ସତ୍ୟଶିଖା (ଭୁବନେଶ୍ୱର) ୩୦.୦୩.୨୦୨୨: ଏଥର ଜାକଜମକରେ ପାଳନ ହେବ ଓଡ଼ିଶା ଦିବସ । ଗାଁରୁ ସହର ସବୁଠି ଉତ୍ସବ ମୁଖରିତ ହେବ । ରଙ୍ଗବେରଙ୍ଗର ଆଲୋକମାଳା, ସାଜସଜ୍ଜା ସାଙ୍ଗକୁ ଦେଶାତ୍ମବୋଧକ ସଙ୍ଗୀତ ଓ ଆକର୍ଷଣୀୟ ହେବ ସାଂସ୍କୃତିକ କାର୍ୟ୍ୟକ୍ରମ । ସାରା ଓଡ଼ିଶାରେ ଗୋଟିଏ ସମୟ ସନ୍ଧ୍ୟା ୬ଟାରେ ଶୁଭିବ ବନ୍ଦେ ଉତ୍କଳ ଜନନୀ । ସମସ୍ତେ ଏକ ମନ, ପ୍ରାଣ ହୋଇ ଉତ୍କଳ ମାତାର ବନ୍ଦନା କରିବେ । ସୂଚନା ଓ ଲୋକସମ୍ପର୍କ ବିଭାଗ ଏବଂ ସଂସ୍କୃତି ବିଭାଗ ତରଫରୁ ଅନୁଷ୍ଠିତ ଆଭାସୀରେ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଆସନ୍ତା ଏପ୍ରିଲ୍ ୧ରେ ଓଡ଼ିଶା ଦିବସକୁ ସାରା ରାଜ୍ୟରେ ଆକର୍ଷଣୀୟ ଭାବରେ ପାଳନ ନିମନ୍ତେ ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ବ୍ୟାପକ ପ୍ରସ୍ତୁତି କରାଯାଇଛି । ଏହି ଦିନ ରାଜ୍ୟସ୍ତରୀୟ ଉତ୍ସବ ପ୍ରଦର୍ଶନୀ ପଡ଼ିଆରେ ସନ୍ଧ୍ୟା ୬ଟାରେ ଅନୁଷ୍ଠିତ ହେବ । ଏହି ସମୟରେ ଉପଖଣ୍ଡସ୍ତରୀୟ, ଜିଲ୍ଲାସ୍ତରୀୟ ଓ ରାଜ୍ୟସ୍ତରୀୟ ଉତ୍ସବରେ ପ୍ରାରମ୍ଭିକ ସଭା ପରେ ବନ୍ଦେ ଉତ୍କଳ ଜନନୀ ସଙ୍ଗୀତ ପରିବେଷଣ କରାଯିବ । ରାଜ୍ୟସ୍ତରୀୟ କାର୍ୟ୍ୟକ୍ରମକୁ ଭର୍ଚୁଆଲ୍ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିବେ । ବାଚସ୍ପତି ଡ. ସୂର୍ୟ୍ୟନାରାୟଣ ପାତ୍ର ସଭାପତିତ୍ୱ କରିବେ । ସଂସ୍କୃତି ମନ୍ତ୍ରୀ ଓ ଭୁବନେଶ୍ୱରର ତିନି ବିଧାୟକ ଅତିଥି ଭାବେ ଯୋଗଦେବେ । ଏହି ଅବସରରେ ଚିକିତ୍ସା ସେବା କ୍ଷେତ୍ରରେ ୧୦ଜଣ କରୋନା ଯୋଦ୍ଧାଙ୍କୁ ସମ୍ବର୍ଦ୍ଧିତ କରାଯିବ । ସାଧାରଣ ସଭା ପରେ ସଂସ୍କୃତି ବିଭାଗ ଆନୁକୂଲ୍ୟରେ ସ୍ୱନାମଧନ୍ୟ କଣ୍ଠଶିଳ୍ପୀଙ୍କ ଦ୍ୱାରା ଦେଶାତ୍ମବୋଧକ ସଙ୍ଗୀତ ପରିବେଷଣ କରାଯିବ । ଶେଷରେ ଓଡ଼ିଶୀ ନୃତ୍ୟ ଓ ସମ୍ବଲପୁରୀ ଲୋକନୃତ୍ୟ ପରିବେଷଣ ହେବ ।
