥିବାରୁ ୮୦ ଟଙ୍କାରେ ବିକ୍ରି କରୁଥିବା ସେ କହିଛନ୍ତି । ସେହିଭଳି କଦଳୀପତ୍ରଠୁ ନେଇ ସୋରିଷ ଫୁଲ ପର୍ଯ୍ୟନ୍ତ ଏସବୁ ସହଜରେ ମିଳୁନଥିବାରୁ କଦଳୀପତ୍ର ଗୋଟା ୧୦ ଟଙ୍କାରେ ବିକ୍ରି ହେଉଥିବା ସେ କହିଛନ୍ତି । ଗ୍ରାହକ ସୁମିତ୍ରା ଦେଇ କହିଛନ୍ତି, ମା’ଙ୍କ ପୂଜାରେ କୌଣସି ପ୍ରକାର ସାଲିସ୍ କରିବାକୁ ଇଚ୍ଛା ନାହିଁ । ତେଣୁ ଦର ଯାହା ହେଲେ ବି କିଣିବାକୁ ପଡ଼ୁଛି । ଏମିତି ବି ଘର ପଛରେ ଆଉ ବାଡ଼ି ନଥିବାରୁ ଦୁବ ବରକୋଳି ପତ୍ରଠୁ ନେଇ କଦଳୀ ପତ୍ର ବି କିଣିବାକୁ ପଡ଼ୁଛି ବୋଲି ସେ କହିଛନ୍ତି ।
