ସତ୍ୟଶିଖା (ନୂଆଦିଲ୍ଲୀ) ୦୬/୦୨/୨୦୨୧ : ଆଜି ସାରା ଦେଶରେ ଚାଷୀଙ୍କ ଚକାଜାମ୍ ଆନ୍ଦୋଳନ । ମଧ୍ୟାହ୍ନ ୧୨ଟାରୁ ୩ଟା ପର୍ଯ୍ୟନ୍ତ ରାସ୍ତା ଅବରୋଧ କରିବେ, ଗାଡି ଚଳାଚଳ ବନ୍ଦ କରିବେ ଚାଷୀ। କେନ୍ଦ୍ର ସରକାରଙ୍କ ନୂଆ କୃଷି ଆଇନ୍ କୁ ବିରୋଧ କରି ଦେଶବ୍ୟାପୀ ‘ଚକା ଜାମ୍’ ଡାକରା ଦେଇଛି କୃଷକ ସଂଗଠନ । ତେବେ ଏଥିରୁ ବାଦ୍ ପଡ଼ିବ ରାଜଧାନୀ ଦିଲ୍ଲୀ, ଏନସିଆର୍ । ଅନ୍ୟ ସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଆନ୍ଦୋଳନ ହେବ ବୋଲି ସୂଚନା ଦେଇଛନ୍ତି ଭାରତୀୟ କିଷାନ ୟୁନିୟନ୍ ଅଧ୍ୟକ୍ଷ ରାକେଶ ଟିକାୟତ ।
ସିଂଘୁ ଏବଂ ଟିକରି ସୀମାରୁ ଚକାଜାମ ଆନ୍ଦୋଳନକୁ କୋର୍ଡିନେଟ୍ କରାଯିବ । ଏହା ବ୍ୟତିତ ନିଜ ନିଜ ଅଞ୍ଚଳରେ ଶାନ୍ତିପୂର୍ଣ୍ଣ ଭାବରେ ‘ଚକା ଜାମ୍ ’ କରିବା ପାଇଁ ସମର୍ଥକମାନଙ୍କୁ ଆହ୍ବାନ ଦେଇଛନ୍ତି ଚାଷୀ ନେତା ରାକେଶ ଟିକୈତ । ଦିଲ୍ଲୀ ସୀମାରେ ଚାଷୀ ଆନ୍ଦୋଳନ ୭୦ ଦିନରୁ ଅଧିକ ହେଲାଣି । ଆଜି ଦେଶବ୍ୟାପୀ ଚକାଜାମ ଡାକରା ଦିଆଯାଇଥିବା ବେଳେ ୩ ଘଣ୍ଟା ପାଇଁ ଯାନବାହନ ବନ୍ଦ କରାଯିବ । ଚାଲିଥିବା ଆନ୍ଦୋଳନକୁ ବଳ ଦେବା ଲାଗି ଭାରତୀୟ କୃଷକ ୟୁନିଅନ ଏଭଳି ଡାକରା ଦେଇଛି । ପଞ୍ଜାବ, ହରିୟାଣା ଏବଂ ପଶ୍ଚିମ ଉତ୍ତର ପ୍ରଦେଶରେ ସର୍ବାଧିକ ପ୍ରଭାବ ପଡିବାର ସମ୍ଭାବନା ରହିଛି ।
ଓଡିଶାରେ ନବ ନିର୍ମାଣ କୃଷକ ସଂଗଠନ ଚକା ଜାମ କରିବେ । ରାଜ୍ୟର ୨୩ଟି ଜିଲ୍ଲାରେ ଶାନ୍ତି ଶୃଙ୍ଖଳାର ସହ ଚକା ଜାମ କରାଯିବ । ଏହାକୁ ଆଖିରେ ରଖି ବ୍ୟାପକ ପୋଲିସ ବ୍ୟବସ୍ଥା କରାଯାଇଛି । କୃଷକ ସଂଗଠନ ଏବଂ କେନ୍ଦ୍ର ସରକାର ଭିତରେ ୧୨ ରାଉଣ୍ଡ ଆଲୋଚନା ସରିଛି, କିନ୍ତୁ କୌଣସି ନିଷ୍କର୍ଷ ବାହାରିପାରିନି । ଆଇନକୁ ସଂପୂର୍ଣ୍ଣ ପ୍ରତ୍ୟାହାର କରିବାକୁ ଅଡି ବସିଛନ୍ତି ଚାଷୀ । ଦିଲ୍ଲୀରେ ଚକାଜାମ ହେବନାହିଁ, ଏହାସତ୍ବେ କଡା ସୁରକ୍ଷା ବନ୍ଦୋବସ୍ତ କରାଯାଇଛି । ସିଂଘୁ, ଟାକ୍ରି ଏବଂ ଗାଜିପୁରରେ ପୋଲିସ ଛାଉଣୀ ହୋଇଛି । ଜାତୀୟ ରାଜପଥ ଉପରେ ୬ ଥାକିଆ ସୁରକ୍ଷା ବ୍ୟବସ୍ଥା କରାଯାଇଛି ।
