ସତ୍ୟଶିଖା ୨୮/୧୨/୨୦୨୦ : କରୋନା କାଳରେ ରାଜଧାନୀର ବ୍ୟବସାୟ ପ୍ରତିଷ୍ଠାନଗୁଡ଼ିକରେ ତାଲା ପଡ଼ିଥିଲା । ୩ରୁ ୪ ମାସ ପର୍ଯ୍ୟନ୍ତ ଦୋକାନ ବଜାର ଖୋଲିପାରି ନ ଥିଲା । ପରବର୍ତୀ ସମୟରେ କରୋନା ସ୍ଥିତିରେ ସାମାନ୍ୟ ଉନ୍ନତି ଆସିବା ପରେ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ କଟକଣାରେ କୋହଳ କରାଗଲା । ଦୋକାନ ବଜାର ଖୋଲିବା ଲାଗି ଅନୁମତି ମିଳିଲା । ଯେତେବେଳେ ଅନୁମତି ମିଳିଲା ସେତେବେଳେ ଯିଏ ଯେଉଁଠି ପାରିଲେ ଦୋକାନ ଖୋଲି ଚାଲିଲେ । ହାଟ, ବଜାର ଭିତରେ ଓ ନିକଟରେ ଥିବା ଉଠାଦୋକାନୀ ରାସ୍ତାପାର୍ଶ୍ୱକୁ ଚାଲି ଆସିଲେ । କେତେଜଣ ନୂଆ ବ୍ୟବସାୟୀ ବି ସୃଷ୍ଟି ହୋଇ ରାସ୍ତାପାର୍ଶ୍ୱରେ ପସରା ମେଲାଇ ବେପାର କଲେ ।
ଧୀରେ ଧୀରେ ଜଣକ ପରେ ଜଣେ ବ୍ୟବସାୟୀ ରାସ୍ତାପାର୍ଶ୍ୱକୁ ଆସିବା ସହ ଫୁଟପାଥ୍ ମାଡ଼ି ବସିଲେଣି । ସେବେଠାରୁ ସେମାନେ ରାସ୍ତାପାର୍ଶ୍ୱ/ଫୁଟପାଥ୍ରେ ବସିଛନ୍ତି ଯେ ଫେରିବାର ନାଁ ଧରୁ ନାହାନ୍ତି । ବାହାର ରାଜ୍ୟର କିଛି ବୁଲା ବେପାରୀ ବି ରାସ୍ତା କଡ଼ରେ ନିଜର ପସରା ମେଲାଇ ଦେଇଛନ୍ତି । ଯାହାକି ଟ୍ରାଫିକ୍ ସମସ୍ୟା ସୃଷ୍ଟି କରିବା ସହ ରାସ୍ତାପାର୍ଶ୍ୱର ସୌନ୍ଦର୍ଯ୍ୟକୁ ନଷ୍ଟ କରୁଛି । ରାଜଧାନୀରେ ଚଳପ୍ରଚଳ କରୁଥିବା ବିଏମ୍ସିର ବାବୁମାନେ ଏବିଷୟରେ ସବୁ ଜାଣି ମଧ୍ୟ ଚୁପ୍ ବସି ରହିଛନ୍ତି ।
ପରିଣାମ ସ୍ବରୂପ ରାଜଧାନୀ ରାସ୍ତାପାର୍ଶ୍ୱରେ ଏବେ ବେପାର ଚାଲିଛି। ଟ୍ରାଫିକ୍ ସମସ୍ୟା ଜଟିଳ ହେଉଛି । ରାସ୍ତା ଉପରେ ଗାଡ଼ି ରଖି ଗ୍ରାହକମାନେ ସାମଗ୍ରୀ କିଣୁଥିବାରୁ ଭିଡ଼ ବି ହେଉଛି । ଜନଗହଳିପୂର୍ଣ୍ଣ ଜୟଦେବ ବିହାରରୁ କିଟ୍ ଛକ ରାସ୍ତା, ରସୁଲଗଡ଼ରୁ ରବି ଟକିଜ୍, ରାଜମହଲ ଛକରୁ ଏଜି ଛକ, ବାଣୀବିହାରରୁ ସତ୍ସଙ୍ଗ୍ ବିହାର ରାସ୍ତା, ଏଜି ଛକରୁ ରାଜମହଲ ରାସ୍ତାରେ ସ୍ଥିତି ଅଣୟତଃ ହେଲାଣି । ଫୁଟପାଥ୍ଠାରୁ ସାଇକେଲ୍ ଟ୍ରାକ୍, ସବୁଠି ବୁଲା ବିକାଳିଙ୍କ ଭିଡ଼ । ଟ୍ରାଫିକ୍ ସମସ୍ୟା ଯୋଗୁଁ କିଛିଦିନ ତଳେ ବିଏମସି ଓ ଟ୍ରାଫିକ୍ ପକ୍ଷରୁ ସ୍ଵତନ୍ତ୍ର ସ୍କ୍ୱାଡ୍ ଗଠନ କରାଯାଇ ଏଜି ଛକରୁ ରାଜମହଲ ଓ ରାଜମହଲରୁ ଏଜି ଛକ ପର୍ଯ୍ୟନ୍ତ ରାସ୍ତାରେ ଉଚ୍ଛେଦ ହୋଇଥିଲା । ନିୟମ ନ ମାନିଲେ କ୍ରେନ ଲଗାଇ ଦୋକାନଗୁଡ଼ିକୁ ଟାଣି ନିଆଯାଉଥିଲା । ତେବେ ଏବେ ପରିସ୍ଥିତି ଯାହାକୁ ସେୟା ।
ସବୁଠାରୁ ବିଚିତ୍ର ସ୍ଥିତି ଉପୁଜିଛି ଜୟଦେବ ବିହାର-ନନ୍ଦନକାନନ ରାସ୍ତାରେ । ରାସ୍ତାପାର୍ଶ୍ୱ ଯୁଆଡ଼େ ଚାହିଁଲେ କେବଳ ଉଠାଦୋକାନୀ ଓ ବୁଲା ବିକାଳୀ । ରାଜ୍ୟ ବାହାରର ଶତାଧିକ ବୁଲା ବିକାଳୀ ବି ଏଠାରେ ନିଜର ପସରା ମେଲାଇ ସାରିଲେଣି । ବିଭିନ୍ନ ଠାକୁରଙ୍କ ଫଟୋକୁ ରାସ୍ତା ଉପରେ ରଖି ବେପାର କରୁଛନ୍ତି । ଫୁଥ୍ପାଥରେ ଘର କରଣା ସାମଗ୍ରୀ ବି ବିକ୍ରି କରାଯାଉଛି । ଓଡ଼ିଶାର ବୁଲା ବିକାଳୀ ଯଦି ରାସ୍ତା କଡ଼ରେ ବେପାର କରୁଛନ୍ତି ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉଛି । ହେଲେ ବାହାର ରାଜ୍ୟର ବୁଲା ବିକାଳୀମାନେ ମାସ ମାସ ଧରି ଫୁଥ୍ପାଥ କବ୍ଜା କରି ବେପାର କରୁଥିଲେ ମଧ୍ୟ ସେଥିପ୍ରତି କାହାର ବି ନିଘା ନାହିଁ ।
କରୋନା ପୂର୍ବରୁ ଚନ୍ଦ୍ରଶେଖରପୁର ବିଡିଏ କଲୋନୀଠାରୁ ଡମଣା ଛକ ଓ ଡମଣା ଛକରୁ ଓମ୍ଫେଡ୍ ଛକ ମଧ୍ୟରେ ରାସ୍ତାପାର୍ଶ୍ୱରେ କାଁ ଭାଁ ଉଠାଦୋକାନ ରହିଥିଲା । ଏବେ କିନ୍ତୁ ଶତାଧିକ ଉଠାଦୋକାନୀ । ରାସ୍ତାପାର୍ଶ୍ୱରେ ହୋଟେଲଠାରୁ ଆରମ୍ଭ କରି ଫଳ ବେପାରୀ, ମାସ୍କ ବେପାରୀ, ଖିଲିପାନ ଦୋକାନୀ, ଫୁଲ ଦୋକାନୀ, ଗୁପ୍ଚୁପ୍ ବେପାରୀ, ମିମେଣ୍ଟ ପ୍ରସ୍ତୁତ ସାମଗ୍ରୀ ବିକ୍ରି କରୁଥିବା ବ୍ୟବସାୟୀ ଏଠାରେ ଆଡ୍ଡା ଜମାଇଛନ୍ତି । ଉକ୍ତ ଦୋକାନଗୁଡ଼ିକୁ ଯିବା ସମୟରେ ଗ୍ରାହକମାନେ ରାସ୍ତା ପାର୍ଶ୍ୱରେ ଗାଡ଼ି ରଖି ଯାଉଛନ୍ତି । ଯେଉଁଥିପାଇଁ ପୂର୍ବାହ୍ନ ଓ ସନ୍ଧ୍ୟା ସମୟରେ ଏହି ରାସ୍ତାରେ ଟ୍ରାଫିକ୍ ସମସ୍ୟା ସୃଷ୍ଟି ହେଉଛି । ଏଥିପ୍ରତି ଗୁରୁତ୍ବ ଦେବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି ।
