ସତ୍ୟଶିଖା ୩୦.୦୭.୨୦୨୦ : ମଣିପୁରରେ ଯବାନଙ୍କ ଉପରେ ଅତର୍କିତ ଆକ୍ରମଣ । ଏହି ଆକ୍ରମଣରେ ୩ ଜଣ ଯବାନ ଶହୀଦ ହୋଇଥିବା ବେଳେ ୬ ଜଣ ଗୁରୁତର ହୋଇଛନ୍ତି । ବୁଧବାର ରାତି ପ୍ରାୟ ୧.୧୫ ସମୟରେ ରାଜଧାନୀ ଇମ୍ଫାଲଠାରୁ ୯୫ କିଲୋମିଟର ଦୂରରେ ଥିବା ଚାନ୍ଦେଲ ଜିଲ୍ଲାରେ ଏହି ଘଟଣା ଘଟିଛି । ଏହା ଏକ ପାହାଡ଼ିଆ ଅଞ୍ଚଳ । ଭାରତ-ମିଆଁମାର ସୀମାରେ ଉଗ୍ରବାଦୀ ସମୂହଙ୍କ ବିରୋଧରେ ଚାଲିଥିବା ଅପରେଶନ ସମୟରେ ୪ ଟି ଆସାମ ରାଇଫଲର ତିନି ଜଣ ଯବାନ ଶହୀଦ ହୋଇଛନ୍ତି । ଉଗ୍ରବାଦୀମାନେ ଯବାନଙ୍କ ଉପରେ ଅତର୍କିତ ଆକ୍ରମଣ କରିଥିଲେ । ସେପଟେ ଏହି ଆକ୍ରମଣରେ ଆଉ ୬ ଜଣ ଯବାନ ଗୁରୁତର ଆହତ ହୋଇଛନ୍ତି । ସେମାନଙ୍କୁ ଇମ୍ଫାଲ ପଶ୍ଚିମ ଜିଲ୍ଲାର ମିଲିଟାରୀ ହସ୍ପିଟାଲରେ ଭର୍ତ୍ତି କରାଯାଇଛି । ମଣିପୁରର ସ୍ଥାନୀୟ ଉଗ୍ରବାଦୀ ସମୂହ ପିପୁଲ୍ସ ଲିବରେଶନ ଆର୍ମି ଏହି ଆକ୍ରମଣ କରିଛନ୍ତି ।
