ସତ୍ୟଶିଖା(ଭୁବନେଶ୍ୱର ) ୧୪ .୦୧.୨୦୨୨ : ୧୯୮୬ ବ୍ୟାଚ୍ ଆଇଏଏସ୍ ତଥା ରାଜ୍ୟ ମୁଖ୍ୟ ସଚିବ ସୁରେଶ କୁମାର ମହାପାତ୍ରଙ୍କ କାର୍ଯ୍ୟକାଳ ଆଉ ୬ମାସ ବୃଦ୍ଧି ହୋଇଛି। ଓଡ଼ିଶା ସରକାରଙ୍କ ପ୍ରସ୍ତାବ ଆଧାରରେ କେନ୍ଦ୍ର କାର୍ମିକ ମନ୍ତ୍ରଣାଳୟ ଆଜି ଏଥିପାଇଁ ଅନୁମତି ଦେଇଛନ୍ତି। ଶ୍ରୀ ମହାପାତ୍ର ୨୦୨୨ ଫେବୃୟାରୀ ୨୮ତାରିଖରେ ସରକାରୀ ଚାକିରିରୁ ଅବସର ନେଇଥାନ୍ତେ। ୧୯୫୯ ବ୍ୟାଚ୍ ଆଇଏଏସ୍ ଆର.ଏନ. ଦାସ ଓଡ଼ିଶାର ଶେଷ ମୁଖ୍ୟ ସଚିବ ଥିଲେ, ଯାହାଙ୍କ କାର୍ଯ୍ୟକାଳକୁ ୩ଟି ପର୍ଯ୍ୟାୟରେ ରାଜ୍ୟ ସରକାର ସେତେବେଳେ ବୃଦ୍ଧି କରିଥିଲେ।
ସୂଚନାଯୋଗ୍ୟ, ପଂଚାୟତ ଓ ପୌର ନିର୍ବାଚନକୁ ଦୃଷ୍ଟିରେ ରଖି ରାଜ୍ୟ ସରକାର ଶ୍ରୀ ମହାପାତ୍ରଙ୍କୁ ମୁଖ୍ୟ ସଚିବ ଭାବେ ଆଉ ୬ମାସ କାର୍ଯ୍ୟ କରିବାକୁ ସୁଯୋଗ ଦେଇଥିବା ଜଣାପଡ଼ିଛି । ଶ୍ରୀ ମହାପାତ୍ର ୨୦୨୧ ଜାନୁୟାରୀ ୧ତାରିଖରେ ରାଜ୍ୟର ମୁଖ୍ୟ ସଚିବ ଦାୟିତ୍ୱ ଗ୍ରହଣ କରିଥିଲେ ।
ଉଲ୍ଲେଖଯୋଗ୍ୟ, ୧୯୯୨ ଡିସେମ୍ବର ୧ରେ ବିଜୁ ପଟ୍ଟନାୟକ ସରକାରରେ ମୁଖ୍ୟ ସଚିବ ଭାବେ ଆରଏନ୍ ଦାସ କାର୍ଯ୍ୟ କରିଥିଲେ । ଯାହାଙ୍କ ଚାକିରି ଅବଧିକୁ ସେତେବେଳେ ୩ଥର ବୃଦ୍ଧି କରାଯାଇଥିଲା । ଶ୍ରୀ ଦାସ ହିଁ ଓଡ଼ିଶାର ଶେଷ ମୁଖ୍ୟ ସଚିବ ଥିଲେ, ଯାହାଙ୍କ କାର୍ଯ୍ୟକାଳକୁ ବୃଦ୍ଧି କରାଯାଇଥିଲା ଓ ଏବେ ପ୍ରାୟ ୨୭ବର୍ଷ ପରେ ମୁଖ୍ୟ ସଚିବ ଭାବେ ଶ୍ରୀ ମହାପାତ୍ରଙ୍କ କାର୍ଯ୍ୟକାଳ ଅବଧି ବୃଦ୍ଧି ପାଇଛି ।
