ସତ୍ୟଶିଖା(ଭୁବନେଶ୍ୱର) ୧୭.୧୨.୨୦୨୧: ଯେଉଁ ପ୍ୟାକ୍ସ ଏବଂ ଲ୍ୟାମ୍ପ୍ସରେ ସମ୍ପାଦକମାନେ ଧର୍ମଘଟ କରୁଛନ୍ତି ସେଠି ଧାନ ସଂଗ୍ରହ କରିବ ମହିଳା ସ୍ୱୟଂ ସହାୟକ ଗୋଷ୍ଠୀ (ଏସଏଚଜି) । ଏଥିପାଇଁ ଅଧିକ ସଂଖ୍ୟକ ଗୋଷ୍ଠୀଙ୍କୁ ଧାନ ସଂଗ୍ରହରେ ସାମିଲ କରାଯିବ । ଏ ସଂକ୍ରାନ୍ତରେ ଜିଲ୍ଲାପାଳ କାର୍ୟ୍ୟାଳୟକୁ ଚିଠି ଦିଆଯାଇଥିବା ରାଜ୍ୟ ଖାଦ୍ୟ ଯୋଗାଣ ଏବଂ ଖାଉଟି କଲ୍ୟାଣ ବିଭାଗ ପକ୍ଷରୁ କୁହାଯାଇଛି ।
ପ୍ରେସ ବିଜ୍ଞପ୍ତିରେ ବିଭାଗ ଜଣାଇଛି, ଆବଶ୍ୟକ ପଡ଼ିଲେ ନିୟନ୍ତ୍ରିତ ବଜାର କମିଟିର କର୍ମଚାରୀ, ଯୋଗାଣ ସହାୟକମାନଙ୍କୁ ମଧ୍ୟ ଧାନ ସଂଗ୍ରହ କାର୍ୟ୍ୟରେ ନିୟୋଜିତ କରାଯିବ । ଏଥିପାଇଁ ନୂତନ ତାଲିକା ସହିତ ୟୁଜର ଆଇଡି, ପାସୱାର୍ଡ ପ୍ରସ୍ତୁତ କରାଯିବ । ସେମାନଙ୍କୁ ପ୍ରଶିକ୍ଷଣ ଦେବାର ବ୍ୟବସ୍ଥା କରାଯାଇଛି ।
ଯେଉଁ ସ୍ଥାନରେ ଧାନ ସଂଗ୍ରହ କାର୍ୟ୍ୟ ପ୍ରଭାବିତ ହେବାର ଆଶଙ୍କା ରହିଛି, ସେଠାରେ ଚାଷୀ ସହଜରେ ଏବଂ ସୁବିଧା ଧାନ ବିକ୍ରି କରିବା ନେଇ କିଭଳି ପଦକ୍ଷେପ ଗ୍ରହଣ ହେଉଛି ସେ ସଂକ୍ରାନ୍ତରେ ଜଣାଇବାକୁ କୁହାଯାଇଛି । ଏଥିସହିତ ମୁଖ୍ୟ ଯୋଗାଣ ଅଧିକାରୀ, ଯୋଗାଣ ଅଧିକାରୀ, ଡିଆରସିଏସ, ଏଆରସିଏସ, ଜିଲ୍ଲା ସମାଜ ମଙ୍ଗଳ ଅଧିକାରୀ ଏବଂ ନିୟନ୍ତ୍ରିତ ବଜାର କମିଟି ସମ୍ପାଦକମାନେ ଜିଲ୍ଲାସ୍ତରୀୟ ବୈଠକ କରି ସମସ୍ୟାର ସମାଧାନ ଖୋଜିବାକୁ କୁହାଯାଇଛି ।
