ସତ୍ୟଶିଖା( ଭୁବନେଶ୍ୱର )୩୦.୦୮ . ୨୦୨୨: ଅଗଷ୍ଟ ୩୧ ବୁଧବାର ପ୍ରଭୁ ଗଣେଶଙ୍କ ପୂଜା। ଏହାକୁ ଗଣେଶ ଚତୁର୍ଥୀ ମଧ୍ୟ କୁହାଯାଏ। ପ୍ରଥମ ପୂଜ୍ୟ ପ୍ରଭୁ ଗଣେଶଙ୍କ ପୂଜାରେ ପୁର ଠାରୁ ପଲ୍ଲୀ ଯାଏଁ ଗଣପତିଙ୍କ ଆରାଧନା କରାଯିବ। ଏହାସହ ପ୍ରଭୁଙ୍କ ଅନେକ ମନ୍ଦିରରେ ମଧ୍ୟ ଲକ୍ଷାଧିକ ଭକ୍ତ ଏକାଠି ହୋଇଥାଆନ୍ତି। ନିଜ ମନସ୍କାମନା ପୂରଣ ପାଇଁ ଭକ୍ତମାନେ ବିଭିନ୍ନ ମନ୍ଦିରକୁ ପ୍ରଭୁ ଗଣେଶଙ୍କ ଦର୍ଶନ ପାଇଁ ଯାଇଥାଆନ୍ତି। ତେବେ ପ୍ରଭୁ ଗଣେଶଙ୍କ ଏଭଳି ଏକ ମନ୍ଦିର ବିଷୟରେ ଜାଣନ୍ତୁ ଯାହା କେବଳ ଗଣେଶ ଚତୁର୍ଥୀରେ ହିଁ ଖୋଲିଥାଏ। ଏହି ମନ୍ଦିର ଉଚ୍ଛିଷ୍ଟ (ଅଇଁଠା) ଗଣପତି ମନ୍ଦିର ଭାବେ ବେଶ ପ୍ରସିଦ୍ଧ। ଜାଣନ୍ତୁ କ’ଣ ରହିଛି ଏହି ମନ୍ଦିରର ବିଶେଷତ୍ୱ..
ମାନ୍ୟତାନୁଯାୟୀ, ଅନ୍ୟ ସ୍ୱରୂପ ତୁଳନାରେ ଉଚ୍ଛିଷ୍ଟ ଗଣପତିଙ୍କ ଦର୍ଶନ ପରେ ଖୁବ ଶୀଘ୍ର ମନସ୍କାମନା ପୂରଣ ହୋଇଥାଏ। ରାଜସ୍ଥାନର ଯୋଧପୁର ସହର ସ୍ଥିତ ଗଜାନନ ମନ୍ଦିର ଖୋଲିବାର ଏକ ବିଧାନ ରହିଛି। ମନ୍ଦିରର କବାଟ ଖୋଲାଯିବା ପୂର୍ବରୁ ଦଶ ହଜାର ଆହୁତି ଯଜ୍ଞରେ ସମର୍ପଣ କରାଯାଇଥାଏ। ଏହାପରେ ମନ୍ଦିର କବାଟ ଖୋଲା ଯାଇଥାଏ। ଏହି ମନ୍ଦିର ବର୍ଷକୁ ଥରେ ମାତ୍ର ୧୨ ଘଣ୍ଟା ପାଇଁ ଖୋଲିଥାଏ। ଏଠାରେ ପ୍ରଭୁ ଗଣେଶଙ୍କୁ ଆପଣ ସକାଳ ୬ଟା ରୁ ସନ୍ଧ୍ୟା ୬ ଯାଏଁ ଦର୍ଶନ କରିପାରିବେ। କୁହାଯାଏ ଯେଉଁମାନଙ୍କର ବିବାହରେ ବିଳମ୍ବ ହୋଇଥାଏ ସେମାନେ ଏହି ମନ୍ଦିରରେ ପ୍ରଭୁଙ୍କୁ ସିନ୍ଦୂର ଓ ଦୁବ ଅର୍ପଣ କରି ଦର୍ଶନ କଲେ ବିବାହ ଶୀଘ୍ର ହୋଇଯାଏ। ସେହିପରି ବୈବାହିକ ଜୀବନରେ ସମସ୍ୟା ଥିଲେ, ସେମାନେ ମଧ୍ୟ ପ୍ରଭୁଙ୍କୁ ଦର୍ଶନ କଲେ ଶୁଭଫଳ ପ୍ରାପ୍ତି ହୋଇଥାଏ। ପାନ,ଗୁଆ,ଗୁଜୁରାତି ଆଦି ପାଟିରେ ରଖି ଶ୍ରଦ୍ଧାଳୁ ମନ୍ଦିର ଭିତରକୁ ଯାଇ ଥାଆନ୍ତି। ମାନ୍ୟତା ଅନୁଯାୟୀ, ଉଚ୍ଛିଷ୍ଟ ଗଣପତିଙ୍କ ସ୍ୱରୂପକୁ ଦର୍ଶନ କରିବା ଦ୍ୱାରା ବ୍ୟକ୍ତିଙ୍କ ସମସ୍ତ ମନସ୍କାମନା ପୂରଣ ହୋଇଥାଏ। ପ୍ରାଚୀନ ପୁରାଣ ଅନୁଯାୟୀ, ଗଣପତିଙ୍କ ଏହି ସ୍ୱରୂପର ସାଧନା କରିବା ଦ୍ୱାରା ଐଶ୍ୱର୍ଯ୍ୟ,ଉଚ୍ଚ ପଦବୀ, ଧନସମ୍ପତ୍ତି ବୃଦ୍ଧି,ସୁଖମୟ ଜୀବନ ପ୍ରାପ୍ତି ହୋଇଥାଏ।
