ସତ୍ୟଶିଖା ୧୬/୦୮/୨୦୨୫: ମୁମ୍ୱାଇ ଠାରୁ ପାଖାପାଖି ୫୦୦ କିଲୋମିଟର ଓ ସବୁଠୁ ନିକଟସ୍ଥ ତହସିଲ ଠାରୁ ପାଖାପାଖି ୫୦ କିଲୋମିଟର ଦୂରରେ ଥିବା ଏହି ଛୋଟ ଗାଁରେ ପାଖାପାଖି ୪୦୦ ଲୋକ ରୁହନ୍ତି। ଏଠାରେ କୌଣସି ସରକାରୀ ସ୍କୁଲ , ଗ୍ରାମ ପଞ୍ଚାୟତ ଅଫିସ ମଧ୍ୟ ନାହିଁ , ଏଥିପାଇଁ ଏଠାରେ କେବେ ବି ତ୍ରିରଙ୍ଗା ଉତ୍ତୋଳନ ହୋଇ ନାହିଁ। ଏହି ପିଲାଙ୍କ ସାହାଯ୍ୟ ପାଇଁ ଏଠାରେ ଏକ ୱାଇୟୁଏନଜି ଫାଉଣ୍ଡେସନ ନାମରେ ଏନଜିଓ କାମ କରିଥାଏ , ଯିଏ ପିଲାଙ୍କୁ ପାଠପଢାରେ ମଧ୍ୟ ସାହାଯ୍ୟ କରିଥାଏ।
ଏନଜିଓର ପ୍ରତିଷ୍ଠାତା ସନ୍ଦୀପ ଦେଓରେ କହିଛନ୍ତି , ଏହି ଅଞ୍ଚଳର ପ୍ରାକୃତିକ ସୌନ୍ଦର୍ଯ୍ୟ , ଉର୍ବର ମୃତ୍ତିକା ଓ ନର୍ମଦା ନଦୀ ଦ୍ୱାରା ସମୃଦ୍ଧ। କିନ୍ତୁ ପାହାଡ଼ିଆ ଅଞ୍ଚଳ ହେବା ଯୋଗୁଁ ଏଠାରେ ପହଞ୍ଚିବା ଖୁବ୍ ମୁସ୍କିଲ ହୋଇଥାଏ। ଆମର ଏହି ପଦକ୍ଷେପର ଉଦ୍ଦେଶ୍ୟ କେବଳ ପ୍ରଥମ ଥର ପାଇଁ ପତାକା ଉତ୍ତୋଳନ କରିବା ନୁହେଁ ବରଂ ସ୍ଥାନୀୟ ଲୋକଙ୍କୁ ସେମାନଙ୍କର ଗଣତାନ୍ତ୍ରିକ ଅଧିକାର ବିଷୟରେ ସଚେତନ କରିବା ମଧ୍ୟ ଥିଲା। ସେ କହିଥିଲେ , ଏଠାର ଆଦିବାସୀ ବହୁତ ଆତ୍ମନିର୍ଭର ଜୀବନ ଜିଇଁ ଥାନ୍ତି, କିନ୍ତୁ ଏହା ଜରୁରୀ ନୁହେଁ ଯେ,ସେମାନେ ସମସ୍ତେ ଆମ ସମ୍ୱିଧାନ ଦ୍ୱାରା ଦିଆଯାଇ ଥିବା ଅଧିକାର ଗୁଡ଼ିକୁ ଜାଣନ୍ତି। ବାହାରେ କାମ କରିବା ସମୟରେ କିମ୍ୱା ଦୈନନ୍ଦିନ କାରବାରରେ ଏହି ଲୋକେ ପ୍ରାୟତଃ ଶୋଷିତ ଓ ଲୁଣ୍ଠିତ ହୁଅନ୍ତି।
ସତପୁଡାର ଘଞ୍ଚ ପାହାଡ଼ ଘେରା ଏହି ଗାଁରେ ଯେଉଁଠି ଏବେସୁଦ୍ଧା ବିଦ୍ୟୁତ୍ ମଧ୍ୟ ପହଞ୍ଚି ପାରିନାହିଁ , ମୋବାଇଲ ନେଟୱର୍କ କେବେ କେବେ ଉପଲବ୍ଧ ହୋଇଥାଏ। ସେଠାରେ ଏକ ଏନଜିଓ ନିଜର କାର୍ଯ୍ୟକର୍ତ୍ତାଙ୍କ ସାହାଯ୍ୟରେ ୩୦ଜଣ ପିଲା ଓ ଗାଁ ଲୋକଙ୍କ ମିଶି ଏହି କାମ କରିଛି।ଏହି ଅଞ୍ଚଳରେ ତିନି ବର୍ଷ ଧରି ପିଲାମାନଙ୍କୁ ଶିକ୍ଷା ପ୍ରଦାନରେ ସାହାଯ୍ୟ କରୁଥିବା ଏହି ଏନଜିଓ ଚଳିତବର୍ଷ ସ୍ୱାଧୀନତା ଦିବସର ଅବସରରେ ଚାରୋଟି ଛୋଟ ଛୋଟ ଗାଁ – ଉଦାଡ୍ୟା,ଖପରମାଲ , ସଦରୀ ଓ ମାଞ୍ଜାନିପଡ଼ାରେ ତ୍ରିରଙ୍ଗା ଉତ୍ତୋଳନ କରିବାକୁ ନିଷ୍ପତ୍ତି ନେଲା। ଏହାପରେ ଏହି ୪ଟି ଗାଁର ଏନଜିଓ ଥିବା ସ୍କୁଲ୍ରେ ପଢୁଥିବା ୨୫୦ ଜଣ ପିଲା ଓ ସ୍ଥାନୀୟ ଲୋକଙ୍କ ସହ ମିଶି ପ୍ରଥମ ଥର ତ୍ରିରଙ୍ଗା ଉତ୍ତୋଳନ କରାଗଲା। ଜଣେ ସ୍ଥାନୀୟ ବାସିନ୍ଦା ଭୁବନ ସିଂହ ପାୱାରା କହିଛନ୍ତି , ଗାଁ ଲୋକେ ଅନ୍ୟ ଅଞ୍ଚଳକୁ ଯିବା ପାଇଁ କିଛି ଘଣ୍ଚା ଚାଲି ଚାଲି ଯା’ନ୍ତି ଏବଂ ପୁଣି ନର୍ମଦା ନଦୀରେ ଡଙ୍ଗା ବ୍ୟବହାର କରନ୍ତି। ଭୁବନ କହିଛନ୍ତି ଯେ, ତାଙ୍କ ଜମିରେ ଏକ ଏନଜିଓ ସ୍କୁଲ ଚାଲିଛି। ଏଠାରେ ସବୁଠୁ ବଡ଼ ସମସ୍ୟା ଶିକ୍ଷାର ଅଭାବ ଏବେ ସେ ଚାହାନ୍ତି ନାହିଁ ଯେ, ଆଗାମୀ ପିଢି ମଧ୍ୟ ଏହି ସମସ୍ୟା ଦେଇ ଗତି କରନ୍ତୁ। ଏହି ସବୁ ଗାଁରେ ଏବେ ସୁଦ୍ଧା ବିଦ୍ୟୁତ୍ ପହଞ୍ଚି ନାହିଁ , ଏଥିପାଇଁ ଅଧିକାଂଶ ଘର ସୋଲାର ପ୍ୟାନେଲରେ ହିଁ ନିର୍ଭରଶୀଳ।
-
-
-
-
-
-
-
-
-
-
