ସତ୍ୟଶିଖା(ଭୁବନେଶ୍ୱର) ୦୮ .୦୭.୨୦୨୧: କରୋନାର ସମ୍ଭାବ୍ୟ ତୃତୀୟ ଲହରକୁ ନେଇ ନାନା କଳ୍ପନାଜଳ୍ପନା ଜାରି ରହିଛି । ଗତବର୍ଷ ସେପ୍େଟମ୍ବର ମାସରେ ପ୍ରଥମ ଲହର ଶୀର୍ଷ ସଂକ୍ରମଣ ଆସିଥିବା ବେଳେ ଗତ ମେ’ମାସ ଶେଷ ସପ୍ତାହ ଆଡ଼କୁ ରାଜ୍ୟରେ ଦ୍ୱିତୀୟ ଲହର ଶୀର୍ଷକୁ ଛୁଇଁଥିଲା । କିଛି ୟୂରୋପୀୟ ଦେଶରେ ଇତିମଧ୍ୟରେ ତୃତୀୟ ଲହର ଆସି ସାରିଲାଣି । ତେଣୁ ରାଜ୍ୟରେ ପ୍ରଥମ ଓ ଦ୍ୱିତୀୟ ଲହର ଭିତରେ ଯେତିକି ମାସର ବ୍ୟବଧାନ ରହିଛି; ତାହାଠାରୁ କମ୍ ସମୟ ଭିତରେ ଯଦି ତୃତୀୟ ଲହର ଆରମ୍ଭ ହୁଏ ତାହେଲେ ଆସନ୍ତା ଅକ୍ଟୋବର-ନଭେମ୍ବର ମାସରେ କରୋନାର ତୃତୀୟ ଲହର ଆସିପାରେ ବୋଲି କହିଛନ୍ତି ରାଜ୍ୟ ସ୍ୱାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର । ଏ ସଂପର୍କରେ ସୂଚନା ଦେଇ ଶ୍ରୀ ମହାପାତ୍ର କହିଥିଲେ ଯେ ତୃତୀୟ ଲହରରେ ଶୂନରୁ ୧୮ବର୍ଷର ଶିଶୁ ଅଧିକ ଆକ୍ରାନ୍ତ ହେବାର ଆଶଙ୍କା କରାଯାଉଛି । ଏହାକୁ ନଜରରେ ରଖି ରାଜ୍ୟ ସରକାର ଶିଶୁମାନଙ୍କ ଚିକିତ୍ସା ପାଇଁ ଅତିରିକ୍ତ ୩ହଜାର ଶଯ୍ୟାର ବ୍ୟବସ୍ଥା କରିଛନ୍ତି । ଏଥିରେ ୬୧୦ ଆଇସିୟୁ ରହିଛି । ସିଏଚସି, ଏସଡିଏଚ ଓ ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଡାକ୍ତରମାନଙ୍କୁ ଏଥିପାଇଁ ସ୍ୱତନ୍ତ୍ରଭାବେ ତାଲିମ ଦିଆଯାଇଛି । ପ୍ରାୟ ୪ ହଜାର ସ୍ୱାସ୍ଥ୍ୟକର୍ମୀଙ୍କୁ ଏଥିପାଇଁ ତାଲିମ ଦିଆଯିବ । ରାଜ୍ୟରେ ଏବେ ସଂକ୍ରମଣ ହ୍ରାସ ପାଉଛି । ଆସନ୍ତା ୨ ସପ୍ତାହ ଭିତରେ ଆହୁରି ହ୍ରାସ ପାଇବ । ସଂକ୍ରମଣ ହ୍ରାସ ପାଇଁ ରାଜ୍ୟରେ ଏବେ ସାଧାରଣ ଶଯ୍ୟାରେ ମାତ୍ର ୧୩ ପ୍ରତିଶତ ରୋଗୀ ଥିବା ବେଳେ ଗୁରୁତର ରୋଗୀଙ୍କ ଚିକିତ୍ସା ପାଇଁ ଉଦ୍ଧିଷ୍ଟ ଶଯ୍ୟାର ୬୦-୬୫ ପ୍ରତିଶତ ଖାଲି ପଡ଼ିଛି । ଆଇସିୟୁ ଶଯ୍ୟା ୬୨ ପ୍ରତିଶତ ଖାଲି ରହିଛି ।
