ସତ୍ୟଶିଖା ( କଟକ ) ୨୬ . ୦୮.୨୦୨୦ : କଟକରେ ଦୂର୍ଗା ପୂଜାକୁ ନେଇ ବଢିଲା ଆଶା । ମଣ୍ଡପରେ ହୋଇପାରିବ ମା’ଙ୍କ ପୂଜା । କଟକ ଜିଲ୍ଲାପାଳଙ୍କ ପ୍ରତିକ୍ରିୟା ପୂଜା କମିଟି ଗୁଡିକ ଭିଡ ନଜମାଇ କରିପାରିବେ ପୂଜା । ଜିଲ୍ଲାପାଳଙ୍କ ନିଷ୍ପତ୍ତିକୁ ସ୍ୱାଗତ କଲେ କଟକ ସହରର ବିଭିନ୍ନ ପୂଜା କମିଟି । କୋଭିଡ୍ ଗାଇଡ୍ ଲାଇନ୍କୁ ଦୃଷ୍ଟିରେ ରଖି ଚଳିତ ବର୍ଷ କଟକରେ ଦୁର୍ଗାପୂଜା ହେବ ନାହିଁ ବୋଲି ଜିଲ୍ଲାପାଳ ମଙ୍ଗଳବାର ଦିନ କହିଥିଲେ । ଚଳିତ ବର୍ଷ କୌଣସି ମଣ୍ଡପରେ ଦୁର୍ଗାପୂଜା ହେବ ନାହିଁ ବୋଲି ଜିଲ୍ଲାପାଳ କହିଥିଲେ । କଟକରେ ପୂଜା କଲେ ସହରରେ ସାମାଜିକ ଦୂରତା ରହିବନାହିଁ ।
ଏହାକୁ ଦୃଷ୍ଟିରେ ରଖି ପୂଜା ବନ୍ଦ ରଖିବାକୁ ନିଷ୍ପତ୍ତି ନିଆଯାଇଥିଲା । ଏହାପରେ କଟକବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା । ଅନେକ ପୂଜା କମିଟି ଜିଲ୍ଲା ପ୍ରଶାସନର ଏହି ନିଷ୍ପତିକୁ ଖୋଲା ଖୋଲି ଭାବରେ ବିରୋଧ କରିଥିଲେ । ଏବଂ ଏହି ନିଷ୍ପତି ବିରୁଦ୍ଧରେ ହାଇକୋର୍ଟରେ ଆବେଦନ କରାଯିବ ବୋଲି କହିଥିଲେ । ଚାରିଆଡୁ ବିରୋଧ ବଢିବା ପରେ ୨୪ ଘଣ୍ଟା ମଧ୍ୟରେ ନିଜ ନିଷ୍ପତି ବଦଳାଇବାକୁ ବାଧ୍ୟ ହୋଇଛନ୍ତି କଟକ ଜିଲ୍ଲାପାଳ । ଆଜି ପୁଣି ଥରେ ଜିଲ୍ଲାପାଳ ମଣ୍ଡପଗୁଡିକରେ ମା ଦୁର୍ଗାଙ୍କ ପୂଜା ଆୟୋଜନକୁ ଗ୍ରୀନ୍ ସିଗନାଲ୍ ଦେଇଛନ୍ତି । ଯାହାକୁ ନେଇ ଏବେ କଟକବାସୀଙ୍କ ମଧ୍ୟରେ ଖୁସି ଦେଖିବାକୁ ମିଳିଛି । ଅନ୍ୟପଟେ ଆଉ ଅଳ୍ପ ଦିନ ରହିଲା ଦୁର୍ଗା ପୂଜା ।
