ଏଥର ଘରେ ରହିବେ ନିଶାଡ଼ି: ଖଟିକଲେ ଉଠାଇନେବ ପୁଲିସ

ଡିସିପିଙ୍କ ନିର୍ଦ୍ଦେଶ ପରେ ପ୍ରଥମ ଦିନରେ ରାଜଧାନୀର ବିଭିନ୍ନ ଅନ୍ଧାରୁଆ ସ୍ଥାନରେ ଖଟି କରୁଥିବା ୨୬ ଜଣଙ୍କୁ ପୁଲିସ ଉଠାଇ ଆଣିଛି। ଅନେକଙ୍କୁ ତଦନ୍ତ ପରିସରକୁ ନେଇ ଅଟକ ରଖି୍‍ଥିବା ବେଳେ ଆଉ କେତେକଙ୍କୁ ଜରିମାନା ଆଦାୟ କରି ଛାଡ଼ି ଦେଇଛନ୍ତି। ଏହିପରି ଗତକାଲି ରାତିରେ ନୂଆପଲ୍ଲୀ ଥାନା ସାଲିଆସାହିରେ ଥିବା ଏକ ଅନ୍ଧାରୁଆ ସ୍ଥାନରେ ୭ଜଣ ନିଶାଡ଼ି ଖଟି କରୁଥିବା ବେଳେ ସେଠାରେ ଅତର୍କିତ ଚଢ଼ଉ କରି ୪ଜଣଙ୍କୁ କାବୁ କରିଛି ପୁଲିସ। ଅନ୍ୟ ୩ଜଣ ଫେରାର ହୋଇଯାଇଛନ୍ତି। ନୂଆପଲ୍ଲୀ ଥାନା ପୁଲିସ ସେମାନଙ୍କୁ ଅଟକ ରଖି ପଚରାଉଚରା କରିବା ପରେ ସେମାନେ ଡକାୟତି ପାଇଁ ଯୋଜନା କରୁଥିବା ସ୍ୱୀକାର କରିଥିଲେ। ତେଣୁ ଆଜି ପୁଲିସ ସେମାନଙ୍କୁ ଗିରଫ କରି କୋର୍ଟ ଚାଲାଣ କରିବ। ରାଜଧାନୀର ବିଭିନ୍ନ ପରିତ୍ୟକ୍ତ ସ୍ଥାନ ରହିଛି। ସେଠାରେ ଅପରାଧୀମାନେ ନିଶାସେବନ କରି ଅପରାଧ ଘଟାଇବା ପାଇଁ ଯୋଜନା କରୁଛନ୍ତି। ବିଶେଷ କରି ସହରରେ ଥିବା ଖେଳପଡ଼ିଆ, ଅପରିକ୍ତ କୋଠାଘର ଆଦି ଅନେକ ସ୍ଥାନ ରହିଛି। ପୁଲିସ ଏକାଧିକ ଅଭିଯୁକ୍ତଙ୍କୁ ଗିରଫ କରିବା ପରେ ଏଭଳି ଖଟିରୁ ଲୁଟ୍‍ପାଟ ପାଇଁ ଯୋଜନା କରାଯାଉଥିବା ସ୍ପଷ୍ଟ ହୋଇଥିଲା। ପୂର୍ବରୁ କେବିଏନ୍‍ ଗ୍ୟାଙ୍ଗ୍‌ ସହରରେ ବିଭିନ୍ନ ସ୍ଥାନରେ ଖଟି କରି ଭାଇଗିରି ବଢ଼଼ାଉଥିଲେ। ବିଭିନ୍ନ ବସ୍ତିର ପିଲାଙ୍କୁ ନେଇ ଏକ ଗ୍ୟାଙ୍ଗ୍‍ ଗଠନ କରିଥିଲେ। ଏହି ଗ୍ୟାଙ୍ଗ୍‌ ଦ୍ୱାରା ସହରରେ ଆତଙ୍କ ଖେଳାଇବା ସହ ଲୁଟ୍‍ପାଟ ଆଦି କରୁଥିଲେ। ତେଣୁ ଏସବୁ ସମ୍ଭବ ହୋଇଥିଲା ସହରରେ ବିଭିନ୍ନ ଖଟି।