ସତ୍ୟଶିଖା ୨୨.୦୯.୨୦୨୦ : ଦେଶରେ କରୋନା ସଂକ୍ରମଣ ମାମଲା ୫୪.୮୮ ଲକ୍ଷ ଟପିଯାଇଛି । ଗତ ୨୪ ଘଣ୍ଟା‌ ମଧ୍ୟରେ ପୁଣି ୮୬ ହଜାର ୯୬୧ ଜଣ କରୋନା ସଂକ୍ରମିତ ହୋଇଥିବାବେଳେ ୧୧୩୦ ଜଣଙ୍କ କରୋନାରେ ମୃତ୍ୟୁ ହୋଇଛି । ତେବେ ଦେଶରେ ମୋଟ୍‌ ସଂକ୍ରମଣ ମାମଲା ୫୪ ଲକ୍ଷ ୮୭ ହଜାର ୫୮୦ ଥିବାବେଳେ ୮୭ ହଜାର ୮୮୨ ଜଣଙ୍କ କରୋନାରେ ମୃତ୍ୟୁ ହୋଇଛି । ଏଯାବତ୍‌ ୪୩ ଲକ୍ଷ ୯୬ ହଜାର ୩୯୯ ଜଣ କରୋନାରୁ ସୁସ୍ଥ ହେଲେଣି । ଏଥିସହ ଦେଶରେ ଆରୋଗ୍ୟ ହାର ୮୦.୧୨ ପ୍ରତିଶତକୁ ବୃଦ୍ଧି ପାଇଛି ବୋଲି ‌କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ କୁହାଯାଇଛି । ଦେଶରେ କରୋନା ମୃତ୍ୟୁହାର ୧.୬ ପ୍ରତିଶତକୁ କମିଯାଇଛି । ୧୦ ଲକ୍ଷ ୩ ହଜାର ୨୯୯ ସକ୍ରିୟ ମାମଲା ରହିଛି ।ଏହା ମୋଟ୍‌ ସଂକ୍ରମଣ ମାମଲାର ୧୮.୨୮ ପ୍ରତିଶତ। ସ୍ୱାସ୍ଥ୍ୟ ମନ୍ତ୍ରାଳୟ ଅନୁଯାୟୀ ଭାରତର ଆରୋଗ୍ୟ ହାର ସମଗ୍ର ବିଶ୍ୱରେ ସର୍ବାଧିକ । ଆରୋଗ୍ୟ ମାମଲାରେ ବିଶ୍ୱରେ ଶୀର୍ଷ ସ୍ଥାନରେ ରହିଛି ଭାରତ । ବିଶ୍ୱରେ ମୋଟ୍‌ ଆରୋଗ୍ୟ ସଂଖ୍ୟାରୁ ଭାରତର ସର୍ବାଧିକ ୧୯ ପ୍ରତିଶତ ଆରୋଗ୍ୟ ରହିଛନ୍ତି । ୱାର୍ଲ୍ଡମିଟର ତଥ୍ୟ ଅନୁଯାୟୀ ମୋଟ୍‌ ବୈଶ୍ବିକ ଆରୋଗ୍ୟ ସଂଖ୍ୟାରୁ ଭାରତରେ ୧୯ ପ୍ରତିଶତରୁ ଅଧିକ ଥିବାବେଳେ ଆମେରିକାର ୧୮.୭୦ ପ୍ରତିଶତ ଏବଂ ବ୍ରାଜିଲର ଆରୋଗ୍ୟ ମାମଲା ୧୬.୯୦ ପ୍ରତିଶତ ରହିଛି । ତେବେ ଲଗାତାର ୩ ଦିନ ଧରି ଦେଶରେ ଆରୋଗ୍ୟଙ୍କ ସଂଖ୍ୟା ୯୦ ହଜାରରୁ ଅଧିକ ରହୁଛି । ଗତ ୨୪ ଘଣ୍ଟା ମଧ୍ୟରେ ୯୩ ହଜାର ୩୫୬ ଜଣ କରୋନାରୁ ସୁସ୍ଥ ହୋଇଛନ୍ତି । ୧୨ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରେ ଜାତୀୟ ହାରାହାରି ଠାରୁ ଆରୋଗ୍ୟ ହାର ଅଧିକ ରହୁଛି । ଅନ୍ୟପକ୍ଷେ ନୂଆ ଆରୋଗ୍ୟ ମାମଲାର ୭୯ ପ୍ରତିଶତ ୧୦ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳରୁ ଚିହ୍ନଟ ହୋଇଛି ।

“ଗତ ୩ଦିନ ଧରି ୯୦ହଜାରରୁ ଅଧିକ ଆକ୍ରାନ୍ତ ସୁସ୍ଥ ; ଭାରତରେ କରୋନା ଜନିତ ସୁସ୍ଥ ହାର ୮୦% ଅଧିକ”

ଭାରତରେ ଗୋଷ୍ଠୀ ସଂକ୍ରମଣ ପରିସ୍ଥିତି ସୃଷ୍ଟି ହୋଇନି ବୋଲି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ ସ୍ପଷ୍ଟ କରିଛନ୍ତି । ମାତ୍ର ୧୦ଟି ରାଜ୍ୟରେ କରୋନା ସଂକ୍ରମଣ ଚିନ୍ତାଜନକ ସ୍ଥିତିରେ ଅଛି। ତେବେ ଏହା ନିୟନ୍ତ୍ରଣାଧୀନ ବୋଲି କେନ୍ଦ୍ରମନ୍ତ୍ରୀ କହିଛନ୍ତି । ରବିବାର ଏକ ସୋସିଆଲ ମିଡିଆ କାର୍ଯ୍ୟକ୍ରମରେ ଯୋଗଦେଇ କେନ୍ଦ୍ରମନ୍ତ୍ରୀ ହର୍ଷବର୍ଦ୍ଧନ କହିଛନ୍ତି, ଦେଶର ବିଭିନ୍ନ ରାଜ୍ୟରେ ସଂକ୍ରମଣ ଭିନ୍ନଭିନ୍ନ ସ୍ତରରେ ରହିଛି । ସହରାଞ୍ଚଳ ଓ ଗ୍ରାମାଞ୍ଚଳରେ ସଂକ୍ରମଣ ହାର ଭିନ୍ନ ରହିଛି । ମାତ୍ର ୧୦ଟି ରାଜ୍ୟର ସଂକ୍ରମଣ ଦେଶର ୭୭ ପ୍ରତିଶତ ସଂକ୍ରମଣ ପାଇଁ ଦାୟୀ । ତେବେ ଆହୁରି ସ୍ପଷ୍ଟ ଭାବେ ବୁଝିବାକୁ ଗଲେ ଦେଶର କରୋନା ସଂକ୍ରମଣ ମାତ୍ର ହାତଗଣତି କେତୋଟି ଜିଲ୍ଲାରେ ସୀମିତ ରହିଛି ବୋଲି କେନ୍ଦ୍ରମନ୍ତ୍ରୀ ସ୍ପଷ୍ଟ କରିଛନ୍ତି ।