ସତ୍ୟଶିଖା( ଭୁବନେଶ୍ୱର )୨୬.୧୦.୨୦୨୨: ଏଥର ରାଜ୍ୟରେ ଶୀତ କମ୍ ଅନୁଭବ ହେବ ବୋଲି ପାଣିପାଗ ବିଜ୍ଞାନୀମାନେ ପୂର୍ବାନୁମାନ କରିଛନ୍ତି। ଖାଲି ଓଡ଼ିଶା ନୁହେଁ, ପୂର୍ବ ଭାରତର ରାଜ୍ୟଗୁଡ଼ିକରେ ବି ସମାନ ଅବସ୍ଥା ଦେଖାଦେବ ବୋଲି ସେମାନେ ଯୁକ୍ତି ବାଢ଼ିଛନ୍ତି।
ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ମୁତାବକ ନଭେମ୍ବର ଓ ଡିସେମ୍ବରରେ ରାଜ୍ୟର ବର୍ଷାର ପରିମାଣ ସ୍ବାଭାବିକଠାରୁ ଅଧିକ ହେବାର ସମ୍ଭାବନା ରହିଛି। ଫଳରେ ଡିସେମ୍ବର ଯାଏ ରାଜ୍ୟରେ ଶୀତ ବା ଥଣ୍ଡା କମ୍ ରହିବ। ଆସନ୍ତା ୩ରୁ ୪ଦିନ ପର୍ୟ୍ୟନ୍ତ ରାଜ୍ୟରେ ପାଗ ଶୁଖିଲା ରହିବ। ରାଜ୍ୟର ସର୍ବୋଚ୍ଚ ଓ ସର୍ବନିମ୍ନ ତାପମାତ୍ରାରେ ଆସନ୍ତା ୪ ଦିନ ପର୍ୟ୍ୟନ୍ତ ବିଶେଷ କିଛି ପରିବର୍ତ୍ତନ ଦେଖାଯିବ ନାହିଁ। ଏହାପରେ ଧୀରେଧୀରେ ତାପମାତ୍ରା ହ୍ରାସ ପାଇପାରେ।
ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି ଯେ ବିଭିନ୍ନ ଅନ୍ତର୍ଜାତୀୟ ମଡେଲର ବିଶ୍ଲେଷଣରୁ ଜଣାପଡ଼ୁଛି କି ଆସନ୍ତା ଶୀତ ଋତୁରେ ବିଶ୍ବ ତାପମାତ୍ରା ସ୍ବାଭାବିକଠାରୁ ଅଧିକ ରହିବ। ଓଡ଼ିଶା ସମେତ ଦେଶର ପୂର୍ବ ଉପକୂଳରେ ଫେବ୍ରୁଆରି ୨୦୨୩ ପର୍ୟ୍ୟନ୍ତ ତାପମାତ୍ରା ଅଧିକ ରହିବାର ସମ୍ଭାବନା ରହିଛି। ନଭେମ୍ବରରେ ସାରା ରାଜ୍ୟରେ, ଡିସେମ୍ବରରେ ଉପକୂଳ ସମେତ ଦକ୍ଷିଣ ଓଡ଼ିଶା ଓ ଜାନୁଆରି ତଥା ଫେବ୍ରୁଆରିରେ ସମଗ୍ର ଉପକୂଳରେ ତାପମାତ୍ରା ସ୍ବାଭାବିକଠାରୁ ଅଧିକ ରହିବା ଯୋଗୁଁ ଶୀତ କମ୍ ରହିବ। ସେହିପରି ନଭେମ୍ବର ଓ ଜାନୁଆରି ୨୦୨୩ ରାଜ୍ୟରେ ବର୍ଷା ସ୍ବାଭାବିକଠାରୁ କମ୍ ହୋଇପାରେ।
